經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
15:1 | 彼時,摩西及以色列人唱此個歌謳咾耶和華,講:我欲唱歌謳咾耶和華,因為伊至高至大,將馬及騎馬者㧒佇海中。 |
---|---|
15:2 | 耶和華是我的氣力,是我的詩歌,也是做我拯救的主。伊是我的上帝,我欲謳咾伊,是我的父的上帝,我欲尊伊做大。 |
15:3 | 耶和華是戰士;伊的名是耶和華。 |
15:4 | 法老的車、及伊的軍兵,耶和華㧒伊佇海中;伊特別揀的軍長攏沈佇紅海。 |
15:5 | 深淵蓋𪜶;𪜶親像石頭墜到深的所在。 |
15:6 | 耶和華啊,你的正手展出能力,得著榮光;耶和華啊,你的正手拍碎對敵。 |
15:7 | 你發出大威嚴,捙倒許個起來攻擊你者;你發出大受氣,燒毀𪜶親像燒草。 |
15:8 | 你發出鼻中的氣,水就愈淐愈高,大水徛起來親像歸堆,海中的深水堅定。 |
15:9 | 對敵講:我欲追𪜶,我欲趇著𪜶;我欲分所搶的物,我欲佇𪜶來足我的心願。我欲拔刀,我的手欲滅𪜶。 |
15:10 | 你一下歕風,海就蓋密𪜶;𪜶親像鉛沈佇大水中。 |
15:11 | 耶和華啊,諸個上帝的中間,是誰會親像你?是誰親像你──至聖通榮光,威嚴通謳咾,行出奇事? |
15:12 | 你伸出正手,地就吞滅𪜶。 |
15:13 | 你用你的慈愛,導你所救贖的百姓;你用你的權能,導𪜶入你聖的所在。 |
15:14 | 列邦聽見就愕愕惙,徛起佇非利士地的抵著痛苦。 |
15:15 | 彼時,以東的族長卬愕,摩押英雄的人致到愕愕惙,迦南地徛起的百姓心攏消溶。 |
15:16 | 卬愕驚惶到佇𪜶。耶和華啊,因為你的手的大權能,𪜶定定親像石頭,聽候你的百姓經過,聽候你所得著的百姓過去。 |
15:17 | 你欲導𪜶入去,栽培𪜶佇你的產業的山──耶和華啊,就是你為家己所備辦徛起的所在,主啊,就是你的手所建立的聖所。 |
15:18 | 耶和華欲做王,直到永遠! |
15:19 | 因為法老的馬、及伊的車,伊的馬兵到佇海中,耶和華互海水反流,淹密𪜶;獨獨以色列人佇海中行乾地。 |
15:20 | 亞倫的大姊,女先知米利暗,手裡抬鈴瓏鼓;眾婦女也隨伊出去,抬鈴瓏鼓跳舞。 |
15:21 | 米利暗和所唱的講:恁著唱歌謳咾耶和華,因為伊至高至大,將馬及騎馬者㧒佇海中。 |
15:22 | 摩西導以色列人對紅海進前行,𪜶出去到書珥的曠野,佇曠野行三日,尋無水。 |
15:23 | 到瑪拉的時,瑪拉的水𣍐飲得;因為水苦,所以名彼個地叫瑪拉。 |
15:24 | 百姓就對摩西哀怨,講:「阮欲飲甚麼啊?」 |
15:25 | 摩西求叫耶和華,耶和華指示伊一欉樹。伊就㧒伊佇水裡,水就變甘。伊佇遐為𪜶定律例、法度,佇遐試驗𪜶; |
15:26 | 閣講:「你若致意聽耶和華──你的上帝的聲,閣行伊所看做合宜的事,留心聽伊的誡命,守伊一切的律例,就我互埃及人所抵著的破病,的確無互你抵著,因為我──耶和華是醫治你者。」 |
15:27 | 𪜶到以琳,佇遐有十二個水泉,七十欉的棗樹;𪜶就佇遐的水邊紮營。 |