走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 22:1 | 耶和華按呢講：「你落去猶大王的宮內，佇遐講此個話，講： |
|---|---|
| 22:2 | 『坐大衛寶座的猶大王啊，你及你的人臣，以及入諸個門的百姓，攏著聽耶和華的話。 |
| 22:3 | 耶和華按呢講：恁著行公平及公義，拯救受搶奪者脫離壓制人者的手，呣通用強暴欺負出外人及孤兒寡婦，佇此個所在亦呣通流無罪的人的血。 |
| 22:4 | 恁若認真行此個代誌，就欲有坐大衛寶座的王伊及伊的人臣百姓，或是坐車，或是騎馬，入此個厝的門。 |
| 22:5 | 恁若呣聽諸個話，耶和華講：我指本身來咒誓，此間厝欲變做拋荒。』 |
| 22:6 | 耶和華論到猶大王的家按呢講：我看你親像基列，親像黎巴嫩的尾溜；總是我的確互你變做曠野，做無人徛起的城。 |
| 22:7 | 我欲備辦行毀滅的人，逐個抬家私攻擊你；𪜶欲剉你上好的柏香樹，㧒落火。 |
| 22:8 | 「多多國的人欲經過此個城，逐個相及講：『耶和華啥事按呢款待此個大城啊？』 |
| 22:9 | 𪜶欲應講：『是因為𪜶棄拺耶和華──𪜶的上帝的約，服事敬拜別個上帝。』」 |
| 22:10 | 莫得為著死人啼哭；莫得為著伊悲傷，著因為受遷徙的人大大啼哭；因為伊𣍐閣倒來，亦𣍐閣見著伊的本國。 |
| 22:11 | 因為論到猶大王約西亞的子沙龍，續接伊的老父約西亞做王，後來離開此個所在者，耶和華有按呢講： |
| 22:12 | 「伊的確無閣倒來遮，就是欲死佇互人掠去的地方，無閣看見此個地方。」 |
| 22:13 | 彼個用不義來起厝、用無公道來起樓、白白教人做伊的工無互人工錢，彼人有災禍啊！ |
| 22:14 | 伊講：我欲為本身起大厝，及通風的樓，為家己開大窗。用柏香柴做天花板，用銀朱來油。 |
| 22:15 | 你熱心佇柏香柴的工作就會做王嗎？你的老父豈呣是亦食亦飲、亦行公平及公義嗎？ |
| 22:16 | 彼時伊得著福氣。伊辦理困苦及喪鄉人的案件，伊就得著福氣。按呢豈呣是識我嗎？這是耶和華講的。 |
| 22:17 | 獨獨你的目睭、你的心注意貪心，流無罪的人的血，行壓制及強暴。 |
| 22:18 | 所以，耶和華論到猶大王約西亞的子約雅敬按呢講：人無欲為著伊哀傷講：唉啊！我的兄；抑是，唉啊！我的大姊；亦無因為伊哀傷講：唉啊！我的主，抑是，唉啊！伊的榮光。 |
| 22:19 | 伊欲互人埋，親像埋驢一樣，欲拖出去㧒佇耶路撒冷的城外。 |
| 22:20 | 你著上黎巴嫩哀哭，佇巴珊出聲，對亞巴琳哀哭，因為你所親愛者攏毀滅啦。 |
| 22:21 | 當你亨通的時，我就對你講；你講：我呣聽。你對少年以來攏是此款，呣聽趁我的話。 |
| 22:22 | 你的牧者欲互風吹去，你所親愛者欲互人掠去；彼時你的確因為你一切的歹來漏氣見誚。 |
| 22:23 | 你徛起黎巴嫩，作巢佇柏香樹者，痛苦臨到你，痛疼親像欲生子的婦仁人，彼時你的可憐到怎樣！ |
| 22:24 | 耶和華講：「我指我的永活來咒誓，雖然猶大王約雅敬的子哥尼雅，是我正手蓋印的手指，亦欲給你剝起來， |
| 22:25 | 閣我欲將你交互數想你的生命的人的手，及你所呣敢見伊的面的人的手，就是巴比倫王尼布甲尼撒的手及迦勒底人的手。 |
| 22:26 | 我亦欲趕你及生你的老母到別國，呣是恁出世的所在；恁欲死佇遐， |
| 22:27 | 總是𪜶的心真愛倒去的所在，𣍐得通倒去。」 |
| 22:28 | 哥尼雅此人是受看輕、已經破的磁器嗎？是無通歡喜的器具嗎？伊及伊的後裔啥事受趕，㧒佇𪜶所呣識的地啊？ |
| 22:29 | 地啊，地啊，地啊，著聽耶和華的話！ |
| 22:30 | 耶和華按呢講：著指此人無子，一生𣍐得著享通者；因為伊的後裔的中間無閣有一人得著亨通，會坐佇大衛的寶座來治理猶大。 |
