走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 8:1 | 逐人就倒去𪜶兜；耶穌去橄欖山， |
|---|---|
| 8:2 | 透早閣到佇殿裡。百姓攏就近伊，伊就坐啲，來教示𪜶。 |
| 8:3 | 經學士及法利賽人帶一個婦仁人來，是佇行姦淫的時互人掠著的，已經互伊徛佇中央， |
| 8:4 | 𪜶就對耶穌講：「先生，此個婦仁人是抵抵行姦淫的時互人掠著。 |
| 8:5 | 摩西佇律法命令阮用石頭擲死此號的婦仁人。今你講怎樣？」 |
| 8:6 | 𪜶講按呢，是欲試耶穌，愛得著有縫通告伊。耶穌就俯腰，用指頭仔寫字佇土腳。 |
| 8:7 | 𪜶猶原問伊無息，耶穌就挺身起來，對𪜶講：「恁中間無罪的人，通代先用石頭擲伊。」 |
| 8:8 | 就閣俯腰，用指頭仔寫字佇土腳。 |
| 8:9 | 𪜶聽了，對老到少年，一個一個攏出去，只有耶穌家己佇啲，婦仁人猶原徛佇中央。 |
| 8:10 | 耶穌挺身起來，給伊講：「婦仁人啊，𪜶佇叨落？無人定你的罪嗎？」 |
| 8:11 | 伊講：「主啊，無。」耶穌講：「我亦無定你的罪。去啊，今以後莫得閣犯罪！」 |
| 8:12 | 耶穌閣給眾人講：「我是世間的光。隨我的人，無行佇暗，反轉欲有活命的光。」 |
| 8:13 | 法利賽人就給伊講：「你為著本身做干證，你的干證呣是真。」 |
| 8:14 | 耶穌應講：「我雖罔為著本身做干證，我的干證亦是真；因為我知本身對叨落來，對叨落去；恁呣知我對叨落來，對叨落去。 |
| 8:15 | 恁照肉體擬斷人，我無擬斷人。 |
| 8:16 | 我就若擬斷，我的擬斷是真；因為我呣是家己佇啲，是我及差我的父相及佇啲。 |
| 8:17 | 閣佇恁的律法有記載：『二人的干證就是真。』 |
| 8:18 | 我是為著家己做干證，差我的父亦為著我干證。」 |
| 8:19 | 𪜶就給伊講：「你的父佇叨落？」耶穌應講：「恁呣識我，亦呣識我的父；恁若識我，就亦識我的父。」 |
| 8:20 | 耶穌佇殿裡教示人，佇庫房內講諸個話，亦無人掠伊，因為伊的時猶未到。 |
| 8:21 | 耶穌閣給𪜶講：「我欲去啦，恁欲尋我，亦欲死佇恁的罪。我去的所在，恁𣍐會到。」 |
| 8:22 | 猶太人就講：「伊講『我去的所在，恁𣍐會到』，豈是欲自盡嗎？」 |
| 8:23 | 耶穌給𪜶講：「恁是對下面，我是對頂面；恁是對此世間，我呣是對此世間。 |
| 8:24 | 所以我有給恁講，恁欲死佇恁的罪。因為恁若呣信我是伊，就恁欲死佇恁的罪。」 |
| 8:25 | 𪜶就給伊講：「你是是誰？」耶穌給𪜶講：「就是我對起頭所給恁講的。 |
| 8:26 | 我有多多項欲議論恁，欲判斷恁；獨獨差我的是真，我所對伊聽見的，就傳互世間。」 |
| 8:27 | 𪜶呣知伊所對𪜶講的是指父。 |
| 8:28 | 耶穌就講：「恁舉起人子的時，就知我是伊，亦我所行的無一項對家己。是照父所教示我的來講諸個。 |
| 8:29 | 差我的及我佇啲，伊無放我家己佇啲，因為我常常行伊所歡喜的。」 |
| 8:30 | 當耶穌講諸個話的時，多多人信伊。 |
| 8:31 | 耶穌就對信伊的猶太人講：「恁若常常𫢶佇我的道理，就真正是我的學生； |
| 8:32 | 恁欲識真理，亦真理欲互恁自由。」 |
| 8:33 | 𪜶應伊講：「阮諸個是亞伯拉罕的後裔，從來未曾做人的奴才。你怎樣講『恁欲得著自由』啊？」 |
| 8:34 | 耶穌應講：「我實實給恁講，見若犯罪的就是罪的奴才。 |
| 8:35 | 奴才無永永住佇家內；子就永永住。 |
| 8:36 | 所以子若互恁自由，恁就真正自由。 |
| 8:37 | 我知恁是亞伯拉罕的後裔，獨獨恁愛欲刣我，因為我的道理無存佇恁的心。 |
| 8:38 | 我對我的父看見的，我就講伊；恁對恁的父聽見的，恁就行伊。」 |
| 8:39 | 𪜶應伊講：「阮的父就是亞伯拉罕。」耶穌給𪜶講：「恁若是亞伯拉罕的子，就欲行亞伯拉罕的所行。 |
| 8:40 | 今我是將我對上帝所聽的真理來給恁講的人，亦恁愛欲刣我，這呣是亞伯拉罕的所行。 |
| 8:41 | 恁是行恁的父的所行。」𪜶給伊講：「阮呣是對姦淫來生；阮有一個父，就是上帝。」 |
| 8:42 | 耶穌給𪜶講：「若是上帝做恁的父，恁就疼我；因為我是對上帝出，亦來到遮，呣是自專來，是伊差我。 |
| 8:43 | 恁無明我的話是怎樣？是因為恁𣍐會聽我的道理。 |
| 8:44 | 恁所對伊出的父就是魔鬼，恁的父的私慾恁愛欲行伊。伊對起頭做刣人的，無徛住佇真理，因為伊內面無真理。伊講白賊的時就是對家己所有的來講；因為伊是白賊的，亦做白賊的父。 |
| 8:45 | 因為我講真理，恁呣信我。 |
| 8:46 | 恁中間是誰擬我有罪？我若講真理，恁啥事呣信我？ |
| 8:47 | 對上帝出的，聽上帝的話；恁所以呣聽，因為恁呣是對上帝出。」 |
| 8:48 | 猶太人應伊講：「阮講你是撒瑪利亞人，閣患著鬼，豈無真著？」 |
| 8:49 | 耶穌應講：「我呣是患著鬼；我是尊敬我的父，若是恁侮慢我。 |
| 8:50 | 我無求家己的榮光，有一個啲替我求閣審判的。 |
| 8:51 | 我實實給恁講，人若守我的道理，就永遠無見著死。」 |
| 8:52 | 猶太人給伊講：「今阮知你是患著鬼。亞伯拉罕死，諸個先知亦死，若是你講：『人若守我的道理，就永遠無死。』 |
| 8:53 | 你豈比阮的祖亞伯拉罕卡大嗎？伊已經死，諸個先知亦死，你家己算做甚麼人啊？」 |
| 8:54 | 耶穌應講：「我若榮光家己，我的榮光就呣上算；榮光我的是我的父，就是恁所講做恁的上帝者。 |
| 8:55 | 恁呣識伊；獨獨我識伊。我若講呣識伊，就我是白賊親像恁；獨獨我識伊，亦守伊的道理。 |
| 8:56 | 恁的祖亞伯拉罕極歡喜，是欲看見我的日子，看見就歡喜。」 |
| 8:57 | 猶太人就對伊講：「你未上五十歲豈曾看見亞伯拉罕嗎？」 |
| 8:58 | 耶穌給𪜶講：「我實實給恁講，未有亞伯拉罕我就佇啲。」 |
| 8:59 | 𪜶就提石頭欲擲伊；若是耶穌家己隱密，對殿堂出去。 |
