走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 18:1 | 諸個話講了，耶穌及學生出去，過汲淪溪。佇遐有園，耶穌及伊的學生入去。 |
|---|---|
| 18:2 | 賣伊的猶大亦識彼個所在，因為耶穌及伊的學生沓沓聚集佇遐。 |
| 18:3 | 猶大已經領一隊兵，及諸個祭司頭以及法利賽人的差役，抬燈、及火把、及家私，來到遐。 |
| 18:4 | 耶穌知伊所欲抵著一切的事，就出去給𪜶講：「恁尋是誰？」 |
| 18:5 | 應講：「拿撒勒人耶穌。」耶穌給𪜶講：「我就是！」賣伊的猶大亦及𪜶相及啲徛。 |
| 18:6 | 耶穌一下給𪜶講「我就是」，𪜶就倒退跋倒佇地裡。 |
| 18:7 | 所以閣問𪜶：「恁尋是誰？」應講：「拿撒勒人耶穌。」 |
| 18:8 | 耶穌應講：「我已經給恁講，我就是。恁若尋我，著容允諸個人去。」 |
| 18:9 | 這是互伊前所講的話應驗，講：「你所互我的人，我無失落一個。」 |
| 18:10 | 西門彼得有刀，拔起來刜祭司頭的奴僕，削去伊的正耳；奴僕的名叫馬勒古。 |
| 18:11 | 耶穌就給彼得講：「收你的刀入鞘，父所互我的杯，我豈無欲飲嗎？」 |
| 18:12 | 對按呢兵隊及千總，以及猶太人的差役掠耶穌，縛伊， |
| 18:13 | 代先帶伊去見亞那，因為伊是彼年的祭司頭該亞法的丈人。 |
| 18:14 | 前替猶太人打算講「一人為著百姓死是有利益的」就是此個該亞法。 |
| 18:15 | 西門彼得隨耶穌，閣有一個學生隨伊。此個學生是祭司頭所識的，就及耶穌入祭司頭的院。 |
| 18:16 | 若是彼得徛佇門外。所以彼個學生就是祭司頭所識的，出去及顧門的查某人講，就導彼得入去。 |
| 18:17 | 顧門的女婢給彼得講：「你亦敢是此人的學生嗎？」伊講：「呣是。」 |
| 18:18 | 諸個奴僕及差役因為寒，將炭起火，徛啲烘燒；彼得亦及𪜶徛啲烘。 |
| 18:19 | 祭司頭就問耶穌論伊的學生及伊的教示。 |
| 18:20 | 耶穌應講：「我是顯然對世間人講。我常常佇會堂及殿裡教示，就是猶太人攏聚集的所在；佇隱密的所在我未曾講甚麼。 |
| 18:21 | 啥事問我？通問聽的人，看我及𪜶講怎樣；𪜶知，我所講。」 |
| 18:22 | 講息，邊仔啲徛一個差役搧耶穌，講：「你應祭司頭按呢嗎？」 |
| 18:23 | 耶穌應伊講：「我若講呣著，通指正彼個呣著；若著，啥事拍我？」 |
| 18:24 | 耶穌猶原受縛，亞那差伊到祭司頭該亞法的所在。 |
| 18:25 | 彼時西門彼得徛啲烘火，就有人給伊講：「你亦敢是伊的學生嚄？」伊呣認，講：「呣是。」 |
| 18:26 | 有一個祭司頭的奴僕，是互彼得削耳仔者的親人，講：「我豈無看見你及伊佇園內嗎？」 |
| 18:27 | 彼得閣無認。雞隨時啼。 |
| 18:28 | 𪜶就帶耶穌對該亞法的所在到公堂，彼霎天昲光。𪜶家己無入公堂，免得染著垃墋，才通食𨃟過節。 |
| 18:29 | 所以彼拉多出來外面，就近𪜶，講：「恁告此人甚麼案件？」 |
| 18:30 | 應講：「此人若呣是歹人，阮就無將伊交互你。」 |
| 18:31 | 彼拉多就給𪜶講：「恁家己帶去，照恁的律法去辦伊。」猶太人給伊講：「阮無刣人的權。」 |
| 18:32 | 這是欲應驗耶穌前所講的話，指明伊欲甚麼款來死。 |
| 18:33 | 彼拉多閣入公堂，召耶穌來給伊講：「你是猶太人的王嗎？」 |
| 18:34 | 耶穌應講：「你講此個話是對你家己，抑是別人將我的事給你講啊？」 |
| 18:35 | 彼拉多應講：「我豈是猶太人嗎？你本國的人及諸個祭司頭將你交互我。你果然怎樣做啊？」 |
| 18:36 | 耶穌應講：「我的國呣是屬此世間；我的國若屬此世間，就我的差用的確爭戰，免得我交互猶太人。若是今我的國呣是對遮出。」 |
| 18:37 | 彼拉多就給伊講：「按呢，恁是王嗎？」耶穌應講：「你講我是王。我為著按呢出世，為著按呢臨到世間，欲替真理做干證。凡若屬真理的人聽我的聲」。 |
| 18:38 | 彼拉多講：「真理是甚麼？」講息，閣出去就近猶太人，給𪜶講：「我看伊無罪。 |
| 18:39 | 總是恁有例，到𨃟過節我著放一個監犯互恁，恁愛我放猶太人的王互恁嗎？」 |
| 18:40 | 𪜶閣大聲喉叫講：「呣通此個，是著巴拉巴！」此個巴拉巴是土匪。 |
