走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 15:1 | 「逐擺到七年的路尾，你著行解放。 |
|---|---|
| 15:2 | 解放的例就是按呢：凡若債主借厝邊的著解放；呣通對你的厝邊及兄弟追討，因為耶和華的解放已經宣佈啦。 |
| 15:3 | 若是外國人，你通給伊追討所欠的；獨獨你的物佇你的兄弟的，你的手著解放伊。 |
| 15:4 | 你若留心聽耶和華──你上帝的話，執守來行我今仔日所命令你這一切的誡命，就欲佇恁中間無喪鄉人（因為佇耶和華──你的上帝所賞賜你做業的地，耶和華欲大大賜福你。） |
| 15:5 | 併於上節 |
| 15:6 | 因為耶和華──你的上帝欲照伊所應允賜福你。你欲借互多多國，也你呣免借；你欲管轄多多國，也𪜶𣍐管轄你。 |
| 15:7 | 「佇耶和華──你的上帝所賞賜你的地，若佇你一個城門內，你的兄弟中有一個喪鄉人及你佇啲，就呣通對你喪鄉的兄弟硬你的心、勼你的手。 |
| 15:8 | 的確著對伊開你的手，照伊所欠用的借伊，補伊的無夠。 |
| 15:9 | 你著家己謹慎，驚了你心內有歹念頭，講：『第七年解放的年近啦』，你就眥你喪鄉的兄弟，攏呣互伊，致到伊為著你求叫耶和華，你就有罪。 |
| 15:10 | 你的確著互伊，互伊的時心內呣通煩惱；因為對此個事耶和華──你的上帝欲佇你一切所行的，及你的手所做的，賜福你。 |
| 15:11 | 因為佇彼所在喪鄉人永𣍐斷；所以我命令你講：『佇你的境內的確著對你的兄弟喪鄉的欠缺的來開你的手。』」 |
| 15:12 | 「你的兄弟中，若有一個希伯來的查甫人抑是希伯來的查某人賣互你，服事你六年，到第七年就解放伊去自由。 |
| 15:13 | 你解放伊去自由的時，呣通互伊空手去， |
| 15:14 | 著對你的羊群、五穀場、酒窟中多多互伊；照耶和華──你上帝所賜福你的，來互伊。 |
| 15:15 | 著記得你佇埃及地做奴才，耶和華──你的上帝救贖你；因為按呢，我今仔日命令你此個事。 |
| 15:16 | 伊若對你講：『我無欲離開你』，因為伊疼你及你的家眷，閣因為踮你遐徛真好， |
| 15:17 | 你著用鑽仔對門裡貫伊的耳仔，伊就永永做你的奴僕。你款待你的女婢也是按呢。 |
| 15:18 | 你解放伊去自由的時，呣通掠做剋虧，因為伊服事你六年，比倩工的重倍值。耶和華──你的上帝欲佇你所做一切的事賜福你。」 |
| 15:19 | 「見若牛群羊群頭水生的，公的，你著分別做聖，歸互耶和華──你的上帝。牛群頭水生的，呣通做工；羊群頭水生的，呣通剪伊的毛。 |
| 15:20 | 你及你的家眷，逐年著食伊佇耶和華──你上帝的面前，就是佇耶和華所欲揀的所在。 |
| 15:21 | 若有破相的、或是跛腳、或是睛暝，無論有甚麼歹的破相，攏呣通做祭獻互耶和華──你的上帝； |
| 15:22 | 通佇你的門內食伊；無清氣及清氣的人攏通，親像食羚羊及鹿一樣； |
| 15:23 | 獨獨呣通食伊的血；著傾佇地裡，親像傾水一樣。」 |
