走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 5:1 | 若是有一人，名亞拿尼亞，及伊的某撒非喇賣伊的產業，將所賣的銀，暗靜留幾若份，伊的某亦知， |
|---|---|
| 5:2 | 其餘的帶來下佇使徒的腳下。 |
| 5:3 | 彼得講：「亞拿尼亞！啥事撒但充滿你的心，來騙聖神，將賣園的銀暗靜留幾若份？ |
| 5:4 | 園猶未賣，豈呣是你的？賣了，彼個銀豈呣是你主意？你心內啥事想出此個代誌啊？你呣是騙人，就是騙上帝。」 |
| 5:5 | 亞拿尼亞聽見諸個話，就慄落去，斷氣；聽見的人攏大驚。 |
| 5:6 | 諸個少年人起來，收拾伊的身屍，扛出去埋葬。 |
| 5:7 | 約略過三點鐘久，伊的某亦入來，猶未知此個事。 |
| 5:8 | 彼得應伊講：「你給我講，恁賣園的價錢是即多嗎？」講：「著，是即多。」 |
| 5:9 | 若是彼得對伊講：「恁啥事同心來試主的神啊？你看，埋葬你的丈夫的，𪜶的腳已經到門口，亦欲扛你出去。」 |
| 5:10 | 婦仁人即時慄佇伊的腳前，斷氣。許個少年人入來，看伊已經死，就扛伊出去，埋葬佇伊丈夫的身邊。 |
| 5:11 | 全教會及見若聽見諸個代誌的攏大驚。 |
| 5:12 | 對使徒的手有行多多神蹟及奇事佇百姓的中間；眾人攏同心聚集佇所羅門的兩廊。 |
| 5:13 | 其餘的人無一個敢近倚𪜶，若是百姓尊重𪜶。 |
| 5:14 | 信來歸主的人益發加添，男女攏真多。 |
| 5:15 | 甚至有扛病人到佇街路，下佇舖仔，向望彼得經過的時，𪜶有的會互伊的影蔭著。 |
| 5:16 | 猶有多多人對耶路撒冷四圍的城來，導病人及互邪神所苦楚的，𪜶攏得著醫好。 |
| 5:17 | 獨獨祭司頭以及攏總同伊的人，就是撒都該黨，徛起來，滿心怨妒， |
| 5:18 | 下手掠使徒，關𪜶佇公的監。 |
| 5:19 | 若是主的天使暝時開監門，導𪜶出， |
| 5:20 | 講：「恁著去徛佇殿裡，用此個活命的話攏對百姓講。」 |
| 5:21 | 𪜶聽見諸個話，天昲光就入殿來教示。祭司頭及同伊的人到，招集公會及以色列百姓的老大，差人去監裡帶𪜶來。 |
| 5:22 | 衙役到地，尋𪜶無佇監裡，就倒來報講： |
| 5:23 | 「阮看見監關到真堅固，顧守的人徛佇逐個門口；到開的時，尋無人佇內面。」 |
| 5:24 | 殿司及諸個祭司頭聽見諸個話，就為著𪜶大躊躇，呣知此個事欲怎樣。 |
| 5:25 | 有一人來報𪜶講：「恁所關佇監裡的人，現在徛佇殿裡教示百姓。」 |
| 5:26 | 殿司及衙役就去導𪜶來，呣敢用強，因為驚百姓，驚了互𪜶用石頭擲。 |
| 5:27 | 導來了，就互𪜶徛佇公會的面前；祭司頭問𪜶，講： |
| 5:28 | 「阮曾嚴嚴禁恁，莫得用此個名教示人，恁就將恁的教示遍傳佇耶路撒冷，欲用此人的血歸佇阮！」 |
| 5:29 | 彼得及其餘的使徒應講：「順趁上帝卡過頭佇順趁人，是合宜。 |
| 5:30 | 恁所吊佇柴裡來害死的耶穌，咱列祖的上帝已經互伊復活。 |
| 5:31 | 此個耶穌，上帝用家己的正手舉起伊，做人君，做救主，欲將反悔及赦罪賞賜以色列百姓。 |
| 5:32 | 閣阮為著諸個事做干證，上帝所賞賜互順趁伊的人的聖神也做干證。」 |
| 5:33 | 𪜶聽了盡在受氣，愛害死𪜶。 |
| 5:34 | 獨獨有一個法利賽人，名迦瑪列，是眾百姓所敬重的教法師，起來徛佇公會中，吩咐互許個人暫時出去， |
| 5:35 | 就對大家講：「以色列人啊，恁著家己謹慎，欲怎樣辦諸個人。 |
| 5:36 | 因為前有丟大出頭，家己誇口做大，倚伊的人約略四百，伊受刣，隨伊的人四散，無囉去。 |
| 5:37 | 此人以後，造家甲的時，閣有加利利的猶大出頭，引誘百姓趁伊；伊也滅無，隨伊的人攏四散。 |
| 5:38 | 今我給恁講，莫得插諸個人，放據在𪜶！因為此個計謀、此個所做，若出佇人，的確欲敗壞； |
| 5:39 | 若出佇上帝，恁就𣍐敗壞𪜶，閣驚了恁也是及上帝交戰。」 |
| 5:40 | 𪜶就趁伊，召使徒來，拍𪜶，命令𪜶莫得用耶穌的名來講，就放𪜶。 |
| 5:41 | 使徒離開公會前，攏歡喜，是因為𪜶得著看做會堪得為著此個名受凌辱。 |
| 5:42 | 就佇殿裡、佇人家教示人，傳耶穌做基督，逐日無息。 |
