走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 17:1 | 猶大的罪是用鐵筆、用鑽石筆尾記的，就是刻佇𪜶的心的碑，壇的角。 |
|---|---|
| 17:2 | 𪜶的子紀念𪜶高山頂、青翠樹邊的壇及偶像。 |
| 17:3 | 我田裡的山啊，我欲因為你佇四境內所犯的罪，將你的貨物、財寶，及山頭的壇，攏互人搶去； |
| 17:4 | 閣你為著本身欲將我所賞賜的產業放下啲。我亦欲互你佇所呣識的地服事你的對敵；因為恁激我受氣的火，直直𤏸到永遠。 |
| 17:5 | 耶和華按呢講：見若倚靠人用肉體做伊的手，伊的心離開耶和華者，彼號人受咒詛！ |
| 17:6 | 因為伊欲親像曠野的杜松，福氣到的時，伊看𣍐著，欲踮佇沙漠乾燥的所在，無人徛起的鹹地。 |
| 17:7 | 倚靠耶和華，掠耶和華做伊所倚靠者，彼號人有福氣！ |
| 17:8 | 伊欲親像水邊所栽的樹，旋伊的根佇河邊，炎熱到，亦無驚，葉猶原欲青翠，佇乾燥的年攏無掛慮，閣結果子無息。 |
| 17:9 | 人的心比萬物卡詭譎，歹到極頭，是誰會知伊啊？ |
| 17:10 | 我──耶和華是鑑察人的心、試驗人的臟腑者，欲照逐人所行的及伊做代誌的結果來報應伊。 |
| 17:11 | 人無照正道得著錢，親像鷓鴣孵呣是伊生的卵；到中年，彼個錢攏欲離開伊，伊的結局成做愚戇。 |
| 17:12 | 阮的聖所是榮光的寶座，對起頭安置佇高的所在。 |
| 17:13 | 以色列──所向望的耶和華啊，見若棄拺你的攏欲見誚。見若離開你的，𪜶的名欲記佇土裡，因為𪜶棄拺耶和華活水的源頭。 |
| 17:14 | 耶和華啊，求你醫治我，我就得著醫好，拯救我，我就得著救；因為你是我所謳咾者。 |
| 17:15 | 看啊，人對我講：耶和華的話佇叨落？今著互伊來！ |
| 17:16 | 論到我，我無緊緊棄拺牧者的職，呣隨你，災禍到的日呣是我所愛；這是你所知。我的嘴所講的攏佇你的面前。 |
| 17:17 | 莫得做互我驚惶的；當患難的日，你做我逃閃的所在。 |
| 17:18 | 互許個窘迫我的見誚，莫得互我見誚；互𪜶驚惶，莫得互我驚惶；互災禍的日臨到𪜶，用加倍的毀壞來毀壞𪜶。 |
| 17:19 | 耶和華對我按呢講：「你去徛佇眾百姓的門，就是猶大列王對遐入，對遐出的，閣徛佇耶路撒冷諸個門， |
| 17:20 | 對𪜶講：『恁諸個猶大王及猶大眾人，及耶路撒冷一切徛起的百姓，凡若對諸個門入者攏著聽耶和華的話。 |
| 17:21 | 耶和華按呢講：恁著家己謹慎，莫得佇安息日擔擔，也莫得運入耶路撒冷諸個城門； |
| 17:22 | 亦莫得佇安息日對家內擔擔出去。無論甚麼工攏呣通做，獨獨著掠安息日做聖日，照我平素吩咐恁的列祖的。』 |
| 17:23 | 總是𪜶呣聽趁，呣俯耳孔，就是硬𪜶的頷頸致到𣍐聽，𣍐受教示。」 |
| 17:24 | 耶和華講：「恁若留心聽趁我，佇安息日無擔甚麼擔入此個城諸個門，獨獨掠安息日做聖日，佇彼日攏無做甚麼工； |
| 17:25 | 就有君王、王親，坐大衛的寶座者，𪜶及𪜶的王親及猶大人，及耶路撒冷徛起的百姓，或是坐車，或是騎馬，入此個城諸個門，閣此個城欲留到永遠。 |
| 17:26 | 亦欲有人對猶大諸個城及耶路撒冷四圍的所在，對便雅憫地、平洋、山地，及南方的地來，攏帶燒祭、逐樣的祭、素祭，及乳香，及謝恩祭，到耶和華的厝。 |
| 17:27 | 恁若呣聽趁我，呣掠安息日做聖日，猶原佇安息日擔擔入耶路撒冷逐個門；我欲佇逐個門起火；此個火亦欲燒毀耶路撒冷的宮殿，𣍐會拍熄。」 |
