走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 4:1 | 主已經知法利賽人聽見耶穌招著學生，亦給𪜶行洗禮，比約翰卡多，（ |
|---|---|
| 4:2 | 其實耶穌家己無行洗禮，是伊的學生行伊，） |
| 4:3 | 就離開猶太，閣去加利利。 |
| 4:4 | 著對撒瑪利亞經過， |
| 4:5 | 對按呢到撒瑪利亞一個城，名叫敘加，近雅各互伊的子約瑟的地。佇遐有雅各的水井； |
| 4:6 | 耶穌行路倦，就按呢坐佇井邊。彼時約略日中晝。 |
| 4:7 | 有一個撒瑪利亞的婦仁人來汲水，耶穌給伊講：「請互我飲。」（ |
| 4:8 | 因為伊的學生已經入城去買物通來食。） |
| 4:9 | 撒瑪利亞的婦仁人給伊講：「你是猶太人，怎樣對我撒瑪利亞的婦仁人討水飲啊？」是猶太人及撒瑪利亞人無往來。 |
| 4:10 | 耶穌應伊講：「設使你識上帝的恩賜，及對你講『互我飲』的是是誰，你的確求伊，伊就用活水互你。」 |
| 4:11 | 婦仁人講：「主啊，你無汲水的器具，井閣深，對叨落有彼個活水啊？ |
| 4:12 | 阮祖雅各留此個井互阮，伊家己及子兒及精牲攏飲此個井的水，你豈比伊卡大嗎？」 |
| 4:13 | 耶穌應伊講：「飲此個水的攏欲閣嘴乾； |
| 4:14 | 獨獨見若飲我所欲互伊的水的永遠𣍐嘴乾。因為我所互伊的水欲佇伊的內面成做水泉，直直淐起來到永遠活。」 |
| 4:15 | 婦仁人對伊講：「主啊，用此個水互我，互我𣍐嘴乾，亦免來即遠汲。」 |
| 4:16 | 耶穌給伊講：「去叫你的丈夫才閣來。」 |
| 4:17 | 婦仁人應伊講：「我無丈夫。」耶穌給伊講：「你講無丈夫是著。 |
| 4:18 | 因為你曾有五個丈夫，今所有的呣是你的丈夫。你的話真正著。」 |
| 4:19 | 婦仁人給伊講：「主啊，我看你是先知。 |
| 4:20 | 阮祖曾佇此個山敬拜，若是恁講敬拜的所在應該佇耶路撒冷。」 |
| 4:21 | 耶穌給伊講：「婦仁人啊，著信我。時欲到啦，恁敬拜父，亦無佇此個山，亦無佇耶路撒冷。 |
| 4:22 | 恁敬拜恁所呣知的；阮敬拜阮所知的，因為拯救是對猶太人出。 |
| 4:23 | 若是時欲到，現今就是，真實敬拜的，欲用神用真實敬拜父，因為父是愛此號人敬拜伊。」 |
| 4:24 | 上帝是神，敬拜伊的人著用神用真實來敬拜。 |
| 4:25 | 婦仁人給伊講：「我知彌賽亞啲欲到；伊若到，欲用一切的事給阮講。」（彌賽亞翻譯就是基督）。 |
| 4:26 | 耶穌給伊講：「我此個啲及你講話的就是！」 |
| 4:27 | 彼時伊的學生到，奇怪伊及婦仁人講話；獨獨無人講：「你欲甚麼代誌？」抑是講：「你啥事及婦仁人講話？」 |
| 4:28 | 婦仁人隨時放下伊的水瓶，入城，給人講： |
| 4:29 | 「來看！一人我平素行的事，伊攏給我講，此個總無是基督啊？」 |
| 4:30 | 𪜶就出城，來就近耶穌。 |
| 4:31 | 當時，學生求伊講：「拉比，來食。」 |
| 4:32 | 若是伊給𪜶講：「我有米糧通食，恁所呣知的。」 |
| 4:33 | 學生就相及講：「豈有人互伊食嗎？」 |
| 4:34 | 耶穌給𪜶講：「行差我者的旨意，來明白伊的工，就是我的米糧。 |
| 4:35 | 恁豈無講『猶有四月日就收割的時到』嗎？我給恁講，抬目看園，已經熟，通割啦。 |
| 4:36 | 收割的人得著工錢，積聚五穀到永活，互撒種的、收割的相及歡喜。 |
| 4:37 | 因為俗語所講：『此個撒種，彼個收割』，對按呢真正有影。 |
| 4:38 | 我差恁收割恁所無著磨的；別人已經著磨，恁享受𪜶所著磨的。」 |
| 4:39 | 彼個城有撒瑪利亞人多多信伊，是因為婦仁人干證講：「我平素行的事伊攏給我講。」 |
| 4:40 | 對按呢撒瑪利亞人就近耶穌的時，求伊及𪜶住，伊就住遐二日。 |
| 4:41 | 因為伊的話，來信的人閣卡多， |
| 4:42 | 給婦仁人講：「阮今呣是對你的話來信，是親身聽見，知伊真正是世間的救主。」 |
| 4:43 | 過二日，耶穌離開遐，去加利利。 |
| 4:44 | 因為耶穌家己干證講：「先知人佇本所在無尊貴。」 |
| 4:45 | 到加利利的時，加利利人接納伊，因為曾看伊佇耶路撒冷當節期中所行一切的代誌，因為𪜶本身亦有去赴節期。 |
| 4:46 | 耶穌閣到加利利的迦拿，就是伊用水變酒的所在。有王的人臣，伊的子破病佇迦百農。 |
| 4:47 | 聽見耶穌對猶太到加利利，就去就近伊，求伊落去醫治伊的子，因為啲欲死啦。 |
| 4:48 | 耶穌對伊講：「若無看見神蹟奇事，恁的確呣信。」 |
| 4:49 | 王的人臣對伊講：「主啊，趁我的細子猶未死落來去。」 |
| 4:50 | 耶穌給伊講：「去啊，你的子活啦！」彼人信耶穌給伊講的話就去。 |
| 4:51 | 抵抵落去的時，伊的奴僕幾若人抵著伊，給伊講伊的子活啦。 |
| 4:52 | 就問𪜶甚麼時才卡好。𪜶就給伊講：「昨日晝一點鐘熱退。」 |
| 4:53 | 老父知彼時抵抵是耶穌講「你的子活啦」的時；伊家己及全家就攏信。 |
| 4:54 | 此個第二擺的神蹟，是耶穌對猶太到加利利以後所行的。 |
