走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 14:1 | 論到亢旱的事，耶和華的話臨到耶利米： |
|---|---|
| 14:2 | 猶大悲哀，城門衰敗。人穿黑衫坐佇土腳；耶路撒冷悲哀的聲透到頂面。 |
| 14:3 | 𪜶的世家差囝仔工去汲水；𪜶到井裡，尋無水，就帶空的器具倒來，見誚漏氣，罩頭殼。 |
| 14:4 | 作田人見誚罩頭殼；是因為無落雨，土地徛裂。 |
| 14:5 | 田野的鹿母生子，就放㧒擲，因為無草。 |
| 14:6 | 野驢徛佇光裸裸高的所在，喘氣親像野狗；因為無草，目睭失明。 |
| 14:7 | 耶和華啊，阮的罪過雖然做干證告阮，猶久求你為著你的名來做代誌。阮沓沓悖逆，得罪你。 |
| 14:8 | 以色列所向望者、佇患難中做救主者啊，你啥事佇此所在親像寄腳者，閣親像過路人越來歇過暝啊？ |
| 14:9 | 你啥事親像卬愕的人，親像𣍐會救人的勇士啊？耶和華啊，你猶原佇阮中間；阮亦稱做屬你的名的人，呣通放拺阮。 |
| 14:10 | 耶和華對此個百姓按呢講：𪜶愛放蕩，無約束𪜶的腳，所以耶和華呣接納𪜶。今欲記得𪜶的罪過，辦𪜶的罪惡。 |
| 14:11 | 耶和華閣對我講：「莫得為著此個百姓祈禱求福氣。 |
| 14:12 | 𪜶禁食的時，我呣聽𪜶的求叫；𪜶獻燒祭及禮物，我亦呣接納；我反轉欲用刀劍、用飢荒、用瘟疫來滅𪜶。」 |
| 14:13 | 我就講：「嗐啊！主耶和華啊，看啊，許個先知對𪜶講：『恁𣍐看見刀劍，亦𣍐抵著飢荒；耶和華欲佇此個地方賞賜恁久長的平安。』」 |
| 14:14 | 耶和華對我講：「許個先知託我的名傳白賊，我無差𪜶，無吩咐𪜶，亦無對𪜶講；𪜶傳互恁的，是虛假的啟示及占卜，及無影的事，以及𪜶的心的詭詐。 |
| 14:15 | 所以耶和華按呢講：論到託我的名來傳報的許個先知，我並無差𪜶；𪜶猶久講此個地𣍐會抵著刀劍飢荒，其實許個先知欲對刀劍飢荒來滅無。 |
| 14:16 | 閣聽𪜶傳報的百姓欲因為飢荒刀劍受㧒擲佇耶路撒冷的街路，𪜶及某及子查某子，攏無人埋葬。我欲將𪜶的歹傾佇𪜶的身上。」 |
| 14:17 | 你著將此個話給𪜶講：願我的目屎日暝流無息，因為我的百姓抵著大毀傷拍到真殄。 |
| 14:18 | 我若出去田裡，就看見有互刀刣者；我若入城，就看見有對飢荒來破病者；先知及祭司佇國內四界行，亦攏𣍐曉得。 |
| 14:19 | 你一盡棄拺猶大嗎？你的心厭惡錫安嗎？啥事拍阮，亦無通得著醫好？阮向望平安，亦無有福氣；向望醫治的機會，無拍算抵著驚惶。 |
| 14:20 | 耶和華啊，阮認家己的罪惡，及阮的列祖的罪過，因為阮得罪你。 |
| 14:21 | 求你因為你的名的緣故，莫得厭惡阮，莫得凌辱你榮光的寶座。求你追念，莫得背你及阮所立的約。 |
| 14:22 | 外邦無影跡的神明，有一個會落雨嗎？天會家己落大雨嗎？耶和華──阮的上帝啊，會按呢者豈呣是你嗎？所以阮猶原欲聽候你，因為這攏是你所做的。 |
