走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 22:1 | 大衛就離開遐，走到亞杜蘭的洞。伊的兄弟及伊的老父全家聽見，就攏落去到伊遐。 |
|---|---|
| 22:2 | 見若窘迫的、欠債的、心內鬱悴的攏聚集到伊遐；大衛就做𪜶的頭，倚伊的約略有四百人。 |
| 22:3 | 大衛對遐去摩押的米斯巴，給摩押王講：「求你容允我的老父我的老母出來，踮恁遮徛，聽候我知上帝欲給我怎樣行。」 |
| 22:4 | 伊導𪜶到摩押王的面前。大衛踮佇山寨的時陣，伊的父母也踮佇摩押王遐。 |
| 22:5 | 先知迦得給大衛講：「你呣通踮佇衛所，著去猶大地。」大衛就離開遐，去到哈列的樹林。 |
| 22:6 | 掃羅佇基比亞的拉瑪，坐佇垂絲柳的樹腳，手裡抬槍，眾人臣圍纍佇伊的左右。掃羅聽見講大衛及隨的人互人抵著， |
| 22:7 | 掃羅就給圍伊的人臣講：「便雅憫人啊，恁著聽！耶西的子會用田及葡萄園互恁逐人嗎？會設立恁逐人做千總百總嗎？ |
| 22:8 | 恁竟然相及計謀攻擊我！我的子曾及耶西的子結約，無人報我知；恁中間無一人可憐我；我的子教唆我的人臣攻擊我，當等我親像今仔日的款，恁攏無報我知。」 |
| 22:9 | 彼時以東人多益徛佇掃羅人臣的中間，給伊講：「我曾看見耶西的子到羅伯，到亞希突的子亞希米勒遐。 |
| 22:10 | 亞希米勒替伊問耶和華，閣互伊食物，也用非利士人歌利亞的刀互伊。」 |
| 22:11 | 王就差人召亞希突的子祭司亞希米勒及伊老父全家，就是踮佇羅伯許個祭司；𪜶就攏來王遐。 |
| 22:12 | 掃羅講：「亞希突的子啊，著聽！」伊應講：「我的主啊，我佇遮。」 |
| 22:13 | 掃羅給伊講：「恁啥事及耶西的子計謀攻擊我，你竟然用餅及刀互伊，閣替伊問上帝，互伊起來攻擊我，當等我親像今仔日的款？」 |
| 22:14 | 亞希米勒應王講：「你的人臣中是誰會比得大衛的盡忠啊？伊是王的子婿，閣做你的參謀，也佇你的家中是尊貴的。 |
| 22:15 | 我豈是對今仔日才替伊問上帝嗎？我決斷無彼號意思！王莫得用甚麼歸佇奴僕及我的老父全家；因為諸個一切的事，無論大細，你的奴僕攏呣知。」 |
| 22:16 | 王講：「亞希米勒啊，你及你的老父全家攏的確著死！」 |
| 22:17 | 王命令左右的侍衛講：「恁越轉去刣耶和華的祭司；因為𪜶也幫助大衛，閣因為𪜶知大衛逃走，竟然無報我知。」總是王的人臣呣肯伸手拍死耶和華的祭司。 |
| 22:18 | 王給多益講：「你越轉去拍許個祭司！」以東人多益就越轉去拍祭司，彼日刣死穿幼苧布的以弗得八十五人； |
| 22:19 | 閣用刀拍祭司的城羅伯其中的男女、囝仔、食奶的嬰仔，及牛、驢、羊攏用刀刣死。 |
| 22:20 | 亞希突的子亞希米勒有一個子，名叫亞比亞他，脫離走去隨大衛。 |
| 22:21 | 亞比亞他給大衛講掃羅有刣死耶和華的祭司。 |
| 22:22 | 大衛給亞比亞他講：「彼日以東人多益佇遐，我知伊的確會給掃羅講。你的老父全家失落生命，攏是因為我的緣故。 |
| 22:23 | 你著及我住，呣免驚。因為數想我的生命的就是數想你的生命；你及我住會得著保全。」 |
