走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 36:1 | 「人子啊，你著對以色列諸個山來宣傳講：以色列諸個山啊，著聽耶和華的話。 |
|---|---|
| 36:2 | 主耶和華按呢講：因為對敵攻擊你講：『呼哉！古早高的所在攏互阮做業啦！』 |
| 36:3 | 所以你著宣傳講，主耶和華按呢講：因為𪜶互你拋荒，佇四圍吞咬你，欲互你歸佇所剩的外邦人做業，也互厚口舌的人議論你，互眾百姓誹謗你。 |
| 36:4 | 所以，以色列諸個山啊，著聽主耶和華的話。主耶和華對諸個山、諸個嶺、諸個坑溝、諸個山谷、諸個拋荒的所在，受棄拺的城，互四圍所剩的外邦人搶劫譏刺者，按呢講， |
| 36:5 | 所以主耶和華按呢講：我實在佇熱熱的怨妒，用話責備列邦所剩者以及以東的全地。因為𪜶分派我的地做家己的業，滿心歡喜，神魂藐視，愛趕逐伊的百姓，來搶劫伊。 |
| 36:6 | 所以，你著論以色列地來宣傳，對伊諸個山、諸個嶺、諸個坑溝、諸個山谷講，主耶和華按呢講：看啊，我佇我的怨妒及我的大受氣來講，因為你已經受異邦人的凌辱， |
| 36:7 | 所以主耶和華按呢講，我舉起我的手講：佇恁四圍的異邦人，𪜶實在欲受𪜶的凌辱。 |
| 36:8 | 「獨獨恁以色列諸個山啊，恁的確發出恁的枝椏，閣欲結果子互我的百姓以色列，因為𪜶近近欲到啦。 |
| 36:9 | 看啊，我是為恁的，我欲越轉向恁，就恁欲互人種作。 |
| 36:10 | 我閣欲加添人佇恁的頂面，就是以色列家家戶戶一切攏按呢，就伊諸個城欲有人徛起，拋荒的所在得著起造。 |
| 36:11 | 我也欲加添人及精牲佇恁的頂面；𪜶欲生湠真多。我欲互恁照舊有人徛起，閣欲好款待恁贏過起頭的時，恁就知我是耶和華。 |
| 36:12 | 我欲互人行佇恁的頂面，就是我的百姓以色列。𪜶欲得著你，你欲做𪜶的業；你也無閣互𪜶絕嗣。 |
| 36:13 | 主耶和華按呢講：因為人對恁講：『你是吞食人者，閣互百姓絕嗣』， |
| 36:14 | 所以主耶和華按呢講：你無欲閣吞食人，亦無欲閣互你的國民絕嗣。 |
| 36:15 | 我無欲互你閣聽見外邦人的凌辱，你也無閣受萬百姓的誹謗，你也無閣互你的國民著觸。這是主耶和華講的。」 |
| 36:16 | 耶和華的話閣臨到我講： |
| 36:17 | 「人子啊，以色列家徛起佇本所在的時，用𪜶的所行所做拍垃墋伊。𪜶的所行佇我的面前，是親像婦仁人經期到的垃墋。 |
| 36:18 | 因為𪜶佇彼個所在流人的血，閣因為𪜶用偶像拍垃墋伊，所以我傾出我的受氣佇伊的頂面。 |
| 36:19 | 我分散𪜶佇列國，𪜶就四散佇列邦中，我就照𪜶的所行，𪜶的所做來審判𪜶。 |
| 36:20 | 𪜶去到𪜶所到的外邦人遐，褻瀆我的聖名；因為人指𪜶來講，這是耶和華的百姓，對伊的地出來者。 |
| 36:21 | 總是我保惜我的聖名，就是以色列家佇𪜶所到的列國中所褻瀆者。 |
| 36:22 | 「所以，你著對以色列家講，主耶和華按呢講：以色列家啊，我行此個，呣是為著恁的緣故，就是為著我的聖名的緣故，就是恁行到的列國中所褻瀆者。 |
| 36:23 | 我的大名受褻瀆佇異邦中；就是恁所褻瀆佇𪜶中間者；我欲互伊做聖。閣我對恁顯明家己做聖，佇𪜶的目睭前，就異邦人欲知我是耶和華。這是主耶和華所講的。 |
| 36:24 | 我欲帶恁出列邦，對列國中聚集恁，導恁入恁的本所在。 |
| 36:25 | 我也欲用清的水灑恁，恁就清氣。我欲洗清恁，除去恁一切的垃墋，及恁一切的偶像。 |
| 36:26 | 我欲用新的心賞賜恁，也欲用新的神下佇恁的內面，閣欲對恁的肉體中除去親像石的心，賞賜恁親像肉的心。 |
| 36:27 | 我欲將我的神下佇恁的內面，互恁順趁我的律例，守我的法度來行伊。 |
| 36:28 | 恁欲徛起佇我所賞賜恁的列祖的地。恁欲做我的百姓，我欲做恁的上帝。 |
| 36:29 | 我欲救恁脫離恁一切的污穢，也欲叫五穀互伊豐盛，無互恁抵著飢荒。 |
| 36:30 | 我欲加添樹木的果子，以及田園的土產，互恁無閣因為飢荒受外邦人的凌辱。 |
| 36:31 | 彼時，恁欲記得恁的歹所行，及恁呣好的所做，就因為恁的罪過及可惡的事，佇家己的面前來厭賤家己。 |
| 36:32 | 主耶和華講：恁著知，我按呢行呣是為著恁的緣故。以色列家啊，恁著為家己的所行來漏氣見誚。 |
| 36:33 | 「主耶和華按呢講：我洗清恁，除去恁一切罪過的日，欲互恁的城有人徛起，拋荒的所在得著起造。 |
| 36:34 | 前過路的人看做荒廢的地，今此個荒廢的地閣有人種作。 |
| 36:35 | 人欲講：『前做荒廢的地，今親像伊甸的園；此個荒廢冷靜、毀壞的城今起真堅固，有人徛起。』 |
| 36:36 | 彼時，佇恁四圍所剩的外邦人欲知我─耶和華起造許個倒壞的所在，栽培荒廢的地。我─耶和華已經講伊，的確成伊。 |
| 36:37 | 「主耶和華按呢講：我欲互以色列家為著此個事求我，致到我給𪜶成。我欲加添𪜶的人額，親像羊群。 |
| 36:38 | 親像獻祭的羊群，就是親像耶路撒冷守節的時的羊群，按呢，諸個拋荒的城的確有歸群人滿滿。𪜶就知我是耶和華。」 |
