走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 50:1 | 耶和華託先知耶利米論巴比倫，論迦勒底人的地所講的話。 |
|---|---|
| 50:2 | 恁著傳報佇列邦中互𪜶聽見，著徛大旗；著互𪜶聽見，呣通隱瞞，講：巴比倫受攻破，彼勒見誚，米羅達拍歹。伊的佛攏見誚；伊的偶像攏拍歹。 |
| 50:3 | 「因為有一國對北方起來攻擊伊，欲互伊的地拋荒，無人徛起，人及精牲攏走去。」 |
| 50:4 | 耶和華講：「彼日、彼時，以色列人欲來，𪜶欲及猶大人相及來，𪜶欲行路，愈行愈哮，來尋𪜶的上帝──耶和華。 |
| 50:5 | 𪜶問錫安的事，面向遐，講：『來啦，恁著結永遠無𣍐記得的約來及耶和華聯合。』 |
| 50:6 | 「我的百姓做迷路的羊，𪜶的牧者互𪜶行差路，互𪜶越去山裡。𪜶對大山行到小山，𣍐記得𪜶安息的所在。 |
| 50:7 | 見若抵著𪜶的，欲吞食𪜶。𪜶諸個對敵講：『阮無罪；因為𪜶得罪耶和華，就是公義徛起的所在，也是𪜶的列祖所向望的耶和華。』 |
| 50:8 | 「恁著對巴比倫中逃走，對迦勒底人的地出去，著親像公的山羊佇羊群的頭前。 |
| 50:9 | 我欲激動多多大國對北方相及來攻擊巴比倫，𪜶欲排陣攻擊伊；伊欲對遐受攻破。𪜶的箭欲親像𠢕射的勇士的箭，攏無空空倒轉來。 |
| 50:10 | 迦勒底欲互人搶去；見若搶伊的攏欲滿意。這是耶和華講的。」 |
| 50:11 | 搶我的業者啊，因為恁歡喜快樂，因為恁跳來跳去親像踏五穀的牛母，也啲哮親像勇的馬。 |
| 50:12 | 恁的老母欲見誚到極，生你的的確漏氣。看啊，伊欲列佇諸個國的路尾，成做曠野、做乾燥的地、做沙漠。 |
| 50:13 | 因為耶和華的大受氣，的確無人徛起，欲全然拋荒。見若經過巴比倫的欲卬愕，也因為伊所抵著諸個災禍來恥笑伊。 |
| 50:14 | 開弓的人啊，恁著佇巴比倫四圍排陣，著射箭攻擊伊。莫得保惜恁的箭，因為伊有得罪耶和華。 |
| 50:15 | 恁著佇伊的四圍喝喊；伊已經投降。伊的營寨倒壞啦，城牆拆毀啦，因為這是耶和華報讎的事。恁著向伊報讎；伊怎樣款待人，也著按呢款待伊。 |
| 50:16 | 恁著對巴比倫剪除撒種的及收割的時抬鐮仔的。因為驚壓制的刀劍逐人欲倒去本族，逐人欲走到本所在。 |
| 50:17 | 「以色列是四散的羊，是互獅趕走的。代先是亞述王吞伊，路尾此個巴比倫王尼布甲尼撒，遏折伊的骨頭。」 |
| 50:18 | 所以萬軍的耶和華──以色列的上帝按呢講：「看啊，我欲刑罰巴比倫王及伊的地，親像我曾刑罰亞述王一樣。 |
| 50:19 | 我欲閣導以色列倒來伊的草場，伊欲佇迦密及巴珊食草，閣佇以法蓮山及基列地，伊的心得著飽足。」 |
| 50:20 | 耶和華講：「彼日，彼時欲查以色列的罪過，也攏總無；欲尋猶大的罪惡，也尋無；因為我所留啲的百姓我欲赦免𪜶。」 |
| 50:21 | 耶和華講：著上去攻擊米拉大翁的地，及比割徛起的百姓。著追趇一盡刣𪜶，照我一切所吩咐你的去行。 |
| 50:22 | 境內有交戰的聲及大毀滅。 |
| 50:23 | 拍全地的大支鎚怎樣拍折毀壞啊？巴比倫佇列國中怎樣拋荒啊？ |
| 50:24 | 巴比倫啊，我為你設活罩，你互你罩著也呣知。你互人尋著，掠著；因為你及耶和華做對敵。 |
| 50:25 | 耶和華已經開伊的軍藏局，抬出伊大受氣的器械；因為主──萬軍的耶和華有代誌佇迦勒底人的地。 |
| 50:26 | 恁著對極遠的邊界來攻擊伊，開伊的粟倉，㧒伊成土堆，一盡滅伊，無留半項。 |
| 50:27 | 著刣伊一切的牛牨，互𪜶落去受刣。𪜶有災禍啊！因為辦𪜶的日，彼個期已經到。 |
| 50:28 | （有對巴比倫地逃走出來者的聲，佇錫安報告耶和華──咱的上帝報讎，就是伊為著伊的殿來報讎。） |
| 50:29 | 「著招集射箭的兵就是一切開弓者來攻擊巴比倫。佇伊的四圍紮營來拍伊，呣通互伊走一個，照伊所做的報應伊；伊怎樣款待人，著照按呢款待伊，因為伊驕傲悖逆耶和華──以色列的聖者。 |
| 50:30 | 因為按呢伊的少年人欲佇伊的街市倒落去。當彼日，一切的兵丁欲滅無。這是耶和華講的。」 |
| 50:31 | 主──萬軍的耶和華講：看啊，驕傲者啊，我做你的對敵，因為我辦你的日彼個期已經到。 |
| 50:32 | 驕傲者觸著跋倒，無人扶伊起來。我欲互火佇伊許個城𤏸起來，將伊四圍所有的一盡燒燎去。 |
| 50:33 | 萬軍的耶和華按呢講：「以色列人及猶大人平平受壓制；凡若掠𪜶者攏給伊顧住住，呣肯放伊去。 |
| 50:34 | 救贖𪜶者有大氣力，伊的名是萬軍的耶和華。伊欲伸𪜶的冤，互全地得著平安，亦互巴比倫徛起的百姓愕愕惙。」 |
| 50:35 | 耶和華講：有刀劍臨到迦勒底人及巴比倫徛起的百姓，及𪜶的貴族及𪜶的博士。 |
| 50:36 | 有刀劍臨到誇口的人，𪜶就成做戇；有刀劍臨到伊的勇士，𪜶就驚惶。 |
| 50:37 | 有刀劍臨到伊的馬，伊的車，及其中的雜色人；𪜶欲親像婦仁人一樣。有刀劍臨到伊的寶物，就受搶奪。 |
| 50:38 | 有亢旱臨到伊攏總的水，就欲焦啦去；因為這是雕刻偶像的地，人因為神佛來顛狂。 |
| 50:39 | 所以曠野的走獸及豺狼欲踮佇遐，刀劍亦欲踮佇彼中間，永永無人煙，代代無人徛。」 |
| 50:40 | 耶和華講：「的確無人徛起佇遐，亦無人寄腳佇𪜶中間，欲親像我──上帝捙倒所多瑪、蛾摩拉，及附近的城一樣。 |
| 50:41 | 看啊，有百姓對北方來，亦有大國及多多君王受激動，對地極來。 |
| 50:42 | 𪜶抬弓及槍，殘忍無憐憫；𪜶的聲親像海湧嘩嘩哮。𪜶騎馬排隊，親像上陣的人，巴比倫的城啊，𪜶欲攻擊你。 |
| 50:43 | 巴比倫王聽見𪜶的風聲，手就軟落去，痛苦給伊擒住，痛疼親像欲生子的婦仁人。 |
| 50:44 | 「看啊，伊欲親像獅對約但河邊的樹林起來，攻擊堅固徛起的所在。目徛久，我欲互𪜶逃走，離開此個所在。是誰受揀選，我就派伊治理此個地。是誰會比得我？是誰會給我定一個期啊？有甚麼牧者會徛佇我的面前啊？ |
| 50:45 | 所以恁著聽耶和華所計劃攻擊巴比倫的計策，以及伊所註定攻擊迦勒底的旨意。𪜶定著欲將許個羊群的細者拖去，伊也欲互𪜶徛起的所在荒廢。 |
| 50:46 | 因為巴比倫倒壞的聲，地就振動，𪜶喉叫的聲聽佇列邦中。」 |
