走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 23:1 | 耶和華的話閣臨到我講： |
|---|---|
| 23:2 | 「人子啊，有二個婦仁人，是像一個老母生者， |
| 23:3 | 𪜶佇埃及行淫，就是佇少年的時行淫。佇遐𪜶的奶互人壓，閣佇遐人勒伊在室女的奶頭。 |
| 23:4 | 𪜶的名，大姊名阿荷拉，小妹名阿荷利巴。𪜶攏嫁互我，生子查某子。論到𪜶的名，阿荷拉就是撒瑪利亞，阿荷利巴就是耶路撒冷。 |
| 23:5 | 「阿荷拉嫁互我了後就行淫亂，戀愛伊相好的人，就是伊的隔壁國亞述人。 |
| 23:6 | 𪜶穿藍色的衫，做省長、做官員，攏是可愛的少年人，騎馬的勇士。 |
| 23:7 | 伊就及𪜶行淫，就是及伊所中意的亞述人，見若伊所戀愛者，就用𪜶一切的偶像，來拍垃墋家己。 |
| 23:8 | 伊亦無放拺伊，佇埃及慣練行的淫亂，因為伊猶少年的時，就有人及伊相及睏，勒伊在室女的奶，閣流出伊淫亂的事佇遐。 |
| 23:9 | 因為按呢，我將伊交佇伊相好的人的手，就是伊所戀愛的亞述人的手。 |
| 23:10 | 𪜶就露現伊的下體，用刀刣伊，掠伊的子查某子，互伊佇婦仁人中留臭名，因為𪜶對伊行審判。 |
| 23:11 | 「伊的小妹阿荷利巴看見按呢，就比伊閣卡放縱淫慾，行淫亂比伊的大姊卡傷重。 |
| 23:12 | 伊戀愛隔壁國的亞述人，就是穿極娞的衣服，做省長、做官員，騎馬的勇士，攏是可愛的少年人。 |
| 23:13 | 我看見伊受拍垃墋，姊妹仔二個行像路。 |
| 23:14 | 伊亦加添伊的淫行，因為伊看見人的像畫佇壁裡，就是用朱紅色所畫迦勒底人的像， |
| 23:15 | 腰縖帶，頭殼包彩色的巾垂落來，看了親像軍長，照巴比倫人的形像；𪜶的本所在就是迦勒底。 |
| 23:16 | 伊一下看見就戀愛𪜶，差使者去迦勒底遐見𪜶。 |
| 23:17 | 巴比倫人就來及伊上愛情的眠床，行淫拍垃墋伊。伊受拍垃墋，以後心就及𪜶冷淡。 |
| 23:18 | 按呢，伊露現伊的淫行，閣露現伊的下體；我的心就及伊冷淡，親像前及伊的大姊冷淡一樣。 |
| 23:19 | 伊猶久閣卡淫行，記得伊少年佇埃及地行淫亂的日。 |
| 23:20 | 戀愛伊相好的人，身體勇精足，親像驢親像馬。 |
| 23:21 | 按呢，你就記得你少年的時的淫行。彼時，埃及人壓你的奶，憶著你少年的奶。」 |
| 23:22 | 阿荷利巴啊，主耶和華所以按呢講：「看啊，我欲激動你諸個相好的來攻擊你，就是你的心所冷淡者。我欲互伊四圍來攻擊你。 |
| 23:23 | 就是巴比倫人、迦勒底眾人，及比割、書亞、哥亞諸個族，亞述的眾人及𪜶來，省長、官員、軍長、有名聲的、騎馬的，攏是可愛的少年人。 |
| 23:24 | 𪜶欲帶軍器、戰車、運糧的車、導大隊的眾人來攻擊你。𪜶夯大牌小牌，頭盔，排陣佇你的四圍攻擊你。我欲將審判的事交代𪜶，𪜶欲用𪜶的律法審判你。 |
| 23:25 | 我欲用我的妒忌攻擊你；𪜶欲用大受氣辦你。𪜶欲割你的鼻及耳仔；你所剩的人欲倒佇刀下。𪜶欲掠你的子查某子；閣你所留者欲互火燒燎去。 |
| 23:26 | 𪜶欲剝你的衣服，搶你娞的寶物。 |
| 23:27 | 按呢，我欲互你的淫行及你佇埃及地慣練行的淫亂攏息，互你無閣抬目看𪜶，亦無閣紀念埃及。 |
| 23:28 | 因為主耶和華按呢講：看啊，我欲將你交佇你所怨恨的人的手，就是你的心及𪜶冷淡的人的手。 |
| 23:29 | 𪜶欲怨恨來辦你，搶提你一切勞碌來得著的，剩你一個赤身露體。你淫亂的下體，連你的淫行，及你的淫亂，攏欲露現。 |
| 23:30 | 你會抵著許個代誌；因為你隨外邦人來行淫，閣因為你對𪜶諸個偶像來染垃墋。 |
| 23:31 | 你有行你的大姊的路，所以我欲將伊的杯交佇你的手。」 |
| 23:32 | 主耶和華按呢講：你欲飲你的大姊所飲的杯；彼個杯深閣闊，貯真多，你就欲互人恥笑譏刺。 |
| 23:33 | 你欲大酒醉，大憂苦，飲恁大姊撒瑪利亞的杯，就是互人卬愕淒慘的杯。 |
| 23:34 | 你欲飲此個杯，飲到乾乾。閣咬破杯的坯，拆裂家己的奶；因為此個事我曾講伊。這是主耶和華講的。 |
| 23:35 | 所以主耶和華按呢講：「因為你𣍐記得我，將我㧒佇你的尻脊後，今你著擔當你的淫亂及你放縱私慾的罪。」 |
| 23:36 | 耶和華閣對我講：「人子啊，你欲審問阿荷拉及阿荷利巴嗎？著指出𪜶所行可惡的事。 |
| 23:37 | 𪜶行淫，亦有血佇伊的手，閣及偶像行淫，亦互𪜶對我所生的子經過火互𪜶吞食。 |
| 23:38 | 此個以外，𪜶猶有對我按呢行，就是像日拍垃墋我的聖所，干犯我諸個安息日。 |
| 23:39 | 𪜶刣子獻互偶像，當彼日閣入我的聖所，來拍垃墋伊。看啊，𪜶佇我的厝內按呢行。 |
| 23:40 | 「閣恁差使者去請遠遠的人。使者到𪜶遐的時，看啊，𪜶就來。你為著𪜶洗身軀、畫目眉，用手飾家己妝飾， |
| 23:41 | 坐佇娞的眠床，床前祀一塊桌，將我的香料我的香油排佇彼頂面。 |
| 23:42 | 及伊佇遐的有歸陣的人，安悅歡喜的聲，亦有粗俗人及酒漢對曠野相及來，將手環掛佇𪜶二個的手，將娞帽戴佇𪜶的頭殼。 |
| 23:43 | 「我論到此個老的淫婦有講：現在人猶欲及伊行淫，伊亦欲及人行淫。 |
| 23:44 | 人入去就近伊，親像就近娼妓，按呢𪜶就近二個淫婦，阿荷拉及阿荷利巴。 |
| 23:45 | 欲有義人，照審判淫婦的例，及流人的血的婦仁人的例，來審判𪜶；因為𪜶是淫婦，亦有血佇伊的手。」 |
| 23:46 | 主耶和華按呢講：「我欲導多多人來攻擊𪜶，互𪜶受㧒來㧒去，抵著搶奪。 |
| 23:47 | 許個人欲用石頭擲死𪜶，用刀劍刣死𪜶，閣刣死𪜶的子查某子，用火燒𪜶的厝宅。 |
| 23:48 | 按呢，我欲互境內無閣有淫行，通互一切的婦仁人受警戒，無學恁的淫行。 |
| 23:49 | 人欲照恁的淫行報應恁；恁也欲擔當諸個拜偶像的罪，恁就會知我是耶和華。」 |
