走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 5:1 | 摩西叫以色列眾人，對𪜶講：「以色列啊，恁著聽我今仔日所傳互恁聽的律例法度，互恁通學習伊，執守來行𪜶。 |
|---|---|
| 5:2 | 耶和華──咱的上帝佇何烈及咱立約。 |
| 5:3 | 耶和華無及咱的列祖立此個約，是及咱諸個，就是及咱今仔日一切活佇遮的人立的。 |
| 5:4 | 耶和華佇山頂，對火中，面對面及恁講話── |
| 5:5 | 彼時我徛佇耶和華及恁的中間，欲將耶和華的話傳互恁；因為恁為著彼個火來驚，無上山──主講： |
| 5:6 | 「『我是耶和華──你的上帝，曾導你對埃及地對做奴才的家出來的。 |
| 5:7 | 「『我以外你呣通有別個上帝。 |
| 5:8 | 「『呣通為家己雕刻偶像，不論天頂、地下，及地下水內所有的物，攏呣通妝𪜶的像。 |
| 5:9 | 呣通跪拜𪜶，也呣通服事𪜶，因為我耶和華──你的上帝斷斷呣容允用別個上帝匹配我。怨恨我的，我歸咎伊的罪，對父到子，到三、四代； |
| 5:10 | 疼我、守我誡命者，我施恩互伊，直到千代。 |
| 5:11 | 「『呣通濫糝稱耶和華──你上帝的名；因為濫糝稱伊的名的，耶和華的確無掠伊做無罪。 |
| 5:12 | 「『著守安息日掠伊做聖，照耶和華──你的上帝所命令你的。 |
| 5:13 | 六日內著著磨做你一切的工， |
| 5:14 | 獨獨第七日就是向耶和華──你的上帝來守的安息。此日，你及你的子、查某子、奴僕、女婢、牛、驢、精牲，以及踮佇你中間的出外人，一切的工攏呣通做，互你的奴僕、女婢通親像你安息。 |
| 5:15 | 你也著記得你前佇埃及地做奴僕；耶和華──你的上帝用大權能的手伸出來的手骨導你對遐出來。因為按呢，耶和華──你的上帝命令你守安息日。 |
| 5:16 | 「『著孝敬你的老父、你的老母，照耶和華──你的上帝所命令你的，互你佇耶和華──你的上帝所賞賜你的地方日子久長，來享受福氣。 |
| 5:17 | 「『呣通刣死人。 |
| 5:18 | 「『也呣通行姦淫。 |
| 5:19 | 「『也呣通偷提。 |
| 5:20 | 「『也呣通做假的干證陷害你的厝邊。 |
| 5:21 | 「『也呣通貪你的厝邊的某；也呣通貪你的厝邊的厝、及伊的田園、伊的奴僕、伊的女婢、伊的牛、伊的驢，及你的厝邊一切所有的。』 |
| 5:22 | 「諸個話是耶和華佇山頂，對火中、雲中、黑暗中，大聲吩咐恁全會的；也無閣加添。伊也寫𪜶佇二塊石碑，交代我。」 |
| 5:23 | 「彼霎，火焰燒佇山裡，恁聽見彼個對黑暗中出來的聲；恁的支派攏總的首領及恁的長老來就近我， |
| 5:24 | 恁講：『看啊，耶和華──咱的上帝顯明伊的榮光及伊的至大互阮看，阮閣聽見伊的聲音對火中出。今仔日阮也知上帝及人講話，人猶會活。 |
| 5:25 | 今阮乜使著死啊？因為此個大火欲燒滅阮，阮若閣聽見耶和華──咱上帝的聲就會死。 |
| 5:26 | 因為見有肉體的，是誰親像阮聽見永活上帝對火中講話的聲，猶會活啲啊？ |
| 5:27 | 你著進前去，聽耶和華──咱的上帝所欲講一切的話，將耶和華所對你講一切的話，你著對阮講，阮欲聽也欲行伊。』 |
| 5:28 | 「恁對我講話，耶和華聽見恁講話的聲。耶和華對我講：『我有聽見此個百姓講話的聲，就是𪜶所對你講的；𪜶所講的話攏好。 |
| 5:29 | 願𪜶存此號心來敬畏我，常常守我一切的誡命，互𪜶及𪜶的子孫永遠得著福氣。 |
| 5:30 | 你去給𪜶講：恁做恁倒去恁的布棚！ |
| 5:31 | 論到你，你著徛佇我遮，我欲將你所著教示𪜶一切誡命、律例、法度、給你講；互𪜶佇我所賞賜𪜶做業的地行伊。』 |
| 5:32 | 所以，恁著照耶和華──恁的上帝所命令恁的，著執守來行伊，呣通偏佇左偏佇右。 |
| 5:33 | 耶和華──恁的上帝所命令恁的路，恁攏著行伊，互恁活啲得著福氣，也互恁的日子佇恁所欲承接的地得著久長。」 |
