走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 20:1 | 大衛對拉瑪的拿約逃走，到約拿單的面前，講：「我做甚麼？我有甚麼歹？佇你的老父的面前有甚麼罪，伊竟然啲數想我的生命嗎？」 |
|---|---|
| 20:2 | 約拿單給伊講：「決斷呣是！你𣍐到死。我的老父做代誌，無論大細，無一項無互我知。我的老父豈干單隱瞞我此項事嗎？決斷無按呢。」 |
| 20:3 | 大衛閣咒誓講：「你的老父準準知我佇你的面前得著恩典。伊的心講，呣通互約拿單知，驚了伊會憂悶。我指耶和華的永活，及你的活命來咒誓，我離開死只有一步若定。」 |
| 20:4 | 約拿單給大衛講：「你的心所愛，我欲給你做。」 |
| 20:5 | 大衛給約拿單講：「明仔日是初一，我應該著及王坐桌，求你容允我去匿佇田裡，到第三日下昏。 |
| 20:6 | 你的老父若看我無佇啲，你就講：『大衛切切求我准伊倒去本城伯利恆，因為伊通家佇遐獻年祭。』 |
| 20:7 | 伊若講好啦，就你的奴僕有平安；伊若發受氣，就知伊決意欲害我。 |
| 20:8 | 今你著施恩互你的奴僕，因為你前有互你的奴僕及你指耶和華來結約。我若有罪，請你本身刣我，啥事帶我到你的老父遐？」 |
| 20:9 | 約拿單講：「決斷無對你按呢行！因為我若真知我的老父決意欲害你，我豈無給你講嗎？」 |
| 20:10 | 大衛給約拿單講：「你的老父若用歹聲嗽應你，是誰欲來給我講啊？」 |
| 20:11 | 約拿單給大衛講：「來啦，咱出來去田裡。」二人就出去田裡。 |
| 20:12 | 約拿單給大衛講：「願耶和華──以色列的上帝做干證。明仔日此時，抑是第三日，我探看我的老父，若有好意思向大衛，我豈無差人給你講嗎？ |
| 20:13 | 我的老父若有意思害你，我欲給你講互你平安去，若無，願耶和華加倍責罰約拿單。願耶和華及你佇啲，親像伊曾及我的老父佇啲一樣。 |
| 20:14 | 呣若我活啲的時你著對我顯明耶和華的慈愛，免得我死無， |
| 20:15 | 就耶和華對地上一盡剪除大衛的對敵的時，你也永遠呣通對我的家，絕斷你的恩惠。」 |
| 20:16 | 約拿單就及大衛的家結約：講：「願耶和華對大衛諸個對敵的手來討伊。」 |
| 20:17 | 約拿單因為疼大衛，就教伊閣咒誓，因為伊疼伊親像疼家己的生命。 |
| 20:18 | 約拿單給伊講：「明仔日是月的初一，你的位放空，欲講你無佇啲。 |
| 20:19 | 等到三日，你著緊緊落去，到你前抵著代誌所匿的所在，佇以色的石磐遐聽候。 |
| 20:20 | 我欲射三支箭佇石盤邊，那親像考靶一樣。 |
| 20:21 | 我欲差一個囝仔，講：『你去尋許個箭』我若給囝仔講：『看啊，箭佇你此旁著拾伊』，你就通倒來；我指活的耶和華來咒誓，你有平安無害。 |
| 20:22 | 我若給囝仔講：『看啊，箭佇你彼旁』你就著去，因為是耶和華差你去。 |
| 20:23 | 論到你我今仔日所講的，有耶和華佇你我的中間，直到永遠。」 |
| 20:24 | 大衛就去匿佇田裡。到初一日，王坐桌得欲食。 |
| 20:25 | 王照常坐伊的位，就是倚佇壁裡的位，約拿單啲徛，押尼珥坐佇掃羅的身邊，大衛的位放空。 |
| 20:26 | 總是此日掃羅無講甚麼，伊拍算大衛抵著代誌，無清氣，伊的確是無清氣。 |
| 20:27 | 隔日，就是彼月的初二，大衛的位猶原放空。掃羅問伊的子約拿單講：「耶西的子怎樣昨仔日、今仔日無來食？」 |
| 20:28 | 約拿單應掃羅講：「大衛切切求我准伊去伯利恆。 |
| 20:29 | 伊講：『求你准我去，因為阮兜佇城內有祭祀；我的兄吩咐我去。今我若佇你的目睭前得著恩典，求你准去見我許個兄』；所以伊無來及王坐桌。」 |
| 20:30 | 掃羅對約拿單發受氣，給伊講：「你此個硬心悖逆的婦仁人的子，我豈呣知你揀耶西的子，家己取凌辱，致到你的老母抵著褪裼的凌辱嗎？ |
| 20:31 | 因為耶西的子活佇地上的時，你及你的國的確𣍐堅固。今著差人去，掠伊到我遮；伊的確著死。」 |
| 20:32 | 約拿單應伊的老父掃羅對伊講：「伊啥事著死啊？伊有做甚麼啊？」 |
| 20:33 | 掃羅擲彼支槍欲鑿約拿單，約拿單就知伊的老父決意欲刣大衛。 |
| 20:34 | 對按呢約拿單真受氣，就對桌裡起來佇此初二日無食甚麼。伊因為大衛煩惱，是因為伊的老父凌辱伊。 |
| 20:35 | 隔早起，約拿單照伊及大衛所約的時出去到田裡，有一個囝仔及伊去。 |
| 20:36 | 給囝仔講：「你走去，尋我所射的箭。」囝仔走去，伊就射一支箭佇伊的頭前。 |
| 20:37 | 囝仔到約拿單箭射到的所在，約拿單佇囝仔的後面叫講：「箭豈呣是佇你的頭前嗎？」 |
| 20:38 | 約拿單閣叫囝仔講：「趕緊噢緊緊去，呣通延延！」約拿單的囝仔就拾許個箭，倒轉來伊的主人遐。 |
| 20:39 | 總是囝仔呣知這是甚麼意思，只有約拿單及大衛知此個代誌。 |
| 20:40 | 約拿單將器械交代囝仔，吩咐講：「你提倒去城內。」 |
| 20:41 | 囝仔去了後，大衛就對南勢一所在出來，仆佇地裡，拜三拜；二人相唚，相及啼哭，大衛閣卡到極。 |
| 20:42 | 約拿單給大衛講：「你今平安去，咱二人已經指耶和華的名咒誓講：『願耶和華佇你我的中間，閣佇你的後裔及我的後裔的中間，直到永遠。』」伊就起來去；約拿單也倒去城內。 |
