走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 17:1 | 非利士人聚集𪜶的軍兵，欲交戰；聚集佇屬猶大的梭哥，紮營佇以弗大憫，佇梭哥及亞西加的中間。 |
|---|---|
| 17:2 | 掃羅及以色列人也聚集，紮營佇以拉的山谷，排隊伍，抵敵非利士人。 |
| 17:3 | 非利士人徛佇此旁的山，以色列人徛佇彼旁的山，中間有山谷。 |
| 17:4 | 對非利士的營中有一個戰將出來，名叫歌利亞，是迦特人，身軀高六肘閣一徛； |
| 17:5 | 頭戴銅盔，身穿有鱗的戰甲，伊的戰甲的銅有五千舍客勒的重； |
| 17:6 | 大腿穿銅裙，肩頭中背銅的戟； |
| 17:7 | 槍柄大親像布機的軸心，槍尾的鐵有六百舍客勒的重。有一個涫盾牌的行佇伊的頭前。 |
| 17:8 | 伊徛啲對以色列的軍隊喝，給𪜶講：「恁出來排隊伍欲啥事啊？我豈呣是非利士人，恁豈呣是掃羅的奴僕嗎？恁中間揀一人，互伊落來我遮。 |
| 17:9 | 伊若會及我相刣，刣死我，阮就欲做恁的奴才；我若卡贏伊，刣死伊，恁就欲做阮的奴才，服事阮。」 |
| 17:10 | 彼個非利士人閣講：「我今仔日藐視以色列諸個軍隊。恁叫一人出來，及我相刣。」 |
| 17:11 | 掃羅及以色列眾人聽見非利士人諸個話，就真愞，真驚。 |
| 17:12 | 大衛是猶大、伯利恆的以法他人耶西的子。耶西有八個子。當掃羅的時，耶西年歲多佇人的中間算是老人。 |
| 17:13 | 耶西許個子三個卡序大的隨掃羅去出征。去出征彼三個子：大的名以利押，第二亞比拿達，第三個沙瑪。 |
| 17:14 | 大衛是第一細的；彼三個卡序大的跟隨掃羅。 |
| 17:15 | 大衛往來佇掃羅的所在，佇伯利恆飼伊的老父的羊。 |
| 17:16 | 彼個非利士人早暗出來徛啲展，歷過四十日。 |
| 17:17 | 耶西給伊的子大衛講：「你著給你許個兄帶烘的五穀一伊法及此十個餅，緊緊去軍營，互你許個兄； |
| 17:18 | 閣帶此十個牛奶餅，送互𪜶的千總，閣問你的兄平安無，帶伊的證據來。」 |
| 17:19 | 掃羅及大衛三個兄及以色列眾人，佇以拉的山谷及非利士人交戰。 |
| 17:20 | 大衛透早起來，用羊群放交一個顧守的人，照耶西所命令伊的，帶食物去。到排列車的所在，軍兵抵仔出去到戰場，喝欲交戰。 |
| 17:21 | 以色列人及非利士人攏排列隊伍，兩旁的軍隊相對。 |
| 17:22 | 大衛用物件交代顧物件的人的手，走到戰場，請安伊的兄。 |
| 17:23 | 及𪜶講話的時，看啊，彼個戰將，就是迦特的非利士人，名歌利亞，對非利士的隊伍出來，照前所講的來講；大衛聽見。 |
| 17:24 | 以色列眾人看見彼人，就走閃伊，盡在驚。 |
| 17:25 | 以色列人講：「此個上來的人，你有看見嗎？伊上來是欲藐視以色列。若有人會刣死伊，王欲互伊大好額，將伊的查某子嫁伊，閣互伊老父一家佇以色列中免納稅當差。」 |
| 17:26 | 大衛問徛佇伊身邊許個人：「有人刣死此個非利士人，洗除以色列的見誚，欲怎樣款待伊啊？此個無受割禮的非利士人是是誰？敢藐視永活上帝的軍隊嗎？」 |
| 17:27 | 百姓照前的話應伊講：「若有人會刣死此人，欲按呢款待伊。」 |
| 17:28 | 大衛的大兄以利押聽見伊及人啲講話，以利押受氣大衛，講：「你啥事落來遮？彼幾隻羊佇曠野裡，你放交是誰啊？我知你驕傲及你心內的歹，你落來不過是欲看交戰！」 |
| 17:29 | 大衛講：「我有做甚麼？豈是無因端嗎？」 |
| 17:30 | 大衛就離開伊去向別人，照前的話啲問；百姓照前的話來應伊。 |
| 17:31 | 大衛所講的話已經互人聽見，𪜶就講佇掃羅的面前；掃羅就差人叫伊來。 |
| 17:32 | 大衛給掃羅講：「人呣免為著彼人來失膽。你的奴僕欲去及彼個非利士人交戰。」 |
| 17:33 | 掃羅對大衛講：「你𣍐會去抵敵此個非利士人及伊交戰；因為你的年歲猶久少，伊對少年就學習戰事。」 |
| 17:34 | 大衛給掃羅講：「你的奴僕給老父顧羊的時，有獅抑是熊來，對羊群中咬羊仔去。 |
| 17:35 | 我就趇伊，拍伊，救羊仔出伊的嘴。伊起來欲共我，我就搝伊的嘴下斗，拍死伊。 |
| 17:36 | 你的奴僕曾拍死獅及熊，此個無受割禮的非利士人，也欲親像𪜶的一隻，因為伊藐視永活上帝的軍隊。」 |
| 17:37 | 大衛閣講：「耶和華救我脫離獅的爪及熊的爪，伊也欲救我脫離此個非利士人的手。」掃羅給大衛講：「你去啊，耶和華欲及你佇啲。」 |
| 17:38 | 掃羅就用伊的軍服互大衛穿，用銅的頭盔互伊戴，閣互伊穿戰甲。 |
| 17:39 | 大衛用刀縖佇軍服，試行看唧；因為呣曾穿著，大衛給掃羅講：「穿諸個我行𣍐去，因為呣曾穿著。」 |
| 17:40 | 大衛就褪起來。伊手抬枴仔，閣佇山坑仔揀五塊光滑的石卵，下佇袋仔，就是顧羊的人所帶的囊；手提甩石的索仔，就行倚彼個非利士人。 |
| 17:41 | 彼個非利士人也愈行倚大衛，捾牌的行佇伊的頭前。 |
| 17:42 | 彼個非利士人抬起來看，看見大衛，就看輕伊；因為伊少歲，色緻赤，面貌好看。 |
| 17:43 | 彼個非利士人給大衛講：「我豈是狗嗎，你才抬枴仔來我遮？」非利士人就指家己的上帝咒詛大衛。 |
| 17:44 | 彼個非利士人閣給大衛講：「你來我遮，我欲用你的肉互空中的飛鳥及田野的野獸。」 |
| 17:45 | 大衛對彼個非利士人講：「你來倚近我，是用刀用槍用戟；我來倚近你，是用萬軍耶和華的名，以色列軍隊的上帝就是你所藐視者。 |
| 17:46 | 今仔日耶和華欲將你交佇我的手。我欲拍死你，刣你的頭殼，今仔日我欲將非利士軍兵的身屍互空中的飛鳥、地上的野獸，互普天下的人攏知以色列有上帝； |
| 17:47 | 閣互諸個歸群的人知耶和華救人，呣是用刀也呣是用槍，因為交戰的事在佇耶和華。伊欲將恁交佇阮的手。」 |
| 17:48 | 彼個非利士人起來，進前近倚欲接大衛。大衛也趕緊走去，向軍隊欲接非利士人。 |
| 17:49 | 大衛伸手入袋仔內提一塊石仔出來，用索甩去，射著非利士人的頭額，石仔沈入頭額，伊就倒落去，面仆佇地裡。 |
| 17:50 | 按呢，大衛用甩索及石仔，卡贏非利士人，拍死伊；總是大衛的手無刀。 |
| 17:51 | 大衛緊緊走去，徛佇彼個非利士人的頂面，將伊的刀拔出鞘，用彼支刣死伊，斬伊的頭殼。非利士眾人看見𪜶的勇士已經死，就走。 |
| 17:52 | 以色列人及猶大人就起來喝喊，追趇非利士人，到迦特及以革倫的城門。著傷的非利士人倒佇沙拉音的路，直到迦特及以革倫。 |
| 17:53 | 以色列人追趇非利士人倒轉來，就搶𪜶的營盤。 |
| 17:54 | 大衛將彼個非利士人的頭殼帶到耶路撒冷，閣用伊的軍器下佇家己的布棚。 |
| 17:55 | 掃羅看見大衛去拍非利士人的時，就問軍長押尼珥講：「押尼珥啊，彼個少年人是是誰的子？」押尼珥講：「我指王的活命來咒誓，我呣知。」 |
| 17:56 | 王講：「你去問看彼個囝仔是是誰的子。」 |
| 17:57 | 大衛拍死非利士人倒來，押尼珥導伊來掃羅的面前，伊的手裡有非利士人的頭殼。 |
| 17:58 | 掃羅問伊講：「少年人啊，你是甚麼人的子？」大衛講：「我是你的奴僕伯利恆人耶西的子。」 |
