走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
目的：藉著“福音”說明耶穌，神的兒子，是彌賽亞。而這位受苦的彌賽亞怎樣為人的罪做了贖價。
| 1:1 | 上帝的子，耶穌基督福音的起頭。 |
|---|---|
| 1:2 | 親像佇先知以賽亞的冊所記載講：我差我的使者佇你的面前，來修整你的路。 |
| 1:3 | 有啲叫佇曠野的伊的聲講：著備辦主的路，修直伊的小路， |
| 1:4 | 約翰來，佇曠野行洗禮，傳反悔的洗禮，互人得著赦罪。 |
| 1:5 | 通猶太地及耶路撒冷的眾人攏出來就近伊，認𪜶的罪，佇約但河對伊受洗禮。 |
| 1:6 | 此個約翰穿駱駝毛，腰縖皮帶，食草蜢及山野的蜜。 |
| 1:7 | 伊傳講：「有一個比我卡有權能的，隨尾我來，就屈落來解伊的鞋帶我也𣍐堪得。 |
| 1:8 | 我曾用水給恁行洗禮，伊欲用聖神給恁洗。」 |
| 1:9 | 當諸個日，耶穌對加利利的拿撒勒來，佇約但河對約翰受洗禮。 |
| 1:10 | 即時對水起來，就看見天裂開，聖神親像鴿仔，降臨佇伊的頂面。 |
| 1:11 | 閣對天有聲，講：「你是我所疼的子，我歡喜你。」 |
| 1:12 | 聖神即時迫伊去曠野。 |
| 1:13 | 佇曠野四十日，抵著撒但試，也及野獸相及住，有天使伺候伊。 |
| 1:14 | 約翰已經關監，耶穌到加利利，傳上帝的福音， |
| 1:15 | 講：「日期滿啦，上帝的國近啦。恁著反悔來信福音！」 |
| 1:16 | 耶穌經過加利利的海墘，看見西門及伊的兄弟安得烈拋網佇海裡；因為是討漁人。 |
| 1:17 | 耶穌給𪜶講：「恁來隨我，我欲互恁得著人親像討魚的。」 |
| 1:18 | 𪜶連鞭離開網，來隨伊。 |
| 1:19 | 略仔進前，看見西庇太的子雅各及伊的兄弟約翰佇船裡啲補網。 |
| 1:20 | 伊連鞭招𪜶，𪜶就拜別𪜶老父西庇太及倩工人佇船裡，來隨佇伊的後面。 |
| 1:21 | 𪜶入迦百農，耶穌佇安息日入會堂教示人。 |
| 1:22 | 人奇怪伊的教示；因為伊教示人，親像有權的，無親像經學士。 |
| 1:23 | 抵仔會堂內，有一個患著鬼的人。喉叫講： |
| 1:24 | 「拿撒勒人耶穌，阮及你甚麼干涉？你來欲滅阮嗎？我知你是是誰，就是上帝的聖者。」 |
| 1:25 | 耶穌責備伊講：「你著靜靜！對此人出去。」 |
| 1:26 | 邪神抽惙彼人，大聲叫，就對伊出去。 |
| 1:27 | 眾人攏卬愕，致到相辯論講：「此個是怎樣？是新的教示！伊用權命令邪神，邪神也順趁伊。」 |
| 1:28 | 伊的名聲隨時遍傳加利利的四方。 |
| 1:29 | 𪜶已經出會堂，隨時及雅各、約翰，入西門及安得烈的家。 |
| 1:30 | 西門的丈姆患著熱病倒啲，隨時有人將這給耶穌講。 |
| 1:31 | 伊近倚牽伊的手，互伊起來，熱就退，婦仁人就伺候𪜶。 |
| 1:32 | 到黃昏暗，日落了，有人導攏總有破病的，及患著鬼的人，就近伊。 |
| 1:33 | 通城攏聚集佇門口。 |
| 1:34 | 耶穌醫好逐樣病的人多多，閣趕多多鬼，因為鬼識伊，所以呣准𪜶講。 |
| 1:35 | 隔早起，天猶不止暗，耶穌起來，出去曠野的所在，佇遐祈禱。 |
| 1:36 | 西門及同伴的人追尋伊， |
| 1:37 | 已經抵著就給伊講：「眾人攏啲尋你。」 |
| 1:38 | 伊給𪜶講：「咱來去別位，到附近的埠頭，互我通佇遐傳道，因為我為著此個事才出來。」 |
| 1:39 | 就去遍加利利，入𪜶的會堂，宣傳道理，閣趕鬼。 |
| 1:40 | 有一個癩的就近伊求伊，跪伊，給伊講：「你若肯，就會互我清氣。」 |
| 1:41 | 耶穌可憐，伸手摸伊，給伊講：「我肯，你通清氣！」 |
| 1:42 | 癩即時除去，伊就清氣。 |
| 1:43 | 耶穌嚴嚴警戒伊，隨時教伊去， |
| 1:44 | 也給伊講：「著謹慎，莫得給人講甚麼，獨獨著去將本身互祭司驗，亦為著你得著清氣，獻摩西所吩咐的，來做證據佇人。」 |
| 1:45 | 總是伊出去，就大大宣傳，四界報揚此個事，致到耶穌無通閣顯然入城，獨獨住佇外面曠野的所在。人對四方就近伊。 |
- 本章節結束 -
下一章