台語聖經

線上台語聖經

麥穗田首頁線上台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

撒母耳記上第2章

章節快速選擇 :

上下篇聖經查閱：路得記撒母耳記下回到目錄

2:1	哈拿祈禱講：我的心因為耶和華來快樂；我的角因為耶和華來抬高。我向對敵敢講大話；因為我為著你的拯救來歡喜。
2:2	無有聖者親像耶和華；你以外無別個，也無石磐親像咱的上帝。
2:3	恁呣通自誇講驕傲的話，也呣通互濫糝的話出你的嘴；因為耶和華是智識的上帝，人的行做互伊批評。
2:4	勇士的弓已經遏折；著觸的人用氣力縖腰。
2:5	飽足的，互人倩來趁食；枵的，無閣枵。𣍐生育的，生七個子；有多多子的，反轉衰弱。
2:6	耶和華互人死，也互人活，互人落陰間，也互人起來。
2:7	耶和華互人喪鄉，也互人好額，互人降低，也互人升高。
2:8	伊對塵埃升高喪鄉人，對糞埽堆高升欠缺的人，互𪜶及首領相及坐，續接榮光的座位。因為地的柱屬佇耶和華；伊將世界安置佇彼頂面。
2:9	伊欲保守伊聖者的腳，互歹人佇黑暗中靜寂寂；因為人倚靠氣力𣍐會卡贏。
2:10	及耶和華相爭的，欲受拍碎；伊欲對天用雷拍伊，耶和華欲審判地的極頭，賞賜氣力互伊的王，舉起伊受抹油者的角。
2:11	以利加拿倒去拉瑪到伊的家。彼個囝仔佇祭司以利的面前服事耶和華。
2:12	以利許個子是匪類，呣識耶和華。
2:13	祭司佇百姓的例就是：見若人獻祭，啲煮肉的時，祭司的奴僕就來，手攑三爪的叉，
2:14	用叉插入鉢，抑是鼎，抑是鐵銚，抑是鍋，見若所叉出來的肉，祭司攏提做家己的。𪜶佇示羅親像按呢款待見若來遐的以色列人。
2:15	閣佇未燒油膋的代先，祭司的奴僕就來給獻祭的人講：「你著用肉互祭司，通煏。因為伊呣愛你過煮的肉，是愛生的。」
2:16	彼人若對伊講：「欲代先燒油，然後通照你的心所愛提去。」伊就講：「呣啊，此霎著互我；若呣，我欲強強提去。」
2:17	按呢，許個少年人的罪佇耶和華的面前真重，因為人厭惡耶和華的祭祀。
2:18	彼時，撒母耳猶細漢，穿幼苧布的以弗得，佇耶和華的面前服事。
2:19	閣伊的老母逐年給伊做一領細領的長衫，及伊的丈夫上來獻年祭的時帶來互伊。
2:20	以利給以利加拿及伊的某祝福，講：「願耶和華對此個婦仁人閣賞賜你後裔，來替所還互耶和華的。」𪜶就倒去本所在。
2:21	耶和華看顧哈拿，伊就懷孕生三個子，二個查某子。囝仔撒母耳也佇耶和華的面前漸漸大漢。
2:22	以利真老，聽見伊的子對以色列眾人所行一切的事，閣聽見𪜶及會幕門前做工的婦仁人私通，
2:23	伊就給𪜶講：「恁啥事行諸個事啊？我對諸個眾百姓聽見恁的歹所行。
2:24	我的子啊，呣通按呢！因為我所聽見的風聲是呣好，恁互耶和華的百姓犯罪。
2:25	人若得罪人，上帝審判伊；人若得罪耶和華，是誰替伊祈禱？」若是𪜶呣聽老父的話，因為耶和華存意欲刣𪜶。
2:26	囝仔撒母耳漸漸大漢，得著耶和華及人愈疼伊。
2:27	有上帝的奴僕來見以利，對伊講：「耶和華按呢講：『你的祖公的家前佇埃及法老的家做奴僕的時，我豈無對伊出現嗎？
2:28	我豈無對以色列眾支派，揀伊做我的祭司，佇我的壇頂獻祭，燒香，穿以弗得佇我的面前，以色列族所獻的火祭我豈無攏互伊的祖公的家嗎？
2:29	我所命令的祭祀禮物佇我徛起的所在的，恁啥事睭踏伊，尊重你的子卡過頭尊重我，用我的百姓以色列所獻上好的禮物來家己肥啊？』
2:30	所以，耶和華──以色列的上帝講：『我實在曾講，你的家你的老父的家欲永遠行佇我的面前；總是今耶和華講，我決斷呣按呢。因為尊重我的，我欲尊重伊；藐視我的，伊欲受看輕。
2:31	看啊，日子欲到，我欲斬斷你的手骨及你的父的家的手骨，互你的家中無一個老人。
2:32	佇上帝互以色列人享福的時，你欲看見我的厝的衰敗。佇你的家中欲永遠無一個老人。
2:33	屬佇你的人我無對我的壇剿滅的；欲拍歹你的目睭、憂傷你的心。你家中所閣生的人攏欲中年就死。
2:34	你二個子何弗尼、非尼哈所抵著的欲做你的兆頭：𪜶二人欲同一日死。
2:35	我欲為家己立一個盡忠的祭司；伊欲照我的心我的意來行。我欲為伊建立堅固的家；伊欲永遠行佇我所抹油者的面前。
2:36	你的家所剩的人攏欲來跪拜伊，求一個銀，一個餅，講：求你互我當祭司職的一個，互我通得著淡薄餅來食。』」

- 本章節結束 -

聯繫資訊

線上台語聖經

台語聖經

撒母耳記上第2章

快速導航

相關資訊

聯絡麥穗田

聯繫資訊

線上台語聖經

台語聖經

撒母耳記上 第2章

撒母耳記上第2章