走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 7:1 | 有法利賽人及幾若個經學士聚集就近耶穌，𪜶是對耶路撒冷來。 |
|---|---|
| 7:2 | 也曾看見伊的學生中有的用俗手啲食，就是未有洗的手。（ |
| 7:3 | 因為法利賽人及眾猶太人攏是拘執古早人的流傳，若無出力洗伊的手就無食； |
| 7:4 | 對街市倒來，若無洗也無食；𪜶所受來執守的猶有多多項，親像洗杯、罐、銅器許個。） |
| 7:5 | 法利賽人及經學士問伊講：「你的學生無照古早人的流傳來行，用俗手來食是怎樣？」 |
| 7:6 | 伊給𪜶講：「以賽亞所讖語指恁假好的人真正著。照所記載講：此個百姓用嘴唇尊敬我，若是𪜶的心離開我遠遠。 |
| 7:7 | 𪜶敬拜我是空空，因為𪜶用人所命令做教示，來教示人。 |
| 7:8 | 按呢恁是放拺上帝的誡命，拘執人的流傳」； |
| 7:9 | 閣給𪜶講：「恁實在是棄拺上帝的誡命，欲守恁的流傳。 |
| 7:10 | 因為摩西曾講：『著尊敬你的老父及你的老母』；閣講：『罵父罵母的人，的確著互伊死。』 |
| 7:11 | 若是恁講：『人若對伊的父抑是伊的母講：你本所會通對我得著的利益，已經做各板』（就是講禮物）， |
| 7:12 | 以後恁就呣准伊用甚麼服事伊的父抑是伊的母。 |
| 7:13 | 是將恁所傳授的流傳，廢無上帝的道理。閣恁所做的多多親像此號款。」 |
| 7:14 | 就閣叫眾人就近伊，給𪜶講：「恁攏著聽我，來曉悟。 |
| 7:15 | 見若對人的外面入的𣍐會染垃墋人，獨獨對人的內面出的諸個就是染垃墋人。」 |
| 7:16 | ｛有耳孔通聽的，著聽！〔台語羅馬譯本無此節！〕｝ |
| 7:17 | 耶穌離開眾人，入厝，伊的學生將此個譬喻問伊。 |
| 7:18 | 伊就給𪜶講：「恁也按呢𣍐曉悟嗎？豈呣知見若對外面入佇人的，𣍐會染垃墋人， |
| 7:19 | 因為呣是入伊的心，就是入伊的腹肚，來放佇廁池（伊講按呢，是互逐項的食物攏清氣）」； |
| 7:20 | 閣講：「對人的內面出的，就是染垃墋人； |
| 7:21 | 因為對內面，就是對人的心，出諸個歹念頭、私通、 |
| 7:22 | 偷提、刣人、姦淫、貪心、邪惡、奸詐、好色、歹目、誹謗、驕傲猖狂。 |
| 7:23 | 凡若諸個歹攏是對內面出，也染垃墋人。」 |
| 7:24 | 耶穌對遐起身，去到推羅、西頓的交界，入一間厝，呣愛人知，若是囥𣍐密。 |
| 7:25 | 連鞭有一個婦仁人，伊的細漢查某子互邪神附身，聽見耶穌的事，就來仆佇伊的腳下。 |
| 7:26 | 此個婦仁人是希利尼人，屬敘利非尼基的族。伊求耶穌趕鬼離開伊的查某子。 |
| 7:27 | 耶穌給伊講：「著互囝仔代先食飽，因為提囝仔的餅㧒互狗是呣好。」 |
| 7:28 | 婦仁人應伊講：「主啊，是啦；總是桌腳的狗也食細子的餅碎。」 |
| 7:29 | 耶穌給伊講：「因為此句話，你通倒去；鬼已經離開你的查某子出去。」 |
| 7:30 | 婦仁人倒去𪜶兜，看見查某子倒佇眠床，鬼已經出去。 |
| 7:31 | 耶穌閣對推羅的境界，經過西頓，對低加波利境的中央，到加利利海。 |
| 7:32 | 有人導一個臭耳聾掛舌根者的就近伊，求伊給伊按手。 |
| 7:33 | 耶穌導彼人離開眾人，到邊頭，就用指頭仔探伊雙旁的耳孔，閣呸涎來摸伊的舌， |
| 7:34 | 向天吐氣，給伊講；「以法大！」就是講：「開！」 |
| 7:35 | 伊雙邊的耳孔就開，舌根也解，講話明明。 |
| 7:36 | 耶穌警戒𪜶莫得給人講；總是愈警戒，𪜶愈報揚。 |
| 7:37 | 也不止奇怪，講：「伊所做攏是好，互臭耳聾者聽見，啞口者講話。」 |
