經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
25:1 | 撒母耳死,以色列眾人聚集,為著伊啼哭,埋葬伊佇伊家己的厝──就是佇拉瑪。大衛起身落去,佇巴蘭的曠野。 |
---|---|
25:2 | 佇瑪雲有一人,伊的產業佇迦密,是大好額人,有綿羊三千隻,山羊一千隻;伊佇迦密剪羊毛。 |
25:3 | 彼人是迦勒族的人,名叫拿八;伊的某名叫亞比該,是聰明閣娞的婦仁人。總是彼人的行做是硬心閣兇惡。 |
25:4 | 大衛佇曠野聽見拿八啲剪羊毛, |
25:5 | 大衛就差十個少年人,大衛吩咐許個少年人講:「恁著上去迦密見拿八,用我的名給伊請安。 |
25:6 | 著給彼個好命人講:『願你平安,願你的家平安,願你一切所有的攏平安。 |
25:7 | 今我聽見講有人佇你遐給你剪羊毛,你的牧者曾及阮住,阮無欺負伊,𪜶佇迦密的時,攏未曾失落甚麼。 |
25:8 | 通問你的少年人,𪜶欲給你講。所以願我的少年人佇你的目睭前得著恩典,因為阮來是好日子。求你照你的手隨便提淡薄互你的奴僕及你的子大衛。』」 |
25:9 | 大衛的少年人到,就將諸個話用大衛的名攏給拿八講,就靜靜聽候。 |
25:10 | 拿八應大衛的奴僕講:「大衛是是誰?耶西的子是是誰?近來多多奴僕悖伊的主人, |
25:11 | 我的餅我的水及為著給剪羊毛的人,我所刣精牲的肉欲互剪羊毛的人,我豈通互許個我呣知伊對叨落來的人嗎?」 |
25:12 | 大衛的少年人就越轉身對原路倒去,照諸個話攏給大衛講。 |
25:13 | 大衛對隨伊的人講:「恁逐人攏著背刀!」𪜶就攏背刀,大衛也背刀。隨大衛上去的約略有四百人,留二百人顧守雜物。 |
25:14 | 拿八許個少年人中有一個來給拿八的某亞比該講:「大衛對曠野差使者來請安阮主人,主人反轉誚皮𪜶。 |
25:15 | 總是許個人款待阮真好;阮佇田野及𪜶往來的時,攏無受傷害,也無失落甚麼。 |
25:16 | 阮佇𪜶遐飼羊的時,𪜶暝日做阮的牆圍。 |
25:17 | 今你著知,也著打算,看你欲怎樣行;因為有定著意思欲害阮的主人及伊的全家。伊的性情兇惡,無人敢及伊講話。」 |
25:18 | 亞比該就趕緊將二百個餅,二皮袋酒,五隻備辦好的羊,五細亞烘的五穀,一百葩葡萄干,二百個無花果餅,互幾若隻驢背, |
25:19 | 給伊許個少年人講:「恁做頭去,我欲隨恁的後面去。」總是無給伊的丈夫拿八講。 |
25:20 | 伊就騎驢,抵仔落山的越角,忽然看見大衛及隨伊的人佇對面落來,伊就抵著𪜶。 |
25:21 | 大衛曾講:「此人佇曠野一切所有的我給伊顧守,致到屬佇伊的無失落一項,實在是空空!伊用歹報我的好。 |
25:22 | 凡若屬伊的,我若留伊一個查甫子到明仔天光,願上帝照按呢款待大衛的對敵,也比按呢猶卡重!」 |
25:23 | 亞比該看見大衛,就趕緊對伊的驢落來,佇大衛的面前俯頭仆佇地裡拜伊, |
25:24 | 仆佇伊的腳下,講:「我的主啊,願此個罪歸佇我!求你准你的女婢講互你聽,閣求你聽你的女婢的話。 |
25:25 | 求我的主莫得致意此個無下落的人拿八,因為伊的名怎樣伊的人款也是按呢;伊的名叫拿八,伊做人果然愚戇。總是我的主所差來的少年人,你的女婢也無看見。 |
25:26 | 我的主啊,耶和華既然禁止你犯著刣死人的罪,用你的手報家己的仇讎,所以我指永活的耶和華、及你的活命來咒誓講:『願你的對敵及計謀害我的主的攏親像拿八。』 |
25:27 | 今你的女婢所帶來互我的主的禮物通互跟隨我的主的少年人。 |
25:28 | 求你寬恕你的女婢的罪過。因為耶和華的確給我的主建立堅固的家,因為我的主為著耶和華交戰;閣佇你一生的日無查出你有甚麼過失。 |
25:29 | 雖然有人起來追趇你,數想你的生命,總是我的主的生命欲佇耶和華──你的上帝遐,包佇活命的包內;你的對敵的生命,耶和華欲給伊甩出來,親像對甩索的中間甩出去一樣。 |
25:30 | 到後日耶和華照伊所應允我的主的福氣,來一盡行佇你,設立你做以色列的頭,當彼時, |
25:31 | 我的主呣免為著流無罪的人的血伸家己的冤,致到有甚麼憂悶,抑是心內家己責備。耶和華賜福互我的主的時,求你記念你的女婢。」 |
25:32 | 大衛給亞比該講:「耶和華──以色列的上帝是應該謳咾的,因為伊今仔日差你來抵著我。 |
25:33 | 你的智慧通謳咾,你本身也通謳咾;因為你今仔日阻擋我犯著刣死人的罪,無用家己的手報家己的仇讎。 |
25:34 | 禁止我傷害你的耶和華──以色列的上帝,我指伊的永活來咒誓,若你無緊緊來接我,到明仔早起,見若屬拿八的決斷無留一個查甫子。」 |
25:35 | 大衛收亞比該帶來互伊的物,就給伊講:「你通平安倒去你的家!看啊,我有聽你的話,帶著你。」 |
25:36 | 亞比該到拿八遐,看見伊佇家內排設筵席,親像王的筵席;拿八心大歡喜因為伊真大醉。所以亞比該無論大細的事攏無給伊講,聽候到隔早起。 |
25:37 | 到隔早起,拿八酒退,伊的某將諸個事給伊講,伊的心佇內面親像死,伊變親像石頭。 |
25:38 | 約略十日,耶和華拍拿八,伊就死。 |
25:39 | 大衛聽見拿八已經死,就講:「應該著謳咾耶和華,因為我對拿八的手所受的凌辱,伊有給我伸冤,閣阻止奴僕行歹;耶和華也互拿八的歹歸到拿八的頭殼。」按呢大衛就差人去,及亞比該講,欲娶伊做某。 |
25:40 | 大衛的奴僕到迦密見亞比該,給伊講:「大衛差阮來見你,想欲娶你做某。」 |
25:41 | 亞比該就起來,仆佇地裡,講:「你的女婢佇遮,願做差用,來洗我的主許個奴僕的腳。」 |
25:42 | 亞比該緊緊起來,騎驢,有伊五個女婢相及去,伊就隨大衛的使者去,做大衛的某。 |
25:43 | 大衛也娶耶斯列人亞希暖,𪜶二人攏做伊的某。 |
25:44 | 掃羅已經將伊的查某子米甲,就是大衛的某,互迦琳人拉億的子帕提做某。 |