走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 51:1 | 耶和華按呢講：看啊，我欲起毀滅的風，攻擊巴比倫及踮佇立加米的人。 |
|---|---|
| 51:2 | 我欲差外邦人來到巴比倫，來簸𪜶，互𪜶的地空虛。佇伊抵著患難的日，𪜶欲周圍攻擊伊。 |
| 51:3 | 開弓者，著向開弓者來開弓，向穿甲挺身者來開弓。莫得惜伊的少年人；著一盡滅伊的全軍。 |
| 51:4 | 受刣者欲倒佇迦勒底人的地，受刺者欲倒佇伊的街路。 |
| 51:5 | 雖莽以色列及猶大，𪜶的地方滿滿得罪以色列的聖者，猶久𪜶無互萬軍的耶和華──伊的上帝棄拺𪜶。 |
| 51:6 | 恁著對巴比倫中走出，逐人救家己的生命！莫得佇𪜶的罪中來滅無；因為這是耶和華報讎的期，伊欲互𪜶抵著應該受的報應。 |
| 51:7 | 巴比倫平素是耶和華手內的金杯，互全地的人醉；列邦曾飲伊的酒，所以列邦發狂。 |
| 51:8 | 巴比倫忽然捙倒毀壞；著為伊啼哭；提乳香來止伊的痛疼，豈採猶會醫得。 |
| 51:9 | 咱想欲醫治巴比倫，若是伊無得著。咱著離開伊！逐人倒來去本國；因為伊的罪案抵天，透到穹蒼。 |
| 51:10 | 耶和華已經顯明咱的公義。來啊！咱通佇錫安報告咱的上帝──耶和華的所做。 |
| 51:11 | 恁著磨光恁的箭，夯住恁的盾牌。耶和華定著意思攻擊巴比倫，來毀滅伊，所以激動瑪大君王的心；因為這是耶和華報讎，就是伊為著伊的殿來報讎。 |
| 51:12 | 著徛大旗，攻擊巴比倫的城牆；著堅固瞭望的台，派守望的設埋伏；因為耶和華所講論巴比倫徛起的百姓，伊有計劃伊，亦有成伊。 |
| 51:13 | 徛起佇多多水的頂面大發財者啊，你的結局到啦！貪心的量滿啦！ |
| 51:14 | 萬軍的耶和華指家己咒誓講：我欲互人充滿恁中間，親像草蜢一樣；𪜶欲喝喊攻擊你。 |
| 51:15 | 耶和華用能力創造地，用智慧建立世界，用聰明展開諸個天。 |
| 51:16 | 伊一下出聲，空中就有多多水激動；伊互雲霧對地極淐起來。伊為著雨，創造閃爁，伊互風對伊的府庫出來。 |
| 51:17 | 逐人攏愚蠢無智識。逐個銀匠攏為著伊雕刻的偶像來見誚；因為伊所鑄的偶像是假的，也無活氣佇伊的內面， |
| 51:18 | 攏是空空的，是迷惑人的所做，到辦理𪜶的時，的確受除滅。 |
| 51:19 | 雅各的份額無親像諸個，因為伊是創造萬物的主；以色列也是伊產業的支派。萬軍的耶和華是伊的名。 |
| 51:20 | 你是我的斧頭，交戰的家私；我欲用你拍碎列邦，用你毀滅列國； |
| 51:21 | 用你拍碎馬及騎馬的；用你拍碎戰車及坐佇彼頂面者； |
| 51:22 | 用你拍碎查甫人及婦仁人；用你拍碎老人及囝仔； |
| 51:23 | 用你拍碎少年人及在室女；用你拍碎牧者及伊的羊群；用你拍碎作田人及伊的一對牛；用你拍碎總督及官員。 |
| 51:24 | 耶和華講：「早巴比倫及迦勒底徛起的百姓佇錫安所行一切的歹，我欲報應𪜶，互恁親目看見。」 |
| 51:25 | 耶和華講：你此個行毀滅的山啊，看啊，我對敵你，你毀滅全地。我欲伸我的手佇你的頂面，對山巖捙你落去；互你成做燒毀的山。 |
| 51:26 | 人的確無對你遐取一塊石做厝角，亦無一塊石做地基；你欲永遠拋荒。這是耶和華講的。 |
| 51:27 | 著佇境內徛大旗，佇逐國中歕哨角，刁持備辦列國來攻擊伊，招集亞拉臘、米尼、亞實基拿諸個國來攻擊伊；閣派軍長來攻擊伊，互馬兵上來親像粗毛的草蜢， |
| 51:28 | 刁持備辦列國及瑪代的列王，伊的總督，伊的官員，及伊所管全地的人，來攻擊伊。 |
| 51:29 | 地振動閣凄慘；因為耶和華攻擊巴比倫的旨意已經定著，欲互巴比倫的地拋荒，無人徛起。 |
| 51:30 | 巴比倫的勇士呣愛交戰，住佇營盤內。伊的力已經無，成做親像婦仁人。𪜶的厝宅受燒，𪜶的門楗拍折。 |
| 51:31 | 走文書者走去抵著走文書者，報消息者抵著報消息者，報告巴比倫王知：伊的城四面互人取去， |
| 51:32 | 路頭互人佔去，蘆竹受火燒，交戰的人亦驚惶。 |
| 51:33 | 萬軍的耶和華──以色列的上帝按呢講：巴比倫親像粟埕，已經踏到平平，閣無偌久，收成的時就到。 |
| 51:34 | 巴比倫王尼布甲尼撒吞食我，壓碎我，互我成做空的器具。伊親像大魚吞我，用我的寶物充滿伊的腹肚，閣將我吐出。 |
| 51:35 | 錫安徛起的百姓欲講：巴比倫用暴虐款待我，及我的身體，願此個罪歸佇伊。耶路撒冷人欲講：願流阮的血的罪歸佇迦勒底徛起的百姓。 |
| 51:36 | 所以，耶和華按呢講：看啊，我欲替你伸冤，亦欲替你報讎；我欲互伊的海乾去，互伊的水泉無水。 |
| 51:37 | 巴比倫欲成做土堆，做野狗住的所在，做通卬愕、通恥笑者，亦無人徛起。 |
| 51:38 | 𪜶欲親像勇的獅噤噤哮，親像細隻獅哮叫。 |
| 51:39 | 當𪜶熱的時，我欲為𪜶辦酒桌，互伊酒醉，互伊快樂，長睏，永無精神。這是耶和華講的。 |
| 51:40 | 我欲帶𪜶落去，親像羊仔、親像公的綿羊、公的山羊到受刣的地。 |
| 51:41 | 示沙克怎樣受攻破？天下所謳咾者怎樣受霸佔？巴比倫佇列國中怎樣變做拋荒？ |
| 51:42 | 海水漲起來，淹過巴比倫；伊互多多湧蓋密。 |
| 51:43 | 伊的城變做拋荒、乾燥的地、沙漠，無人徛起，無人經過的所在。 |
| 51:44 | 我欲刑罰彼勒佇巴比倫，我欲挖出伊的嘴所吞的。萬百姓無閣歸倚伊；巴比倫的城牆亦倒壞。 |
| 51:45 | 我的百姓啊，恁著對伊的中間出去！逐人救家己，閃避耶和華的大受氣。 |
| 51:46 | 恁的心呣通失膽，亦呣通因為境內所聽見的風聲來驚惶；因為今年有風聲傳來；暝時亦有風聲；境內有強暴的事，官長攻擊官長。 |
| 51:47 | 看啊，日子欲到，我欲辦巴比倫雕刻的偶像。互𪜶全地見誚；伊許個受刣的人欲倒佇𪜶中間。 |
| 51:48 | 彼時，天地及其中所有的，欲因為巴比倫失敗來歡喜，因為行毀滅者欲對北方來到伊遐。這是耶和華講的。 |
| 51:49 | 巴比倫按怎樣互以色列受刣的人倒落去，親像按呢伊全地受刣的人亦欲佇巴比倫倒落去。 |
| 51:50 | 閃避刀劍者著緊走，呣通徛啲！著佇遠遠的所在記念耶和華，心內追想耶路撒冷。 |
| 51:51 | 阮因為聽詈罵漏氣，滿面見誚，因為異邦人入耶和華的厝許個聖的所在。 |
| 51:52 | 所以耶和華講：看啊，日子欲到，我辦巴比倫雕刻的偶像，通國受傷的人欲譆譆孱。 |
| 51:53 | 巴比倫雖然上到天，雖然互伊堅固高的所在閣卡堅固，猶久有行毀滅者欲對我遮到伊遐。這是耶和華講的。 |
| 51:54 | 對巴比倫有哀哭的聲；對迦勒底人的地有大毀滅的聲。 |
| 51:55 | 因為耶和華毀滅巴比倫，互𪜶中間的大聲息去。𪜶的湧嘩嘩哮，親像多多的水，伊響的聲亦發出。 |
| 51:56 | 因為毀滅者來攻擊巴比倫。伊的勇士受掠，𪜶的弓抵著遏折；因為耶和華是行報應的上帝，伊決斷欲報讎。 |
| 51:57 | 君王──名做萬軍的耶和華者，講：我欲互伊的貴族、博士、總督、官員，以及勇士攏酒醉，永永睏，無精神。 |
| 51:58 | 萬軍的耶和華按呢講：巴比倫闊大的城牆欲一盡倒壞；伊高大的城門欲互火燒燎去。眾百姓所著磨的欲歸佇空空；列國所著磨的歸佇火，𪜶攏欲厭倦。 |
| 51:59 | 猶大王西底家坐位的第四年，上去巴比倫的時，瑪西雅的孫、尼利亞的子西萊雅及王相及去、（西萊雅是王的內侍，）先知耶利米有話吩咐伊。 |
| 51:60 | 耶利米將一切欲臨到巴比倫的災禍，就是論到巴比倫所寫一切的話，來記上冊。 |
| 51:61 | 耶利米對西萊雅講：「你到巴比倫的時，要緊著讀此個冊裡的話： |
| 51:62 | 閣著講：『耶和華啊，你論到此所在曾講欲滅伊，甚至無人徛起連精牲亦無，的確永遠拋荒。』 |
| 51:63 | 你此個冊讀了，就著縛佇一塊石頭，㧒落佇伯拉河中， |
| 51:64 | 講：『巴比倫為著耶和華所欲降互伊的災禍，的確親像按呢沈落去，𣍐閣起來，伊攏欲厭倦。』」耶利米的話，到遮為止。 |
