走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 23:1 | 有人報大衛講：「看啊，非利士人拍基伊拉，搶五穀場。」 |
|---|---|
| 23:2 | 大衛就問耶和華講：「我通去拍許個非利士人抑呣通？」耶和華給大衛講：「你通去拍非利士人，救基伊拉。」 |
| 23:3 | 隨大衛的人給伊講：「咱佇猶大地遮尚且驚惶，何況去基伊拉拍非利士人的軍隊啊？」 |
| 23:4 | 大衛閣問耶和華。耶和華應講：「你起來落去基伊拉，因為我欲用非利士人交佇你的手。」 |
| 23:5 | 大衛及隨伊的人去基伊拉，及非利士人交戰，搶𪜶的精牲，刣死𪜶多多人。按呢，大衛救基伊拉徛起的百姓。 |
| 23:6 | 亞希米勒的子亞比亞他走去到基伊拉見大衛的時，手裡帶以弗得落去。 |
| 23:7 | 有人給掃羅講：「大衛到基伊拉。」掃羅講：「上帝將伊交佇我的手；因為伊入有門有閂的城，關住佇彼內面。」 |
| 23:8 | 掃羅就招集眾百姓，欲去交戰落去基伊拉，圍困大衛及隨伊的人。 |
| 23:9 | 大衛知掃羅設計謀欲害伊，就給亞比亞他講：「你帶以弗得來。」 |
| 23:10 | 大衛講：「耶和華──以色列的上帝啊，你的奴僕確實聽見掃羅愛欲來基伊拉，欲為著我的緣故滅此個城。 |
| 23:11 | 基伊拉人欲將我交佇伊的手抑無？掃羅欲照你的奴僕所聽見的落來抑無？耶和華──以色列的上帝啊，求你指示你的奴僕！」耶和華講：「掃羅欲落來。」 |
| 23:12 | 大衛閣講：「基伊拉人欲將我及隨我的人交佇掃羅的手嗎？耶和華講：「𪜶欲將你交互伊。」 |
| 23:13 | 大衛及隨伊的人約略六百，就起身出基伊拉，去𪜶所去的所在。有人給掃羅講，大衛已經對基伊拉逃走；掃羅就無出去。 |
| 23:14 | 大衛踮佇曠野的衛所，常常佇西弗曠野的山地。掃羅逐日尋伊，總是上帝無將大衛交佇伊的手。 |
| 23:15 | 大衛知掃羅已經出來啲數想伊的生命。彼時，大衛佇西弗的曠野踮佇樹林內； |
| 23:16 | 掃羅的子約拿單起身，去彼個樹林內見大衛，互伊靠上帝來堅固， |
| 23:17 | 就給伊講：「呣免驚！我的父掃羅的手尋你𣍐著；你欲做以色列王，我欲做你的第二。此個事我的父掃羅已經知。」 |
| 23:18 | 對按呢二人佇耶和華的面前結約。大衛踮樹林，約拿單倒去伊的厝。 |
| 23:19 | 西弗人上去基比亞見掃羅，講：「大衛豈呣是踮佇阮遐匿佇樹林內的衛所，佇耶示們南旁的哈基拉山嗎？ |
| 23:20 | 王啊，請你照你的心所愛落去的落去，將伊交佇王的手是阮的代。」 |
| 23:21 | 掃羅講：「願耶和華賜福恁，因為恁可憐我。 |
| 23:22 | 請恁倒去，閣代先備辦詳細知，探看伊行踏的所在，甚麼人看見伊佇遐，因為有人給我講伊真狡怪。 |
| 23:23 | 所以恁著查看，知伊一切家己匿密的所在，倒轉來用實情給我講，我就欲及恁去。伊若佇此個境內，我欲佇猶大的眾鄉社給伊搜出來。」 |
| 23:24 | 𪜶就起身，代先掃羅去西弗。大衛及隨伊的人踮佇瑪雲的曠野佇耶示們南勢的亞拉巴。 |
| 23:25 | 掃羅及隨伊的人去尋伊；有人給大衛講，伊就落去到石磐，踮佇瑪雲的曠野。掃羅聽見，就佇瑪雲的曠野追趇大衛。 |
| 23:26 | 掃羅行佇山的此旁，大衛及隨伊的人行佇山的彼旁。大衛緊急行閃避佇掃羅的面前；因為掃羅及隨伊的人，四面圍大衛及隨伊的人，欲掠𪜶。 |
| 23:27 | 有使者到來報掃羅講：「你著緊緊倒來，因為非利士人侵犯境界。」 |
| 23:28 | 對按呢掃羅無趇大衛，倒去抵敵非利士人。因為按呢彼個所在名叫西拉哈瑪希羅結。 |
| 23:29 | 大衛對遐上去，踮佇隱基底的衛所。 |
