走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 27:1 | 已經定著意思，互阮過海去意大利，就將保羅及另外幾若個犯人交互西巴斯督營的百總，名猶流。 |
|---|---|
| 27:2 | 有亞大米田的船，欲行到亞西亞海墘幾若所在，阮就搭伊起身；有馬其頓的帖撒羅尼迦人亞里達古及阮去。 |
| 27:3 | 隔日，到西頓；猶流好款待保羅，准伊就近諸個朋友，受𪜶的照應。 |
| 27:4 | 對遐開船，因為對頭風的緣故，就對居比路下勢經過。 |
| 27:5 | 已經過基利家、旁非利亞的海，到呂家的每拉。 |
| 27:6 | 佇遐，百總抵著亞歷山大的船，欲去意大利的，就教阮搭伊。 |
| 27:7 | 行真慢，多多日才僅仔到革尼土對面。因為風阻擋，就閃革哩底下，對撒摩尼過。 |
| 27:8 | 僅僅仔會通沿岸，行到一所在，名佳澳；近遮有拉西亞的城。 |
| 27:9 | 歷過多多日，禁食的期已經過，行船危險，保羅勸𪜶講： |
| 27:10 | 「大家啊，我看此擺行船，呣若貨物及船，連咱的生命亦欲受害及大損失。」 |
| 27:11 | 若是百總信舵公及船主，卡過頭佇保羅所講的。 |
| 27:12 | 閣佇此個垵澳過冬天呣利便，大半的人，想愛開船離開遮，看會通到非尼基過冬天。彼位就是革哩底一個垵澳，一面向東南，一面向東北。 |
| 27:13 | 此時，南風微微仔來，眾人掠做得意，就起碇，倚革哩底岸來行。 |
| 27:14 | 無偌久，狂風對海嶼頂拍落來；彼個風名「友拉居崙」。 |
| 27:15 | 船互風掃，接載𣍐住，就出在伊漂流。 |
| 27:16 | 駛到小海嶼下，名叫高大，僅僅會收舢舨起來。 |
| 27:17 | 舢舨已經收起來，就用方法捆縳船底，閣驚了靠著賽耳底的沙汕就落帆，互風押去。 |
| 27:18 | 阮互風湧大搖簸，隔日𪜶就用貨物㧒落海。 |
| 27:19 | 第三日，閣親手㧒kak船裡的器具。 |
| 27:20 | 日及星多多日無出現，閣互風湧拍不止殄，阮得救的向望就攏無啦。 |
| 27:21 | 眾人久久無食，保羅徛佇𪜶中間，講：「大家啊，恁前著聽我的話，莫得開船離開革哩底，來抵著此號傷害及損失。 |
| 27:22 | 今我勸恁安心，因為恁中間無一人會失落生命，獨獨失落船若定。 |
| 27:23 | 因為我所屬所服事的上帝，伊的天使昨暝徛佇我身邊，講： |
| 27:24 | 『保羅，呣免驚；你的確著徛佇該撒的面前，看啊！上帝用船內的人攏總賞賜你。』 |
| 27:25 | 所以，大家啊，恁著安心，因為我信上帝，代誌啲欲照伊所給我講的。 |
| 27:26 | 若是咱諸個的確靠佇一個海嶼。」 |
| 27:27 | 到第十四暝，阮漂流佇亞底亞海。約略半暝，水手掠做近山， |
| 27:28 | 拍水鉈，得著二十尋；略略仔進前，閣拍水鉈，得著十五尋。 |
| 27:29 | 驚了犁著石，就佇船尾拋四弓碇，切切向望天光。 |
| 27:30 | 水手愛欲離開船逃走，放舢舨落海，假做欲對船頭拋碇。 |
| 27:31 | 保羅對百總及兵丁講：「諸個人無𫢶佇船裡，恁𣍐會得救。」 |
| 27:32 | 兵丁就斬斷舢舨的索，出在伊家己墜落。 |
| 27:33 | 到天欲光，保羅勸眾人著食，講：「恁大家啲瞭望，愞枵（餓），呣成食，今仔日是第十四日啦。 |
| 27:34 | 所以勸恁著食，這是關係恁的得救；因為恁無一人會失落一支頭毛。」 |
| 27:35 | 講息，提餅，當眾人的面前感謝上帝，擘破來食。 |
| 27:36 | 對按呢眾人攏安心，亦逐個食。 |
| 27:37 | 阮佇船裡的計共二百七十六人。 |
| 27:38 | 已經食飽，㧒麥落海，互船卡輕。 |
| 27:39 | 到天光，呣識彼個所在，獨獨看見一個海灣，有沙坡，就相及計謀看會互船犁上頂面抑𣍐。 |
| 27:40 | 就棄拺諸個碇，放佇海裡；也解開吊船舵的索起頭帆，互伊食風向沙坡進前。 |
| 27:41 | 抵著雙夾流的位，船就靠淺；船頭咬住𣍐振動，船尾互大湧摔破。 |
| 27:42 | 兵丁的意思欲刣諸個犯人，驚了有的泅走。 |
| 27:43 | 獨獨百總愛救保羅，阻擋𪜶所計謀，命令會泅的人，代先落水上山； |
| 27:44 | 其餘的人有的用板，有的用船內的物。對按呢，眾人攏得救上山。 |
