走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 10:1 | 佇該撒利亞有一人，名哥尼流，做「意大利營」的百總。 |
|---|---|
| 10:2 | 伊是敬虔的人，及全家敬畏上帝，多多賑濟百姓，常常祈禱上帝。 |
| 10:3 | 日時，約略三點鐘，佇異象中明明看見上帝的天使入來就近伊，對伊講：「哥尼流。」 |
| 10:4 | 伊注目看，真驚講：「主啊，有啥事？」就給伊講：「你的祈禱，你的賑濟已經上到上帝的面前做記念。 |
| 10:5 | 今你著差人去約帕，請彼個西門稱做彼得的來。 |
| 10:6 | 伊歇佇礬皮師傅西門兜，伊的厝佇海邊。」 |
| 10:7 | 及伊講話的天使已經退去，哥尼流就叫二個奴僕及一個敬虔的兵時常跟隨伊的， |
| 10:8 | 將諸個代誌攏給𪜶講，就差𪜶去約帕。 |
| 10:9 | 隔日，𪜶行路已經近城。約略日中晝，彼得上厝頂祈禱， |
| 10:10 | 真枵，愛食。人抵抵啲備辦頓，彼得的神魂遊佇象外， |
| 10:11 | 就看見天開，有器具降落，親像大幅布，縛四個角頭，墜佇地裡， |
| 10:12 | 內面有地上逐類四腳的獸，蟲𧒴，及天中的飛鳥； |
| 10:13 | 閣有聲對伊講：「彼得起來，刣來食！」 |
| 10:14 | 若是彼得講：「主啊，斷斷呣通！因為凡若粗俗的物及無清氣的，我未曾食。」 |
| 10:15 | 第二擺有聲閣對伊講：「上帝所互伊清氣的，你莫得掠做粗俗。」 |
| 10:16 | 按呢三擺，彼個器具連鞭收上天。 |
| 10:17 | 彼得心內啲躊躇，所看見的異象甚麼意思。抵抵彼霎哥尼流所差來的人有問到西門的厝，徛佇門外， |
| 10:18 | 出聲啲問：「看有西門稱做彼得的歇佇遮抑無？」 |
| 10:19 | 彼得猶啲想異象的時，聖神給伊講：「有三人啲尋你。 |
| 10:20 | 今著起來，落去，及𪜶去，呣免僥疑，因為是我差𪜶。」 |
| 10:21 | 彼得落去見許個人，講：「我就是恁所尋的人，恁來是為著啥事？」 |
| 10:22 | 𪜶就講：「百總哥尼流是義人，閣敬畏上帝，互猶太全國所謳咾。奉聖的天使指示伊，著請你到伊的厝，續聽你的話。」 |
| 10:23 | 彼得就請𪜶入來，留𪜶歇啲。隔日，起身及𪜶去，閣有約帕的兄弟幾若人及伊同行； |
| 10:24 | 閣隔日，入該撒利亞，哥尼流已經聚集伊的親人及好朋友啲聽候𪜶。 |
| 10:25 | 彼得抵仔入去的時，哥尼流迎接伊，仆佇伊的腳前，來拜伊。 |
| 10:26 | 總是彼得牽伊起來，講：「起來，我家己也是人。」 |
| 10:27 | 及伊講話就入去，看見多多人聚集， |
| 10:28 | 就對𪜶講：「恁知，猶太人及別族的人親近抑是來往本是無合例，若是上帝已經指示我，無論甚麼人呣通講伊做粗俗無清氣。 |
| 10:29 | 所以我受請，無推辭就來。今問：恁請我甚麼意思？」 |
| 10:30 | 哥尼流講：「四日前，此個時，我佇厝內下晡三點鐘啲祈禱，就忽然有一人衣裳光映映，徛佇我的面前，講： |
| 10:31 | 『哥尼流，佇上帝的面前你的祈禱已經聽見，你的賑濟已經得著記念。 |
| 10:32 | 今著差人到約帕，請西門稱做彼得的來，伊𫢶佇海邊礬皮師傅西門的厝。』 |
| 10:33 | 所以我連鞭差人到你遐。你來真好；今阮攏佇上帝的面前，愛欲聽主所命令你攏總的話。」 |
| 10:34 | 彼得開嘴講：「今我真正知上帝無用外貌取人。 |
| 10:35 | 獨獨佇逐邦國見有敬畏伊、來行義的人互伊歡喜接納。 |
| 10:36 | 上帝所寄互以色列子孫的話，對耶穌基督來傳和平的福音（伊是萬有的主）。 |
| 10:37 | 此個消息恁知是佇約翰所傳的洗禮以後，對加利利起，到遍猶太。 |
| 10:38 | 就是拿撒勒人耶穌，上帝有怎樣用聖神及才能抹伊。伊就四界行，做好事，醫好見若魔鬼所壓制的，因為上帝及伊佇啲。 |
| 10:39 | 見若伊佇猶太人的地方及耶路撒冷所行的，阮做干證。人就吊伊佇柴裡來害死伊。 |
| 10:40 | 到第三日，上帝互伊復活，續出現； |
| 10:41 | 呣是互眾百姓看，是互上帝代先所揀選為著伊做干證的人看，就是阮諸個佇伊對死人中復活的了後及伊相及飲食的人。 |
| 10:42 | 伊閣命令阮傳互百姓，干證此個是上帝所立定，做活人、死人的審判司。 |
| 10:43 | 眾先知亦為著伊做干證：『就是凡若信伊的人，對伊的名得著罪赦。』」 |
| 10:44 | 彼得猶久啲講諸個話的時，聖神降臨佇見若聽道理的人。 |
| 10:45 | 奉割禮的信徒，及彼得相及來的，因為聖神的賞賜亦降落佇外邦人，就攏奇怪； |
| 10:46 | 因為聽見𪜶用諸個腔口啲講，閣謳咾上帝做大。 |
| 10:47 | 彼得就應講：「諸個人已經受著聖神，親像咱一樣，是誰會禁得用水給𪜶行洗禮啊？」 |
| 10:48 | 就命令𪜶佇耶穌基督的名受洗禮。對按呢請伊住幾若日。 |
