走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 6:1 | 便雅憫人啊，恁著走出耶路撒冷，佇提哥亞歕哨角，佇伯哈基琳放煙燉；因為有災禍及大的毀滅對北方落來。 |
|---|---|
| 6:2 | 我欲剿滅錫安的查某囝仔，就是彼個娞閣幼秀者。 |
| 6:3 | 牧者及伊的羊群欲到伊遐，佇伊的周圍搭布棚，逐個佇伊所佔的地互羊食草。 |
| 6:4 | 恁著備辦交戰攻擊伊。起來啊，咱著趁中晝的時上去。慘啊！日已經斜西，欲暗的影已經拖長。 |
| 6:5 | 起來啊，咱著透暝上去，毀壞伊的宮殿。 |
| 6:6 | 因為萬軍的耶和華按呢講：恁著剉樹木，起土堆攻擊耶路撒冷。這是彼個應該受刑罰的城，𪜶中間一盡是暴虐。 |
| 6:7 | 井怎樣淐出水，此個城亦按呢淐出歹；佇𪜶中間常常聽見有強暴毀滅的事，病痛損傷亦常常佇我的面前。 |
| 6:8 | 耶路撒冷啊，你著受教示，免得我的心及你生疏，免得我互你拋荒，成做無人徛起的地。 |
| 6:9 | 萬軍的耶和華按呢講：𪜶欲一盡掠以色列剩的百姓，親像摘葡萄一樣。你著親像摘葡萄的，手閣轉入樹枝。 |
| 6:10 | 今我欲對是誰講話做干證，互𪜶聽啊？看啊，𪜶的耳仔未受割禮，𣍐會聽。看啊，耶和華的話𪜶掠做見誚，無歡喜伊。 |
| 6:11 | 因為按呢，我互耶和華的受氣充滿，愞𣍐住。我欲做一下傾佇街路的囝仔及聚會的少年人，連丈夫及伊的某，老人及日子滿足者，攏欲受掠。 |
| 6:12 | 𪜶的厝宅、田園，及某攏欲變做別人的；因為我欲伸手攻擊此所在徛起的百姓。這是耶和華講的。 |
| 6:13 | 因為𪜶對第一細到第一大者攏一味貪心，對先知到祭司攏行奸詐。 |
| 6:14 | 𪜶凊凊彩彩醫治我的百姓的傷，講：平安啦！平安啦！其實無平安。 |
| 6:15 | 𪜶行可惡的事，知見誚嗎？無，𪜶攏無見誚，亦𣍐紅面。因為按呢，𪜶欲跋倒佇跋倒的人的中間；我辦𪜶的時，𪜶欲顛倒。這是耶和華講的。 |
| 6:16 | 耶和華按呢講：恁著徛佇路裡看，查問舊的路，彼條好路佇叨落，就著行伊；按呢，恁的心欲得著安息。總是𪜶講：阮呣行伊。 |
| 6:17 | 我給恁設守望者，講：著聽哨角的聲。總是𪜶講：阮呣聽。 |
| 6:18 | 列國啊，因為按呢恁著聽！會眾啊，恁著知𪜶中間有甚麼事。 |
| 6:19 | 地啊，著聽！看啊，我欲互災禍到此個百姓，就是𪜶的圖謀的結果；因為𪜶呣聽趁我的話，我的律法，𪜶亦棄絕。 |
| 6:20 | 對示巴出的乳香，對遠遠的所在出的菖蒲，帶來互我欲啥代？恁的燒祭無得著接納；恁的禮物，我亦無歡喜。 |
| 6:21 | 所以耶和華按呢講：看啊，我欲下塞礙的石佇此個百姓的面前。父及子欲做一下跋佇彼頂面；厝邊及朋友亦攏欲滅無。 |
| 6:22 | 耶和華按呢講：看啊，有一種的百姓對北方來，亦有一個大國興起，對地極來。 |
| 6:23 | 𪜶抬弓及槍，𪜶殘忍，無憐憫；𪜶的聲親像海嘩嘩哮。錫安的查某囝仔啊，𪜶攏騎馬列陣，親像戰士欲攻擊你。 |
| 6:24 | 阮聽見𪜶的風聲，手就軟落去；痛苦擒著阮，痛疼親像生子的婦仁人一樣。 |
| 6:25 | 恁呣通出去田裡，亦呣通行佇路裡，因為佇遐有對敵的刀劍，四圍有驚惶。 |
| 6:26 | 我的百姓啊，著縖麻布，翱佇火灰中。著悲傷，親像喪失獨生子，痛心啼哭，因為殘害者欲忽然到佇咱。 |
| 6:27 | 我設立你佇我的百姓中，做試驗者及衛所，互你知來試驗𪜶的行做。 |
| 6:28 | 𪜶攏是大悖逆的人，四界行誹謗。𪜶是銅，是鐵，攏是行毀壞者。 |
| 6:29 | 風櫃燒著，鉛已經鎔佇火內；𪜶直直鍛煉，到尾是空空；因為歹者猶未除去。 |
| 6:30 | 人欲稱𪜶做受棄拺的銀，因為耶和華已經棄拺𪜶。 |
