走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 29:1 | 「你分別𪜶做聖，做祭司服事我，著按呢行：取一隻公的牛仔，二隻無瑕疵公的綿羊， |
|---|---|
| 29:2 | 閣無酵餅及攪油的無酵餅，及抹油無酵的薄餅；攏著用好的麵粉做的。 |
| 29:3 | 諸個餅著下佇一腳筐，貯佇筐裡帶來，閣牽彼隻公的牛及二隻公的綿羊來。 |
| 29:4 | 著互亞倫及伊許個子到會幕的門口，用水洗𪜶。 |
| 29:5 | 著提許個衣服來，將內衫及以弗得內面的外袍，及以弗得，連補給亞倫穿，也用奇巧的工所織以弗得的帶給伊縖。 |
| 29:6 | 用帽戴佇伊的頭殼，將聖的冕旒褡佇帽的頂面， |
| 29:7 | 著用抹的油倒佇伊的頭殼來抹伊。 |
| 29:8 | 著互伊的子來，給𪜶穿內衫。 |
| 29:9 | 閣用帶縖亞倫及伊許個子，給𪜶包頭殼的巾，𪜶照永遠的例得著祭司的職。閣著給亞倫及伊許個子行設立的禮。 |
| 29:10 | 「你著牽彼隻公的牛到會幕前，亞倫及伊許個子著按手佇牛的頭殼頂。 |
| 29:11 | 你著佇耶和華的面前，佇會幕的門口，刣彼隻牛。 |
| 29:12 | 取伊的血淡薄，用指頭仔抹佇壇的四角，將血攏傾佇壇腳裡。 |
| 29:13 | 著將一切五臟的油及肝頂的網紗，及二粒腰子以及腰子的油，攏燒佇壇頂。 |
| 29:14 | 獨獨牛的肉，及伊的皮，伊的糞攏著用火燒佇營外。是做贖罪祭。 |
| 29:15 | 「你著牽一隻公的綿羊來，亞倫及伊許個子著按手佇彼隻羊的頭殼頂。 |
| 29:16 | 著刣彼隻羊，將伊的血灑佇壇的四圍。 |
| 29:17 | 著將羊切一塊一塊，洗五臟及腿，橐佇切歸塊的肉及頭的頂面。 |
| 29:18 | 著將歸隻羊燒佇壇頂，是獻互耶和華的燒祭，是芳芳的用火燒互耶和華的祭。」 |
| 29:19 | 「你著將第二隻公的綿羊牽來，亞倫及伊許個子著按手佇羊的頭殼頂。 |
| 29:20 | 你著刣彼隻羊，取伊的血淡薄抹佇亞倫正旁的耳仔垂，及伊諸個子正旁的耳仔垂，閣抹佇𪜶正手的大哺拇及正腳的大哺拇；閣將血灑佇壇的四圍。 |
| 29:21 | 你著取壇頂的血淡薄及抹的油灑佇亞倫及伊的衫，閣灑佇伊的子及伊的子的衫，伊及伊的衫，伊的子及伊的子的衫攏分別做聖。 |
| 29:22 | 「閣著取彼隻羊的油及伊的肥的尾，及蓋五臟的油及肝頂的網紗，二粒腰子以及腰子的油及正旁的腿，這是成設立的禮的羊。 |
| 29:23 | 閣對彼奇下佇耶和華的面前貯無酵餅的筐仔內提一塊餅，一塊攪油的餅，一塊薄餅， |
| 29:24 | 攏下佇亞倫的手及伊的子的手，搖佇耶和華的面前，做搖祭。 |
| 29:25 | 你著對𪜶的手接來，燒佇壇頂燒祭的頂面做芳芳佇耶和華的面前，是用火燒互耶和華的祭。 |
| 29:26 | 「亞倫受設立的禮所獻公的羊你著取伊的胸，搖佇耶和華的面前，做搖祭，這是你的份額。 |
| 29:27 | 行設立的禮所獻公的羊，彼個搖祭的胸及舉祭的腿，就是所搖的、所舉起的，你著分別伊做聖，就是屬佇亞倫及伊許個子的， |
| 29:28 | 這著做亞倫及伊的子孫對以色列人所得著永遠的份額，因為是舉祭。著對以色列人平安祭的中間做舉祭，就是𪜶獻互耶和華的舉祭。 |
| 29:29 | 「亞倫的聖衫著留互伊後代的子孫，通穿伊來受抹油，也穿伊來受設立。 |
| 29:30 | 伊的子彼個續接伊當祭司的，逐擺入會幕佇聖所服事的時，著穿七日久。 |
| 29:31 | 「行設立的禮所獻公的羊的肉，你著佇聖的所在煮伊。 |
| 29:32 | 亞倫及伊的子著佇會幕的門口食此隻羊的肉及筐仔內的餅。 |
| 29:33 | 𪜶著食所用來贖罪的物，互𪜶擔當職，也分別𪜶做聖；獨獨外人呣通食，因為這是聖物。 |
| 29:34 | 彼個行設立的禮所獻的肉抑是餅，若有留到隔早起的，你著將所留的用火燒伊，呣通食伊，因為是聖的物。 |
| 29:35 | 「你著照我一切所吩咐的行佇亞倫及伊的子，行設立的禮著七日久。 |
| 29:36 | 逐日著獻公的牛一隻做贖罪祭。你為壇贖罪的時，就互伊清氣；也著給伊抹油，分別伊做聖。 |
| 29:37 | 你著為壇贖罪七日久，互伊成聖，壇就成做至聖。見若摸著伊的攏分別做聖。」 |
| 29:38 | 「你所著獻佇壇裡的是諸個就是未滿年的羊仔二隻，逐日著獻； |
| 29:39 | 早起時著獻一隻，黃昏的時著獻彼隻。 |
| 29:40 | 你著用幼的麵粉一伊法十份的一，用夾好的油一欣四份的一調和的，及一隻羊仔相同獻，閣用酒一欣四份的一做灌奠。 |
| 29:41 | 猶彼隻的羊仔著佇黃昏的時來獻，著照早起時的素祭及灌奠的禮料理伊，做芳芳用火燒來獻互耶和華的祭。 |
| 29:42 | 這欲佇耶和華的面前、佇會幕的門口，做恁逐世代常常獻的燒祭。我欲佇遐及恁相會，及你講話。 |
| 29:43 | 我欲佇遐及以色列人相會，會幕就欲因為我的榮光成做聖。 |
| 29:44 | 我欲互會幕及壇做聖，也欲互亞倫及伊許個子做聖，做祭司來服事我。 |
| 29:45 | 我欲踮佇以色列人的中間，做𪜶的上帝。 |
| 29:46 | 𪜶欲知我是耶和華──𪜶的上帝，是導𪜶出埃及地，通互我踮佇𪜶中間。我是耶和華──𪜶的上帝。」 |
