走到哪裡都有麥子
走出你的個人世界 WITH

走到哪裡都有麥子～

聯繫我們

聯繫資訊

新北市永和郵局238號信箱 (02)2926-5882 .0987-300-005 服務信箱：info@awheat.org 捐款支持

線上台語聖經

麥穗田首頁 線上台語聖經

台語聖經

經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -

  以西結書  第16章

章節快速選擇 :   
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
上下篇聖經查閱： 耶利米哀歌    但以理書     回到目錄
16:1 耶和華的話閣臨到我講：
16:2 「人子啊，你著互耶路撒冷知伊許個可惡的事，
16:3 講主耶和華對耶路撒冷按呢講：你的本源，你的出世，是佇迦南地；亞摩利人是你的老父，你的老母是赫人。
16:4 論到你出世的景況，當你出世的日無給你轉臍，也無用水給你洗，互你清氣，攏無給你摻鹽，亦無用布給你包。
16:5 無人看顧你，給你做諸個事，憐憫你；你出世的日㧒佇田野，是因為你互人厭惡。
16:6 「我對你遐過，看見你翱佇你的血內，就對你講：你雖然佇你的血中，猶久通活；我實在對你講：你雖然佇你的血中，猶久通活。
16:7 我互你長成親像田裡所發生的，閣你漸漸成做大人，面貌清秀，奶肨，頭毛長，總是你猶原赤身露體。
16:8 「我對你遐過，看見你，看啊，彼時是你興起愛情的時，我就用衫仔裾蓋你，遮你的褪裼裼；閣對你咒誓，及你結約，你就屬佇我。這是主耶和華講的。
16:9 彼時我用水洗你，洗清氣你身體的血，閣用油抹你。
16:10 我互你穿徛花的衫，亦互你穿海狗皮的鞋，亦用幼苧布互你縖腰，閣用綢緞做衫互你𧜞，
16:11 我用妝飾的物妝飾你，用手環掛佇你的手，用金鍊仔掛佇你的頷頸。
16:12 我亦用環靠佇你的鼻，用耳鈎掛佇你的耳仔，用娞的帽戴佇你的頭殼。
16:13 按呢，你就有金銀的妝飾，所穿的是幼苧布及綢緞，及徛花的衫；所食的是幼幼的麵、蜂的蜜，及油。你亦極其娞，發達到王后的尊貴。
16:14 你娞的名聲傳佇列國中，是對你的娞完全，因為我有用我的榮光互你。這是主耶和華講的。
16:15 「獨獨你倚靠家己的娞，閣因為你的名聲就行淫亂。你放縱淫慾，互過路人出在伊的意思來行。
16:16 閣用你的衫妝飾高的所在，五色攏齊備，佇彼頂面行淫亂。此號事無欲來，亦無閣有。
16:17 你亦取我所互你金銀、娞的寶器為著家己做人的像，及伊行淫；
16:18 閣用你徛花的衫給伊𧜞，亦用我的膏油我的香料排佇伊的面前；
16:19 閣我所賞賜你的食物，幼麵、及油，及蜜，我所用來養飼你的，你就用伊排佇𪜶的面前來做芳味，實在有按呢。這是主耶和華講的。
16:20 閣你用你的子、你的查某子就是你所給我生者來獻互𪜶食。你行諸個淫亂豈是小可事？
16:21 你竟然閣刣死我諸個子來交付伊，互𪜶經過火來歸佇伊？
16:22 你行諸個一切可惡及淫亂的事，攏無想著你細漢赤身露體翱佇你血中的日。」
16:23 「（主耶和華講：你有災禍啊！有災禍啊！）
16:24 你行這一切歹代以後，閣為家己起花樓，佇逐條街路起高台。
16:25 你佇一切街路口起高台，互你的娞變做可惡者，閣及一切過路者多多行淫亂。
16:26 你亦及你隔壁國放縱情慾的埃及人行淫，加添你的淫亂，惹我受氣。
16:27 看啊，我伸出我的手攻擊你，減少你應用的物，閣將你交互怨恨你的非利士許個查某囝仔，互𪜶出在意思款待你。𪜶看見你行歹，來見誚。
16:28 你因為好色不知足，閣及亞述人行淫，及𪜶行淫了後，猶原無滿意，
16:29 你閣佇迦南地到迦勒底，行多多淫亂，猶久無滿意。
16:30 主耶和華講：你行這一切的事，是霸性淫婦的所行，可見你的心是偌軟弱！
16:31 因為你佇一切街路口起花樓，佇逐條街路起高台，因為你無親像別個娼妓，呣揲錢。
16:32 哇！你此個行淫的某啊，欲揲別人，來替丈夫。
16:33 人是用物送娼妓，你反轉用物送你相好的人，請𪜶對四圍來及你行淫。
16:34 你的行淫及別個婦仁人對反，因為呣是人尋你行淫；是你用物送人，呣是人送你；所以你及別個婦仁人對反。」
16:35 「因為按呢，你此個娼妓啊，著聽耶和華的話。
16:36 主耶和華按呢講：因為你傾出你的污穢，你及你所相好者褪裼裼行淫，閣因為你所拜一切可惡的偶像，閣為著所流你諸個子的血，就是你所獻互𪜶者，
16:37 看啊，因為按呢，我欲聚集你一切相好者就是你曾及伊宴樂者，及你一切所疼者，你一切所怨恨者，我欲對四圍聚集來攻擊你；亦欲對𪜶露出你的褪裼，互𪜶看你的褪裼。
16:38 我亦欲審判你，親像審判行淫及刣人的婦仁人一樣。我欲用大受氣妒忌，互你流血。
16:39 我閣欲將你交佇𪜶的手；𪜶欲拆毀你的花樓，毀壞你的高台，褪你的衫，搶你娞的寶器，留你赤身露體。
16:40 𪜶也欲導多多人起來攻擊你，用石頭擲死你，用刀劍鑿透你，
16:41 用火燒你的厝宅，佇多多婦仁人的面前審判你。我的確互你無閣行淫，亦無閣送人物。
16:42 按呢，我向你的大受氣欲息，我的妒忌亦欲離開你，我欲安靜無閣受氣。
16:43 因為你𣍐記得你細漢的日，佇這一切的事來激我，所以我欲照你所行的報應佇你的頭殼頂，互你無閣行淫，加添佇你一切可惡的事。這是主耶和華講的。」
16:44 「看啊，見若講俗語者欲用俗語挑剔你，講：『老母按呢，查某子也是按呢。』
16:45 你真正是恁老母的查某子，厭賤伊的丈夫及子兒；你真正是恁姊妹的姊妹，厭賤𪜶的丈夫及子兒。恁老母是赫人，恁老父是亞摩利人。
16:46 你的大姊是撒瑪利亞，伊及伊的眾查某子踮佇你的倒旁；你的小妹是所多瑪，伊及伊的眾查某子踮佇你的正旁。
16:47 你無學𪜶的所行，亦無照𪜶可惡的事去做，你掠做小可事，你一切所行的比𪜶卡臭。
16:48 主耶和華講：我指我的永活來咒誓，你的小妹所多瑪及伊眾查某子未有行你及你眾查某子所行的事。
16:49 看啊，你的小妹所多瑪的罪是此款：伊及伊的眾查某子心志驕傲，米糧飽足，享受安逸，攏無扶助困苦及喪鄉人的手。
16:50 𪜶自高，佇我的面前行可惡的事，我看了就將𪜶除去。
16:51 撒瑪利亞所犯的罪無你的一半，你加添可惡的事比𪜶卡多，閣對你所行一切可惡的事，互你的姊妹顯明是義。
16:52 你既然斷定你的姊妹做義，就著擔當你家己的凌辱；因為你所犯的罪比𪜶卡可惡，𪜶就比你卡義；你已經互你的姊妹顯明是義，你就著見誚擔當家己的凌辱。」
16:53 「我欲互𪜶受掠的倒轉來，就是互所多瑪及伊的眾查某子受掠的，撒瑪利亞及伊的眾查某子受掠者，以及𪜶中間恁受掠者，攏倒轉來，
16:54 通互你擔當家己的凌辱，閣對你一切所行互𪜶得著安慰的，來見誚。
16:55 你的姊妹所多瑪及伊的眾查某子欲倒來原位；撒瑪利亞及伊的眾查某子，欲倒來原位；你及你的眾查某子，亦欲倒來原位。
16:56 當你驕傲的日，你的嘴無講起你的小妹所多瑪。
16:57 彼時你的歹猶未發現，亞蘭諸個查某子連伊四圍的人猶未凌辱你；非利士諸個查某子平素佇四圍藐視你者，伊也未有凌辱你。
16:58 耶和華講：你好淫及可惡的事，你已經擔當啦。」
16:59 「因為主耶和華按呢講：你背約看輕咒誓，我欲照你所行來款待你。
16:60 總是我欲追念我佇你少年的時及你所立的約，亦欲及你設立永遠的約。
16:61 當你接納你的姊妹就是你的大姊及你的小妹的時，你欲記得你所行的來見誚；我亦欲將𪜶互你做查某子，獨獨呣是對你的約。
16:62 我欲及你設立我的約（你就知我是耶和華），
16:63 到我赦免你一切所做的時，你記得就見誚，閣因為你的凌辱，就無閣開嘴。這是主耶和華講的。」

- 本章節結束 -

上一章    下一章