走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 26:1 | 亞基帕對保羅講： |
|---|---|
| 26:2 | 「准你家己排列。」保羅就抬起手分訴，講：「亞基帕王啊，我互猶太人所告的，今仔日欲攏分訴佇你的面前，是真該哉； |
| 26:3 | 閣卡該哉的，是因為猶太人的規例及𪜶的辯論你攏知；所以求你寬容聽我。 |
| 26:4 | 我對起頭佇我的百姓的中間，及佇耶路撒冷，對少年做人怎樣，猶太人攏知。 |
| 26:5 | 𪜶對起頭識我，設使肯做干證，就知我照咱教中極嚴的派做法利賽人。 |
| 26:6 | 現在我徛佇遮來受審判，就是因為向望上帝對咱的列祖所應允的； |
| 26:7 | 咱十二支派，日暝殷勤服事，亦是向望到佇此個。王啊，我為著此個向望，才互猶太人告。 |
| 26:8 | 上帝若互死人復活，恁怎樣掠做𣍐信得啊？ |
| 26:9 | 前我家己拍算著用多多項來攻擊拿撒勒耶穌的名， |
| 26:10 | 佇耶路撒冷果然曾按呢行。已經受著諸個祭司頭的權，將多多聖徒關佇監裡。𪜶受刣死，我亦擬有份。 |
| 26:11 | 閣佇逐個會堂，我沓沓刑罰啲強迫𪜶講謗瀆的話，攻擊𪜶愈雄，到外位的城亦窘逐𪜶。」 |
| 26:12 | 「彼霎，我去大馬色的時，有得著諸個祭司頭的權及命令。 |
| 26:13 | 王啊，我佇路上，日中晝的時，看見對天有光，贏過日的燦爛，圍纍照我及同行的人。 |
| 26:14 | 阮攏倒佇地裡，我聽見有聲用希伯來的腔口對我講：『掃羅！掃羅！你啥事窘逐我？你用腳踢莿是艱苦！』 |
| 26:15 | 我講：『主啊，你是是誰？』主講：『我就是你所窘逐的耶穌。 |
| 26:16 | 總是你著起來徛，因為我刁持對你出現，欲設立你做差用，做干證的，佇你所看見我及我所欲出現互你看的事。 |
| 26:17 | 救你出此個百姓及外邦人的手，就是現今差你就近𪜶的。 |
| 26:18 | 來開𪜶的目睭，互𪜶對暗越轉到佇光，離開撒但的權勢來歸向上帝；對信，我來得著赦罪，閣得著基業佇成聖者的中間。』」 |
| 26:19 | 「亞基帕王啊，所以我無違逆對天所顯現的； |
| 26:20 | 就代先佇大馬色，後來佇耶路撒冷及猶太的全地，以及外邦，勸人著反悔來歸向上帝，行代誌及反悔相合。 |
| 26:21 | 因為按呢，猶太人佇殿裡掠我，欲刣我。 |
| 26:22 | 若是我得著上帝的庇佑，到今仔日猶佇啲，對大到細做干證；所講的無呣是諸個先知及摩西所講欲到的事， |
| 26:23 | 就是基督怎樣著受苦，閣怎樣做頭用死人復活的事，來傳報光明互此個百姓及外邦。」 |
| 26:24 | 保羅按呢分訴，非斯都大聲講：「保羅，你啲狂啦。你的多多學問互你變做狂！」 |
| 26:25 | 保羅講：「非斯都大人，我呣是狂，我是講真實端正的話。 |
| 26:26 | 因為王知諸個事，我亦好膽對伊講，是諸個事我深信無一項隱密佇王，因為這呣是行佇偏僻的所在。 |
| 26:27 | 亞基帕王啊，你信諸個先知嗎？我知你信。」 |
| 26:28 | 亞基帕對保羅講：「你想用小可苦勸，欲互我做基督徒啊！」 |
| 26:29 | 保羅講：「我求上帝，無論用小可抑是大，呣若互你，亦互今仔日見若聽我講的，攏及我一樣，獨獨無諸個鎖鍊。」 |
| 26:30 | 王及總督及百尼基以及同坐的人攏起來， |
| 26:31 | 退去相及談論，講：「此人所做無應該死應該縳的事。」 |
| 26:32 | 亞基帕給非斯都講：「此人若未有對該撒告御狀，就通放伊。」 |
