走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 3:1 | 耶穌閣入會堂，佇遐有人一手枯焦的。 |
|---|---|
| 3:2 | 𪜶當看伊佇安息日欲醫治伊抑無，意思愛欲告伊。 |
| 3:3 | 伊就給手枯焦的講：「起來，徛佇中央。」 |
| 3:4 | 就給𪜶講：「安息日行好行歹，救生命害生命，叨落一項是合？」𪜶靜靜。 |
| 3:5 | 伊就受氣四界看𪜶，憂悶𪜶的心硬，給彼個人講：「伸你的手！」伊就伸去，手就好好。 |
| 3:6 | 法利賽人出去，就隨時及希律的黨相及計謀攻擊耶穌看通怎樣滅伊。 |
| 3:7 | 耶穌及伊的學生退去海邊，有歸大陣的人對加利利隨伊。 |
| 3:8 | 也有對猶太、耶路撒冷、以土買、約但河外，及推羅、西頓境內，歸大陣的人聽見伊所行許呢大的事，就來就近伊。 |
| 3:9 | 因為人多，伊就給伊的學生講著備辦船仔來聽候，免得𪜶挨夾伊。 |
| 3:10 | 因為伊曾醫好多多人，致到凡有破病的，迫倚愛欲摸伊。 |
| 3:11 | 許個邪神一下看見伊，就仆佇伊的面前，喉叫講：「你是上帝的子。」 |
| 3:12 | 伊捷捷警戒𪜶，莫得給伊報揚。 |
| 3:13 | 伊上山，照家己所愛來召人；𪜶來就近伊。 |
| 3:14 | 就設立十二人，通及伊常常佇啲，也通差𪜶去宣傳道理， |
| 3:15 | 閣有趕鬼的權。 |
| 3:16 | 就稱西門做彼得， |
| 3:17 | 閣有西庇太的子雅各及雅各的兄弟約翰（此二人伊稱𪜶做半尼其，就是雷的子）， |
| 3:18 | 閣有安得烈、腓力、巴多羅買、馬太、多馬、亞勒腓的子雅各，閣達太，及加拿尼的西門， |
| 3:19 | 及賣伊的加略人猶大。 |
| 3:20 | 耶穌入厝，眾人閣聚集，致到𪜶徛𣍐顧得食。 |
| 3:21 | 伊的親人聽見，就出來欲給伊掠啲，因為講伊是癲狂。 |
| 3:22 | 對耶路撒冷落來的經學講士講：「伊是互別西卜附身」；閣講：「伊是倚靠鬼王來趕鬼。」 |
| 3:23 | 伊叫𪜶來，設譬喻給𪜶講：「撒旦豈可會趕撒但？ |
| 3:24 | 國若家己爭拚，彼個國就徛𣍐住； |
| 3:25 | 家若家己爭拚，彼個家也徛𣍐住。 |
| 3:26 | 撒但若起來家己爭拚，伊也徛𣍐住，的確會滅。 |
| 3:27 | 無人會入猛人的厝，來劫伊的家伙；著代先縛彼個猛人，然後才欲劫伊的厝。 |
| 3:28 | 我實在給恁講，見若世間人所犯的罪及𪜶所謗瀆一切謗瀆的話攏欲赦免𪜶； |
| 3:29 | 獨獨見若謗瀆聖神的，永遠無得著赦免，就是犯著永世代的罪。」 |
| 3:30 | 這是因為許個人講：「伊患著邪神。」 |
| 3:31 | 伊的老母及伊的兄弟來，徛佇外面，差人去叫伊。 |
| 3:32 | 有歸陣的人圍伊啲坐，有人給伊講：「你看，你的老母及你的兄弟佇外面啲尋你。」 |
| 3:33 | 伊就應講：「甚麼人是我的老母？我的兄弟啊？」 |
| 3:34 | 就四界看許個圍伊啲坐的人，講：「你看，我的老母，及我的兄弟。 |
| 3:35 | 因為見若行上帝的旨意的就是我的兄弟姊妹及老母。」 |
