走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 32:1 | 猶大王西底家第十年，就是尼布甲尼撒十八年，有耶和華的話臨到耶利米。 |
|---|---|
| 32:2 | 彼時，巴比倫王的軍隊圍困耶路撒冷，先知耶利米關佇拘留所的院，佇猶大王的厝； |
| 32:3 | 因為猶大王西底家已經將伊關禁，講：「你啥事讖語講，耶和華按呢講：『看啊，我欲將此個城交佇巴比倫王的手，伊欲取伊。 |
| 32:4 | 猶大王西底家的確𣍐脫離迦勒底人的手，定著欲交佇巴比倫王的手，亦欲及伊講話，嘴對嘴，伊的目睭亦欲看伊的目睭。 |
| 32:5 | 西底家欲互伊帶到巴比倫；住佇遐，到我眷顧伊的時。恁雖然及迦勒底人交戰，亦無利益。這是耶和華講的。』」 |
| 32:6 | 耶利米講：「耶和華的話臨到我講： |
| 32:7 | 『看啊，你的叔沙龍的子合拿篾欲來見你，講：我佇亞拿突彼區田，請你買伊；因為贖回的權在佇你，你通買。』」 |
| 32:8 | 我的叔的子哈拿篾果然照耶和華的話來拘留所的院尋我，對我講：「我佇便雅憫的境內，亞拿突彼區田，請你買；因為承接及贖回的權在佇你。你著買做你的！」我就知這是耶和華的話。 |
| 32:9 | 我就對我的叔的子哈拿篾買亞拿突彼區田，秤彼個價銀互伊，共十七舍客勒。 |
| 32:10 | 我佇契面簽名，將契封密，閣請人來做知見，亦用天秤秤銀互伊。 |
| 32:11 | 我就提照規例所立的買契，就是封密的彼張，及無封的彼張， |
| 32:12 | 當我的叔的子哈拿篾及簽名佇契面諸個知見，以及坐佇拘留院內一切猶大人的面前，將買賣的契交互瑪西雅的孫尼利亞的子巴錄。 |
| 32:13 | 當𪜶面前，我吩咐巴錄講： |
| 32:14 | 「萬軍的耶和華──以色列的上帝按呢講：著將封密的及無封的此二張契收佇磁器的內面，通留存多多日。 |
| 32:15 | 因為萬軍的耶和華──以色列的上帝按呢講：將來佇此所在人欲閣買厝宅、田園，及葡萄園。」 |
| 32:16 | 我將買契交互尼利亞的子巴錄以後，就祈禱耶和華講： |
| 32:17 | 「主耶和華啊，你曾用大權能及伸出的手創造天地，在佇你無一項成的事。 |
| 32:18 | 你施慈愛互千萬人，閣將老父的罪過報應佇伊後裔的身上，至大全能的上帝，萬軍的耶和華是伊的名。 |
| 32:19 | 你的計劃有大本事，行代誌有大權能，注目看世間人一切的行做，照逐人的所行及𪜶的所做的效果，來報應伊。 |
| 32:20 | 佇埃及地顯出神蹟奇事，直到今仔日佇以色列及別人的中間亦是按呢，互你得著名聲，親像今仔日一樣。 |
| 32:21 | 用神蹟奇事及大權能的手，及伸出的手骨及大通驚的事，導你的百姓以色列出埃及地。 |
| 32:22 | 將此個流奶及蜜的地賞賜𪜶，就是你對𪜶的列祖咒誓欲互𪜶的。 |
| 32:23 | 𪜶入來得著伊做業，總是無趁你的話，無行你的律法；你一切命令𪜶行的，𪜶無行一項，所以你互攏總的災禍到佇𪜶。 |
| 32:24 | 看啊，有高的土堆，𪜶已經逼倚此個城欲取伊；城亦因為刀劍、飢荒、瘟疫，交互攻擊伊的迦勒底人的手。你所講的已經成，你亦親目看見。 |
| 32:25 | 主耶和華啊，你給我講：著為家己用銀買田，閣請人做知見。今此個城已經交佇迦勒底人的手啦。」 |
| 32:26 | 耶和華的話臨到耶利米講： |
| 32:27 | 「看啊，我是耶和華，是見有血氣者的上帝，在佇我豈有一項成的事？ |
| 32:28 | 所以耶和華按呢講：看啊，我欲將此個城交互迦勒底人的手及巴比倫王尼布甲尼撒的手，伊欲取伊。 |
| 32:29 | 攻城的迦勒底人欲來放火燒此個城以及厝宅。佇諸個厝頂，人曾向巴力燒香，向別個上帝灌奠，惹我的受氣。 |
| 32:30 | 以色列人及猶大人對少年以來，專專行我目睭中看做歹的事；以色列人一盡用手所做的惹我的受氣。這是耶和華講的。 |
| 32:31 | 此個城對起造的日到今仔日，常常惹我的受氣互我懊惱，致到我給伊除去離開我的面前； |
| 32:32 | 是因為以色列人及猶大人一切的邪惡，就是𪜶及𪜶的君王、貴族、祭司、先知，及猶大的眾人，以及耶路撒冷徛起的百姓所行的，惹我的受氣。 |
| 32:33 | 𪜶用尻脊向我，無用面；我雖然教示𪜶，是早早起來教示𪜶，總是𪜶無聽趁，來受教示， |
| 32:34 | 𪜶竟然用𪜶可惡的物下佇用我的名所稱的厝，來拍垃墋伊。 |
| 32:35 | 𪜶佇便欣嫩的山谷起巴力的高台，欲互𪜶的子，查某子經過火歸摩洛；𪜶行這可惡的事，互猶大陷落罪，這呣是我所命令的，亦呣是我的心所想的。」 |
| 32:36 | 今論到此個城，是恁所講已經因為刀劍、飢荒、瘟疫交佇巴比倫王的手的，以色列的上帝──耶和華按呢講： |
| 32:37 | 「看啊，我佇受氣、懊惱、大受氣的中間，將𪜶趕到逐國。後來我欲對遐招集𪜶出來，導𪜶倒來此所在，互𪜶安然徛起。 |
| 32:38 | 𪜶欲做我的百姓，我欲做𪜶的上帝。 |
| 32:39 | 我欲互𪜶一心一路，互𪜶常常敬畏我，互𪜶及𪜶的子孫得著福氣， |
| 32:40 | 我欲及𪜶立永遠的約，就是無越轉離開𪜶，是欲賜福互𪜶，閣互𪜶存心敬畏我，無越轉離開我。 |
| 32:41 | 我欲歡喜𪜶，賜福互𪜶，我實在欲盡心盡意栽培𪜶佇此個所在。 |
| 32:42 | 「因為耶和華按呢講：我怎樣互此個一切大的災禍臨到此個百姓，我亦欲按呢互我所應允𪜶一切的福氣臨到𪜶。 |
| 32:43 | 恁講：此個所在是拋荒、無人、無精牲，是交互迦勒底人的手的。將來人欲閣佇此所在買田園。 |
| 32:44 | 佇便雅憫地、佇耶路撒冷的四圍、佇猶大諸個城、佇山地諸個城、佇平洋諸個城，及佇南方諸個城，人欲用銀買田，佇契面簽名，將契封密，請人做知見；因為我欲互受掠的人倒來。這是耶和華講的。」 |
