走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 5:1 | 𪜶就到海的對面岸到格拉森人的地方。 |
|---|---|
| 5:2 | 耶穌離開船，連鞭有一人對墳墓中出來抵著伊，就是互邪神附身者，平素徛起佇墳墓中。 |
| 5:3 | 無人會縛伊，雖然用鐵鍊也𣍐會； |
| 5:4 | 因為沓沓用腳銬鐵鍊縛伊，若是鐵鍊互伊掇斷，腳銬互伊摃碎；無人有氣力通制壓伊。 |
| 5:5 | 暝日常常佇墳墓中佇山裡喉叫，將石頭家己傷。 |
| 5:6 | 遠遠看見耶穌，就走來拜伊， |
| 5:7 | 大聲喉叫講：「至高上帝的子耶穌，我及你甚麼干涉？我指上帝來懇求你，莫得苦楚我！」 |
| 5:8 | 因為耶穌曾給伊講：「邪神啊，著對彼個人出去！」 |
| 5:9 | 耶穌問伊講：「你號做甚麼名？」應講：「我名做『營』，因為阮諸個真多」； |
| 5:10 | 伊就切切求伊，莫得趕𪜶出彼個地方。 |
| 5:11 | 佇彼個山坪，有大陣豬啲討食； |
| 5:12 | 𪜶就求伊講：「差阮入許個豬，互阮通入去。」 |
| 5:13 | 就允𪜶，許個邪神就出去，來入許個豬。彼陣豬走落山坪，落海，約量二千隻，佇海裡激死。 |
| 5:14 | 顧豬的人走去，給城內及鄉社的人講。人就出來，看所抵著的事是怎樣。 |
| 5:15 | 就來就近耶穌，看見彼個患著鬼者，就是互營所纏的，坐啲穿衫，嗐哉，就驚。 |
| 5:16 | 看見的人，將患著鬼的人所抵著的及歸陣豬的事攏給𪜶講； |
| 5:17 | 𪜶就求耶穌離開𪜶的境內。 |
| 5:18 | 耶穌抵仔上船，彼個曾患著鬼者求伊准伊相及去。 |
| 5:19 | 耶穌呣允伊，講：「倒去你的家，尋你的親人，將主給你行許大的事，及所憐憫你的，給𪜶講。」 |
| 5:20 | 彼人去，佇低加波利報揚耶穌所給伊行的大事，眾人攏奇怪。 |
| 5:21 | 耶穌坐船閣過去彼旁，歸大陣的人聚集就近伊；彼時耶穌佇海邊。 |
| 5:22 | 有一個管會堂者，名做睚魯來，已經看見耶穌，就仆佇伊的腳下， |
| 5:23 | 切切求伊，講：「我細漢的查某子差不多欲死，請你來用手按伊，互伊得著救，來活。」 |
| 5:24 | 耶穌及伊去。歸大陣的人隨伊，真挨夾。 |
| 5:25 | 有一個婦仁人，血漏十二年， |
| 5:26 | 曾對多多的醫生受著多多艱苦，閣一盡破費伊所有的，若是無一絲仔利益，反轉愈傷重。 |
| 5:27 | 聽見耶穌的事，就來佇眾人中，對伊的後面來摸伊的衫， |
| 5:28 | 因為講：「我干單摸伊的衫，就會好。」 |
| 5:29 | 對按呢血漏連鞭止；本身知伊的病疼已經好。 |
| 5:30 | 耶穌即時家己知有權能對伊出，就越轉身佇眾人中，講：「是誰摸我的衫？」 |
| 5:31 | 伊的學生給伊講：「你看見歸陣人啲挨夾你，猶久問『是誰有摸我』？」 |
| 5:32 | 耶穌遍遍看，愛看做此個事的婦仁人。 |
| 5:33 | 婦仁人知本身所歷過，驚惶愕愕惙，就來仆佇伊的面前，攏照實給伊講。 |
| 5:34 | 伊就給伊講：「婦仁人啊，你的信已經救你，通安然倒去！你的病全然好。」 |
| 5:35 | 啲講的時，有對管會堂的家來，講：「你的查某子死啦，乜使猶啲勞煩先生？」 |
| 5:36 | 耶穌邊仔聽見所講的話，給管會堂者講：「莫得驚，只有著信！」 |
| 5:37 | 耶穌佇彼得、雅各，及雅各的兄弟約翰以外，呣准別人隨伊相及去。 |
| 5:38 | 到管會堂的家；看見有嘩嘩哮，也有啼哭大聲哮的人， |
| 5:39 | 已經入去，就給𪜶講：「恁啥事嘩嘩哮啲啼哭啊？囝仔呣是死，是啲睏若定。」 |
| 5:40 | 𪜶就恥笑伊。若是伊趕𪜶眾人出去，就導囝仔的父母以及及伊來的人入囝仔所住的所在， |
| 5:41 | 就牽囝仔的手，給伊講：「大利大，古米！」（翻譯就是講：「查某囝仔，我命令你起來！」） |
| 5:42 | 查某囝仔連鞭起來行。因為伊十二歲啦；眾人就大卬愕奇怪。 |
| 5:43 | 耶穌嚴嚴禁戒𪜶，莫得互人知，就吩咐著互查某囝仔食。 |
