走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 5:1 | 諸個事以後，有猶太人的節期，耶穌上耶路撒冷， |
|---|---|
| 5:2 | 佇耶路撒冷，近羊門，有池，希伯來的腔口叫做畢士大，有五個兩廊； |
| 5:3 | 彼內面有睛暝的、跛腳的、血枯焦的、多多病人倒啲。有古卷記：聽候水陣動， |
| 5:4 | 因為有時天使落地，互水陣動；水已經陣動，頭一個落池的，不論甚麼病，就好。 |
| 5:5 | 佇遐有一人，破病三十八年。 |
| 5:6 | 耶穌看見伊倒啲，知伊的病已經久，給伊講：「你愛得著好嗎？」 |
| 5:7 | 破病的人應伊講：「主啊，水振動的時，無人通扶我落池；到我來的時，別人代先我落去啦。」 |
| 5:8 | 耶穌給伊講：「起來，夯你的舖仔去行！」 |
| 5:9 | 彼人即時好，就夯伊的舖仔去行。 |
| 5:10 | 彼日是安息日，猶太人就給得著醫好的人講：「今仔日是安息日，你夯舖仔是呣合宜。」 |
| 5:11 | 若是伊應講：「彼個醫好我的，給我講：『夯你的舖仔來行。』」 |
| 5:12 | 𪜶問伊講：「給你講『夯舖仔來行的』是甚麼人？」 |
| 5:13 | 得著好的人呣知伊是是誰；因為耶穌已經去別位，是彼所在的人多。 |
| 5:14 | 後來耶穌佇殿裡抵著伊，就給伊講：「你已經得著好，莫得閣犯罪，驚了你抵著閣卡慘。」 |
| 5:15 | 彼人就去給猶太人講，醫好伊的就是耶穌。 |
| 5:16 | 所以猶太人窘逐耶穌，因為伊佇安息日做諸個代誌。 |
| 5:17 | 耶穌應講：「我的父行代誌到今，我亦行代誌。」 |
| 5:18 | 所以猶太人益發欲刣伊；因為伊呣若犯著安息日，閣講上帝做伊的父，將本身算做及上帝平。 |
| 5:19 | 耶穌就應講：「我實實給恁講，子若呣是看見父行的，就家己𣍐行甚麼；因為見若父所行的，子亦照按呢行。 |
| 5:20 | 因為父疼子，將本身所行的攏總互伊看，亦欲將比諸個卡大的所行互伊看，致到恁奇怪。 |
| 5:21 | 因為親像父互死人起來，閣互𪜶活，子亦是按呢互伊所愛的人復活。 |
| 5:22 | 因為父亦無審判人，獨獨用審判的事攏交代子， |
| 5:23 | 欲互眾人攏尊敬子親像尊敬父。無尊敬子的人，就是無尊敬差伊的父。 |
| 5:24 | 我實實給恁講，聽我的話、亦信差我的，就有永活；𣍐到受審判，是已經出死入活啦。 |
| 5:25 | 我實實給恁講，時欲到，現在就是啦，死人啲欲聽見上帝的子的聲，也聽見的人啲欲活。 |
| 5:26 | 因為親像父佇本身有活命，伊亦是按呢互子佇本身有活命， |
| 5:27 | 閣互伊有權通審判，因為伊是做人子。 |
| 5:28 | 莫得掠此個做奇怪。因為時欲到，見若佇墓內的，欲聽伊的聲，才出來； |
| 5:29 | 行好的，閣起來得著活；行歹的，閣起來受審判。 |
| 5:30 | 「我家己𣍐做甚麼，我照所聽見來審判。我的審判亦是公義；因為我無求家己的意思，就是求差我者的意思。」 |
| 5:31 | 「我若為著家己做干證，我的干證就無真。 |
| 5:32 | 猶有為著我做干證的，我知伊所為著我做干證的是真。 |
| 5:33 | 恁曾差人就近約翰，伊有為著真理做干證。 |
| 5:34 | 若是我所受的干證，呣是對人；獨獨我講諸個，是欲互恁得著救。 |
| 5:35 | 約翰就是燈，點𤏸閣光，恁情願暫時歡喜伊的光。 |
| 5:36 | 總是我有干證比約翰的卡大；因為父所交代我來成的事，就是我所行諸個事，干證我是父所差的。 |
| 5:37 | 差我的父，伊亦曾為著我做干證。恁從來呣曾聽見伊的聲，亦呣曾看見伊的形像。 |
| 5:38 | 閣恁無伊的道理存佇恁；因為伊所差的，恁呣信伊。 |
| 5:39 | 恁講究諸個聖經，因為拍算彼中間恁有永活；亦為著我做干證的就是諸個聖經。 |
| 5:40 | 恁又無欲就近我來得著活。 |
| 5:41 | 「我無對人受榮光。 |
| 5:42 | 總是我知，恁無有上帝的疼佇恁的心。 |
| 5:43 | 我佇我的父的名來，恁呣接納我；若有別人佇家己的名來，恁欲接納伊。 |
| 5:44 | 恁大家相共求榮光，呣求對獨一的上帝來的榮光，怎樣會信？ |
| 5:45 | 莫得拍算我欲對父告恁；有啲告恁的，就是恁所倚靠的摩西。 |
| 5:46 | 恁若信摩西，亦欲信我，因為伊所寫的有論我。 |
| 5:47 | 恁若呣信伊的冊，豈會信我的話啊？」 |
