經上記著說:『人活著,不是單靠食物,乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本:台語和合本 -
24:1 | 第九年十月初十日,耶和華的話閣臨到我講: |
---|---|
24:2 | 「人子啊,今仔日抵抵是巴比倫王就近耶路撒冷的日,你著將今仔日記伊的名, |
24:3 | 著對此個悖逆的家設譬喻講,主耶和華按呢講:將鼎祀佇火裡,已經祀好,就傾水佇內面; |
24:4 | 將肉塊,就是一切肥娞的肉塊、前腿後腿,攏拾下佇內面,揀好的骨疊互伊滿; |
24:5 | 取羊群中第一好的,將柴疊佇鼎下,互鼎滾沖沖,通將骨徛佇彼內面。 |
24:6 | 「主耶和華按呢講:有災禍啊!此個互人流血的城,就是生銹的鼎。伊的銹猶未除去,著將肉塊對彼中間一塊一塊提出來,無給伊拈鬮。 |
24:7 | 城中有受刣的人的血,傾佇光光的石磐頂,無傾佇地裡,通用土蓋。 |
24:8 | 此個城內所流的血,傾佇光光的石磐頂,無通遮蓋,是我互伊按呢,為著欲激大受氣行報應。 |
24:9 | 所以主耶和華按呢講:有災禍啊!此個互人流血的城,我亦欲疊大堆的火柴, |
24:10 | 添柴互火真炎,將肉炤爛,將湯熬洘,互骨灰嚕去; |
24:11 | 將鼎傾空祀佇啲𤏸的炭頂,互鼎煏熱互銅燒紅,鎔其中的污穢,除彼頂面的銹。 |
24:12 | 伊著磨厭倦,總是所生大大的銹猶原無落;伊的銹就若佇火裡亦𣍐除去。 |
24:13 | 佇你的污穢中有淫行,我曾清氣你,你猶久無清氣。所以你的污穢𣍐閣得著清氣,到我對你發出的大受氣息。 |
24:14 | 我──耶和華曾講伊,彼個事的確成,我也欲行伊,的確無反覆,的確無憐憫,亦無退悔。人欲照你的抬動照你的行做審判你。這是主耶和華講的。」 |
24:15 | 耶和華的話閣臨到我講: |
24:16 | 「人子啊,看啊,我欲將你的目睭所意愛者忽然取去,總是你呣通悲哀啼哭,亦呣通流目屎, |
24:17 | 獨獨通暗靜吐氣,呣通出聲,呣通辦理喪事;頭殼猶原著包頭巾,腳猶原著穿鞋,呣通掩你的嘴唇,也呣通食弔喪的餅。」 |
24:18 | 對按呢我將此個事早起時給百姓講,下昏我的某就死。隔早起我就趁命令來行。 |
24:19 | 百姓問我講:「你按呢做及阮有甚麼干涉,你豈可無給阮講?」 |
24:20 | 我應𪜶講:「耶和華的話臨到我講: |
24:21 | 『你著給以西結家講,主耶和華按呢講:看啊,我欲拍垃墋我的聖所,就是恁的勢力所誇口,恁的目睭所意愛,恁的心所疼惜者,閣恁所留佇遐的子查某子欲倒佇刀下。 |
24:22 | 彼時,恁欲照我所行的來行,無掩恁的嘴唇,亦無食弔喪的餅。 |
24:23 | 恁的頭殼猶原包頭巾,腳欲穿鞋;無悲哀無啼哭。恁欲佇恁的罪惡中消滅,相對面吐氣。 |
24:24 | 以西結欲按呢做恁的兆頭;凡若伊所行的,恁亦欲按呢行。此個代誌若到,恁就知我是耶和華。』 |
24:25 | 「人子啊,當我除去𪜶所倚靠的,及𪜶所歡喜的榮光,𪜶的目睭所意愛者,𪜶的心所疼惜者就是𪜶的子兒。 |
24:26 | 彼日得著脫離的人豈無來你遮,互你親耳聽見此個事嗎? |
24:27 | 當彼日,你的嘴就開,你就及得著脫離的人講話,無閣啞口。你欲按呢做𪜶的兆頭,𪜶就知我是耶和華。」 |