走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 36:1 | 猶大王約西亞的子約雅敬第四年，有話對耶和華臨到耶利米講： |
|---|---|
| 36:2 | 「你著提一本冊，將我所對你講欲攻擊以色列及猶大，及逐國一切的話，對我給你講話的彼日，就是對約西亞許個日起到佇今仔日，攏寫佇彼內面。 |
| 36:3 | 豈採猶大家欲聽我所按算欲降互𪜶一切的災禍，致到𪜶欲越頭，逐人離開伊的歹路，我就通赦免𪜶的罪過及罪惡。」 |
| 36:4 | 耶利米就叫尼利亞的子巴錄來；巴錄就將耶利米所傳，耶和華對伊講一切的話攏記佇冊。 |
| 36:5 | 耶利米吩咐巴錄講：「我受阻礙，𣍐會入耶和華的厝。 |
| 36:6 | 你著去，將我所傳，你所寫佇冊裡耶和華的話，佇耶和華的厝，佇禁食的日讀互百姓聽，亦讀互對諸個城來的猶大人聽。 |
| 36:7 | 豈採𪜶欲佇耶和華的面前謙卑祈禱，𪜶欲回頭，逐人離開伊的歹路，因為耶和華對此個百姓所講欲發出的受氣，彼個受氣真大。」 |
| 36:8 | 尼利亞的子巴錄就照先知耶利米一切所吩咐的去行，佇耶和華的厝讀冊內所記耶和華的話。 |
| 36:9 | 猶大王約西亞的子約雅敬五年九月，耶路撒冷的眾百姓及許個對猶大城來到耶路撒冷的眾百姓，宣佈禁食佇耶和華的面前， |
| 36:10 | 彼時佇耶和華的厝，書記沙番的子基瑪利雅的房佇頂院，近耶和華的厝新門的門口，巴錄對彼本冊讀耶利米的話互眾百姓親耳聽。 |
| 36:11 | 沙番的孫、基瑪利雅的子米該亞聽見冊內耶和華一切的話， |
| 36:12 | 伊就落去王宮，入書記的房。看啊，眾貴族攏坐佇遐，就是書記以利沙瑪、示瑪雅的子第萊雅、亞革波的子以利拿單、沙番的子基瑪利雅、哈拿尼雅的子西底家，及攏總的貴族。 |
| 36:13 | 對按呢米該亞對𪜶講起伊所聽見一切的話，就是巴錄對百姓讀彼本冊的時伊所聽見的。 |
| 36:14 | 因為按呢諸個貴族就差古示的曾孫、示利米雅的孫、尼探雅的子猶底到巴錄遐，對伊講：「你將所讀互百姓聽的冊親手提來。」尼利亞的子巴錄就親手提彼本冊來𪜶遐。 |
| 36:15 | 𪜶對伊講：「請坐，讀互阮聽。」巴錄就讀互𪜶聽。 |
| 36:16 | 𪜶聽這一切的話，就大家驚惶相看，給巴錄講：「阮決斷欲將諸個話攏給王講。」 |
| 36:17 | 𪜶閣問巴錄講：「請你給阮講，你用啥款來寫伊所傳一切的話？」 |
| 36:18 | 巴錄應講：「伊親嘴對我講諸個話，我就用筆墨寫佇冊裡。」 |
| 36:19 | 許個貴族對巴錄講：「你及耶利米著去匿啲，呣通互人知恁佇叨落。」 |
| 36:20 | 許個貴族將彼本下佇書記以利沙瑪的房，才入院見王，將諸個話攏講起互王聽。 |
| 36:21 | 王差猶底去提彼本來，伊就對書記以利沙瑪的房提來，猶底讀互王聽亦互徛佇王左右諸個貴族聽。 |
| 36:22 | 彼時是九月，王坐佇過冬天的厝，面頭前有火爐啲𤏸。 |
| 36:23 | 猶底見讀三篇抑四篇，王就用書記的刀給伊割起來，㧒佇火爐，到全本攏燒佇爐中的火。 |
| 36:24 | 王及聽見諸個話的人臣，𪜶攏無驚，亦無拆裂𪜶的衫。 |
| 36:25 | 以利拿單及第萊雅、基瑪利雅求王莫得燒彼本，總是伊呣聽。 |
| 36:26 | 王就命令哈米勒的子耶拉篾及亞斯列的子西萊雅，及亞伯牒的子示利米雅，去掠書記巴錄及先知耶利米。總是耶和華給𪜶囥密。 |
| 36:27 | 王將彼本（就是巴錄所寫耶利米所傳的話），燒去了後，耶和華的話臨到耶利米講： |
| 36:28 | 「你閣提一本，將猶大王約雅敬所燒從前彼本許個話攏寫佇彼內面。 |
| 36:29 | 論到猶大王約雅敬你著講，耶和華按呢講：你燒彼本，講：『你啥事佇彼內面寫講，巴比倫王決斷欲來毀滅此個土地，互此所在的人及精牲攏無去啊？』 |
| 36:30 | 所以耶和華論猶大王約雅敬講：伊欲無人通坐大衛的寶座；伊的身屍欲㧒擲佇外面，日時互日曝，暝時互霜凍。 |
| 36:31 | 我欲因為伊及伊的後裔，及伊的人臣的罪過刑罰𪜶。我欲互我所講一切的災禍臨到𪜶以及耶路撒冷的百姓，及猶大人；總是𪜶呣聽。」 |
| 36:32 | 對按呢，耶利米閣提一本交互尼利亞的子書記巴錄，伊就將耶利米所傳的話寫佇彼內面，就是猶大王約雅敬所燒去彼本一切的話，另外閣添多多相親像的話。 |
