走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 15:1 | 到天光，許個祭司頭、長老、經學士及全公會相及議論，縛耶穌，帶伊去交互彼拉多。 |
|---|---|
| 15:2 | 彼拉多問伊講：「你是猶太人的王嗎？」伊應講：「你講就是。」 |
| 15:3 | 祭司頭用多多項告伊。 |
| 15:4 | 彼拉多閣問伊講：「你攏無應嗎？你看，𪜶告你許多項。」 |
| 15:5 | 若是耶穌猶久無應，致到彼拉多奇怪。 |
| 15:6 | 到節期，總督應有放一個犯人互𪜶，照𪜶所求的。 |
| 15:7 | 有一人名巴拉巴，及許個作亂的人同受縛。𪜶佇作亂的時，曾刣死人。 |
| 15:8 | 眾人就起，去求彼拉多照常來行。 |
| 15:9 | 彼拉多應講：「恁愛我放猶太人的王互恁嗎？」 |
| 15:10 | 因為知，許個祭司頭是為著怨妒才解送伊。 |
| 15:11 | 若是許個祭司頭使唆眾人，寧可求放巴拉巴互𪜶。 |
| 15:12 | 彼拉多閣應講：「按呢，就恁所叫做猶太人的王的，我著怎樣辦伊？」 |
| 15:13 | 𪜶閣喉叫講：「釘伊佇十字架！」 |
| 15:14 | 彼拉多給𪜶講：「怎樣啊？伊做甚麼歹？」總是𪜶愈大聲喉叫講：「釘伊佇十字架！」 |
| 15:15 | 彼拉多因為愛互眾人歡喜，就放巴拉巴互𪜶，已經鞭拍耶穌，就發交去釘十字架。 |
| 15:16 | 兵丁拖伊入院內，就是公堂就會齊通營。 |
| 15:17 | 用紫色的袍互伊穿，閣編莿仔的冕旒給伊戴， |
| 15:18 | 就給伊請安講：「猶太人的王，平安！」 |
| 15:19 | 閣用蘆竹捽伊的頭殼，給伊呸涎，跪落拜伊。 |
| 15:20 | 戲弄息，彼領紫色的袍就給伊褪起來，將伊家己的衫給伊穿落去，帶伊出，欲釘伊十字架。 |
| 15:21 | 有古利奈人西門，就是亞力山大及魯孚的老父，對山場來，按遐過，𪜶勉強伊相及去，來夯耶穌的十字架。 |
| 15:22 | 𪜶帶耶穌到各各他的所在（翻譯就是頭殼碗的所在）， |
| 15:23 | 用攪沒藥的酒互伊，耶穌呣受。 |
| 15:24 | 就釘伊佇十字架，分伊的衣服，拈鬮看甚麼人得著甚麼。 |
| 15:25 | 彼時九點鐘就釘伊佇十字架。 |
| 15:26 | 用斬條寫伊的罪狀，講：「猶太人的王。」 |
| 15:27 | 也有二個賊及伊同釘十字架，一個佇正旁，一個佇倒旁。 |
| 15:28 | ｛這應驗經上的話說：『算伊及不法的人同列。』〔台語羅馬譯本無此節！〕｝ |
| 15:29 | 經過的人褻瀆伊，搖頭講：「唉啊！你毀壞殿，三日起伊的， |
| 15:30 | 今著救家己，對十字架落來！」 |
| 15:31 | 許個祭司頭及經學士也是按呢恥笑伊，相及講：「伊曾救別人，也𣍐會救家己。 |
| 15:32 | 以色列的王基督，今著對十字架落來，互阮看，來信伊。」同釘佇十字架者也罵伊。 |
| 15:33 | 日中晝，全地黑暗，到三點鐘的時。 |
| 15:34 | 三點鐘的時耶穌大聲叫講：「以羅伊！以羅伊！拉馬撒巴大尼？」（翻譯就是：我的上帝！我的上帝！你啥事放離我？） |
| 15:35 | 邊頭徛者，有人聽見就講：「你看，伊啲叫以利亞！」 |
| 15:36 | 有一人走去，用海絨浸醋，縖佇蘆竹仔尾，互伊吸，講：「且慢，試看以利亞來救伊落來抑無。」 |
| 15:37 | 耶穌大聲叫，氣就斷。 |
| 15:38 | 殿內的帳簾對頂到下裂做二旁。 |
| 15:39 | 百總徛佇耶穌的對面看見伊按呢氣斷，就講：「此人真正是上帝的子！」 |
| 15:40 | 閣有幾若個婦仁人對遠遠啲看；從中有抹大拉的馬利亞，及小雅各、約西的老母馬利亞，以及撒羅米， |
| 15:41 | 就是耶穌佇加利利的時，跟隨來服事伊者，也有多多婦仁人及耶穌同上耶路撒冷的，攏遠遠啲看。 |
| 15:42 | 已經暗，因為彼日是備辦節的日，就是安息日前的一日， |
| 15:43 | 有亞利馬太的約瑟來，伊是尊貴的議員，本身也是欣慕上帝的國的。好膽入去見彼拉多，求耶穌的身屍； |
| 15:44 | 彼拉多奇怪伊已經死，叫百總來問，看伊死久未。 |
| 15:45 | 已經對百總得著知，就用身屍互約瑟。 |
| 15:46 | 約瑟買幼苧布，收耶穌落來，用幼苧布包伊，下佇石磐所拍的墓，也翱一塊石佇墓門。 |
| 15:47 | 抹大拉的馬利亞，及約西的老母馬利亞，看見伊所埋葬的所在。 |
