走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 14:1 | 有幾若個以色列的長老來我遮，坐佇我的面前。 |
|---|---|
| 14:2 | 耶和華的話就臨到我講： |
| 14:3 | 「人子啊，諸個人已經將𪜶的偶像接納佇𪜶的心，閣下致到犯罪的塞礙佇家己的面前，我豈欲互伊問嗎？ |
| 14:4 | 所以你著對𪜶講：『主耶和華按呢講：以色列家的中間，見若接納伊的偶像佇伊的心內的人，閣下致到犯罪塞礙佇伊家己的面前，閣來就近先知者，我──耶和華佇伊所求的事，欲照伊的多多偶像來應答伊， |
| 14:5 | 致到我通互以色列家心內家己責備，因為𪜶攏為著𪜶的偶像及我生疏。』 |
| 14:6 | 「所以你著給以色列家講：『主耶和華按呢講：著回頭！越轉離開恁的偶像，越轉面莫得趁恁一切可惡的事。』 |
| 14:7 | 因為以色列家的人，抑是佇以色列中寄腳的出外人，見若及我隔斷，接納伊的偶像佇伊的心內，閣下致到犯罪的塞礙佇伊家己的面前，閣來就近先知，欲為家己的事來問我者，我──耶和華欲本身應答伊。 |
| 14:8 | 我欲向彼號人變面，互伊做人的鑑戒，做話柄，互人卬愕，亦欲對我的百姓中剪除伊；恁就知我是耶和華。 |
| 14:9 | 先知若迷惑來講一句話，就是我──耶和華迷惑彼個先知，我亦欲伸手攻擊伊，將伊對我的百姓以色列中除滅。 |
| 14:10 | 𪜶欲擔當家己的罪過。先知的罪過及求問伊的人的罪過攏是一樣， |
| 14:11 | 通互以色列家無閣行迷路離開我，無閣因為逐樣的罪過拍垃墋家己，獨獨欲做我的百姓，我做𪜶的上帝。這是主耶和華講的。」 |
| 14:12 | 耶和華的話臨到我講： |
| 14:13 | 「人子啊，若有國對𪜶的悖逆來得罪我，我亦伸手攻擊伊，斷絕伊所倚靠的米糧，互飢荒臨到伊，對𪜶中間剪除人及精牲； |
| 14:14 | 其中雖然有挪亞、但以理、約伯此三人，𪜶只有會因為𪜶的義來救家己的生命若定。這是主耶和華講的。 |
| 14:15 | 我若互惡獸經過彼個地來損壞，互彼所在荒廢，因為諸個獸的緣故，致到無人對遐經過； |
| 14:16 | 雖然有此三人佇𪜶中間，主耶和華講：我指我的永活來咒誓，𪜶𣍐救𪜶的子查某子，只有𪜶本身得著救若定，地方猶原荒廢。 |
| 14:17 | 抑是我互刀劍臨到彼個地方，講：刀劍啊，你著經過彼個地方，致到我對𪜶中間剪除人及精牲； |
| 14:18 | 雖然有此三人佇𪜶中間，主耶和華講：我指我的永活來咒誓，𪜶𣍐救𪜶的子查某子，只有𪜶本身得著救若定。 |
| 14:19 | 抑是我互瘟疫流行彼個地方，互我傾出滅命的大受氣佇𪜶的頂面，通對𪜶中間剪除人及精牲； |
| 14:20 | 雖然有挪亞、但以理、約伯佇𪜶中間，主耶和華講：我指我的永活來咒誓，𪜶𣍐救𪜶的子查某子，只有會因為𪜶的義來救家己的生命若定。」 |
| 14:21 | 主耶和華按呢講：「何況我將我四項的大災禍──就是刀劍、飢荒、惡獸、瘟疫降落佇耶路撒冷，對彼中間剪除人及精牲，豈呣是閣卡𣍐救得嗎？ |
| 14:22 | 看啊，欲有所剩的人留啲，就是受掠出來的子查某子，看啊，𪜶欲出來到恁遮，恁欲看𪜶的所行所做，就恁論到我所降落佇耶路撒冷的災禍，就是我一切降落佇𪜶頂面的，欲得著安慰。 |
| 14:23 | 恁看𪜶所行所做的，欲受安慰，就知我佇耶路撒冷所行的呣是無緣故。這是主耶和華講的。」 |
