走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 9:1 | 耶穌行過的時，看見一人出世就睛暝。 |
|---|---|
| 9:2 | 伊的學生問伊講：「拉比，此人出世就睛暝，對是誰犯罪？是伊本身？抑是伊的父母啊？」 |
| 9:3 | 耶穌應講：「此人無犯罪，伊的父母亦無，獨獨欲用伊來顯明上帝的所做。 |
| 9:4 | 時猶是日時，咱著做差我者的工；暝時欲到，彼霎就無人會做工。 |
| 9:5 | 我佇世間的時，是世間的光。」 |
| 9:6 | 諸個話講了，就呸涎佇土腳，用涎攪土，用土糊睛暝人的目睭， |
| 9:7 | 給伊講：「去洗佇西羅亞的池（西羅亞翻譯就是奉差）。」伊就去洗，倒轉來已經會看見。 |
| 9:8 | 伊的厝邊及平素看見伊做乞食的，講：「此人豈呣是坐啲來求乞的嗎？」 |
| 9:9 | 有人講：「就是伊」；有人講：「呣是，是親像伊若定。」，伊家己講：「我就是。」 |
| 9:10 | 𪜶就給伊講：「你的目睭怎樣得著開？」 |
| 9:11 | 伊應講：「彼個名叫耶穌的，攪土糊我的目睭，給我講：『去西羅亞洗。』我隨時去洗，就得著看見。」 |
| 9:12 | 𪜶就給伊講：「彼人佇叨落？」伊講：「我呣知。」 |
| 9:13 | 𪜶導彼個平素睛暝的去見法利賽人。 |
| 9:14 | 耶穌攪土來開伊的目睭的日是安息日。 |
| 9:15 | 所以法利賽人亦問伊是怎樣得著看見。伊就給𪜶講：「伊將土糜下佇我的目睭，我去洗，就看見。」 |
| 9:16 | 法利賽人中有的講：「此人無守安息日，呣是對上帝來。」有的講：「有罪的人豈會行此號神蹟啊？」𪜶對按呢分旁。 |
| 9:17 | 𪜶閣給睛暝人講：「伊已經開你的目睭，你講伊是甚麼號人？」伊講：「是先知人。」 |
| 9:18 | 猶太人呣信伊平素睛暝，會閣看見，到叫得著看見者的父母來， |
| 9:19 | 就問𪜶講：「此個是恁的子，就是恁所講出世睛暝的嗎？今伊怎樣會看見？」 |
| 9:20 | 伊的父母應講：「伊是阮的子，出世睛暝，阮知。 |
| 9:21 | 今伊怎樣得著看見，阮呣知；是誰開伊的目睭，阮亦呣知。伊大漢啦，問伊，伊欲家己講。」 |
| 9:22 | 伊的父母講按呢，是因為驚猶太人；因為猶太人已經有定約，若有認耶穌做基督的，著革出會堂。 |
| 9:23 | 所以伊的父母講：「伊大漢啦，通問伊。」 |
| 9:24 | 𪜶就閣叫平素睛暝者，給伊講：「著歸榮光上帝，阮知此人是有罪的人。」 |
| 9:25 | 伊就應講：「伊是有罪的人抑呣是，我呣知；只有知一項，就是我前睛暝，現今會看見。」 |
| 9:26 | 𪜶就給伊講：「伊給你做甚麼？按怎樣開你的目睭？」 |
| 9:27 | 應講：「我已經給恁講，恁呣聽，啥事愛閣聽？豈是恁亦愛做伊的學生嗎？」 |
| 9:28 | 𪜶就罵伊講：「你就是伊的學生；阮是摩西的學生。 |
| 9:29 | 上帝有對摩西講話是阮所知；獨獨此人，阮呣知伊對叨落來！」 |
| 9:30 | 彼人應講：「這就奇啦！伊開我的目睭，亦恁呣知伊對叨落來。 |
| 9:31 | 咱知上帝無聽有罪的人，獨獨人若敬拜上帝，來行伊的旨意，伊就聽伊。 |
| 9:32 | 對古早以來，未曾聽見出世晴暝者，有人開伊的目睭。 |
| 9:33 | 此人若呣是對上帝來，就無所會做。」 |
| 9:34 | 𪜶就應伊講：「你全然出世佇罪惡中，反轉教示阮嗎？」就革伊出。 |
| 9:35 | 耶穌聽見𪜶革伊出，後來尋著伊，就講：「你信上帝的子嗎？」 |
| 9:36 | 伊應講：「主啊，伊是是誰，互我信伊？」 |
| 9:37 | 耶穌給伊講：「你曾看見伊，現在及你講話的就是。」 |
| 9:38 | 伊就講：「主啊，我信！」就拜伊。 |
| 9:39 | 耶穌講：「我因為審判臨到此世間，互𣍐看見的人，看見；也看見的人，變做睛暝。」 |
| 9:40 | 及伊相及佇啲的法利賽人聽見諸個話，就給伊講：「總無阮亦睛暝嗎？」 |
| 9:41 | 耶穌給𪜶講：「恁若睛暝，就無罪；今恁講『阮看見』，就恁的罪定定佇啲。」 |
