走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 13:1 | 佇安提阿佇教會中，有先知及教師幾若人，就是巴拿巴及稱做尼結的西面、古利奈人路求，及分封的人君希律同培養的馬念，以及掃羅。 |
|---|---|
| 13:2 | 𪜶服事主、禁食的時，聖神講：「著給我分派巴拿巴、掃羅，來成我召𪜶去擔當的工。」 |
| 13:3 | 對按呢禁食祈禱，用手按𪜶，就差𪜶去。 |
| 13:4 | 𪜶已經奉聖神所差，落去西流基，對遐搭船去居比路。 |
| 13:5 | 佇撒拉米，傳上帝的道理佇猶太人諸個會堂，亦有約翰做𪜶的幫手。 |
| 13:6 | 行過通海嶼，到帕弗，抵著一個行邪術、做假先知的猶太人，名巴耶穌。 |
| 13:7 | 彼人常常及總督士求保羅相及𫢶。總督是聰明的人，伊召巴拿巴、掃羅來，愛聽上帝的道理。 |
| 13:8 | 獨獨彼個行邪術的以呂馬（伊的名翻譯就是行邪術的）抵敵𪜶二人，愛引誘總督互伊無信。 |
| 13:9 | 若是掃羅亦名保羅，互聖神充滿，注目看伊，講： |
| 13:10 | 「嗐啊！你充滿眾項詭譎及奸惡的，魔鬼的子，眾項義的對敵，你混亂主諸個正路猶呣息嗎？ |
| 13:11 | 今你看，主的手佇你的身上，你欲睛暝，暫時𣍐看見日。」伊的目睭連鞭煙暈黑暗，四界求人牽伊。 |
| 13:12 | 總督看見所做的事，就信，大奇怪主的教示。 |
| 13:13 | 保羅及同伴對帕弗開船，到旁非利亞的別加，約翰離開𪜶，倒去耶路撒冷。 |
| 13:14 | 𪜶就對別加行，過去到彼西底的安提阿，當安息日入會堂坐啲。 |
| 13:15 | 律法及先知的冊讀明白，許個管會堂的，差人就近𪜶，講：「兄弟啊，恁若有苦勸百姓的話，請講。」 |
| 13:16 | 保羅起來徛，搖手，講：「列位以色列人及敬畏上帝的，請聽。 |
| 13:17 | 此個以色列百姓的上帝揀咱的列祖，當百姓出外佇埃及地的時給𪜶升高，抬起手導𪜶出遐； |
| 13:18 | 閣佇曠野吞愞寬容𪜶，約略四十年久。 |
| 13:19 | 已經滅迦南地七族的人，就將彼個土地分互𪜶做業； |
| 13:20 | 約略有四百五十年，諸個代誌了後，用士師互𪜶，到佇先知撒母耳。 |
| 13:21 | 以後百姓求一個王，上帝就將便雅憫支派的人基士的子掃羅互𪜶，歷過四十年久。 |
| 13:22 | 已經廢伊，就舉大衛做𪜶的王，干證伊講：『我得著耶西的子大衛，伊是合我的心，凡事欲遵趁我的旨意。』 |
| 13:23 | 對此人的後裔，上帝照所應允的，給以色列人立一個救主，就是耶穌。 |
| 13:24 | 當伊未出頭的時，約翰代先用反悔的洗禮宣傳佇以色列的眾百姓。 |
| 13:25 | 約翰啲欲盡伊的路站的時講：『恁拍算我是是誰？我呣是基督；有路尾我來的，我解伊的鞋帶亦𣍐堪得。』 |
| 13:26 | 「兄弟啊，亞伯拉罕的後裔及恁中間敬畏上帝的人，此個拯救的道已經傳到佇咱啦。 |
| 13:27 | 因為徛起佇耶路撒冷的人及𪜶的官府，呣識伊，亦呣識逐個安息日所讀先知的話，才擬定伊，抵抵是應驗諸個話； |
| 13:28 | 雖然查伊無死罪，猶久求彼拉多刣伊； |
| 13:29 | 凡若所記載指伊的話已經應驗，就對柴裡收伊落來，下佇墓內。 |
| 13:30 | 獨獨上帝對死人中互伊復活。 |
| 13:31 | 伊多多日互許個對加利利及伊上耶路撒冷的人看見，今𪜶有對百姓做伊的干證。 |
| 13:32 | 閣阮報恁好消息，就是早所應允列祖的， |
| 13:33 | 今上帝有給咱的子孫應驗伊，因為伊有互耶穌復活。亦親像詩篇第二篇記載講：你就是我的子，我今仔日生你。 |
| 13:34 | 論到伊互伊對死人中復活，無閣歸佇朽爛，有按呢講：我欲用大衛聖、閣實在的恩惠互你。 |
| 13:35 | 閣別篇亦有講：你無欲互你的聖者抵著朽爛。 |
| 13:36 | 「因為大衛佇伊的世代遵趁上帝的旨意，就去睏，及伊的列祖相及下啲，來抵著朽爛； |
| 13:37 | 獨獨上帝所互伊復活的，無抵著朽爛。 |
| 13:38 | 兄弟啊，按呢恁著知；對此人才有赦罪的道理傳互恁。 |
| 13:39 | 恁靠摩西的律法，所𣍐得著稱做義的事，見若靠此人，就一切得著稱做義。 |
| 13:40 | 所以，著謹慎，驚了先知的話到佇恁。 |
| 13:41 | 伊的話講：藐視的人啊，恁著看，來卬愕，來滅無；因為當恁的時日，我行一項事，就是雖然有人給恁講，恁也呣信的。」 |
| 13:42 | 𪜶出去的時，有人求𪜶佇後個安息日用諸個話閣給𪜶講。 |
| 13:43 | 會眾已經四散，猶太人及入𪜶的教敬虔的人，多多隨保羅、巴拿巴。𪜶及𪜶講話，勸𪜶長長𫢶上帝的恩。 |
| 13:44 | 後安息日，通城的人差不多攏聚集，來聽上帝的道理。 |
| 13:45 | 若是猶太人看見人許多，就滿心怨妒，辯駁保羅所講的，續謗瀆𪜶。 |
| 13:46 | 保羅、巴拿巴好膽講：「上帝的道理代先對恁講是應該；若是恁已經棄拺伊，擬斷家己𣍐堪得受著永活，今阮諸個欲轉向外邦人啦。 |
| 13:47 | 因為主曾按呢命令阮講：我已經設立你做外邦的光，互你做拯救的到佇地極。」 |
| 13:48 | 外邦人聽了，就歡喜，謳咾上帝的道理；凡若受定著欲得著永活的人攏信。 |
| 13:49 | 對按呢主的道理遍傳佇彼個地方。 |
| 13:50 | 獨獨猶太人催迫敬虔、尊貴的婦仁人及城內的頭人，生事窘迫保羅、巴拿巴，將𪜶趕出境外。 |
| 13:51 | 若是𪜶對眾人拂去腳的土粉，就去以哥念， |
| 13:52 | 學生滿心歡喜，閣互聖神充滿。 |
