走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 18:1 | 「祭司利未人通利未的支派，𪜶佇以色列中無份無業；𪜶所欲食的就是耶和華的火祭及伊的業。 |
|---|---|
| 18:2 | 𪜶佇𪜶兄弟中無產業；耶和華做𪜶的產業，照所對𪜶講的。 |
| 18:3 | 祭司對百姓所應該得著的份就是諸個：見若獻牛抑是羊做祭的，著將前腿及二個嘴䩃及肚互祭司。 |
| 18:4 | 你的五穀、你的酒、你的油，起頭收成的及起頭剪的羊毛，攏著互伊； |
| 18:5 | 因為耶和華──你的上帝對你眾支派揀伊，互伊及伊的子孫奉耶和華的名徛啲，服事伊到永遠。 |
| 18:6 | 「若有利未人無論寄腳佇以色列中叨落一座城門內，對遐出來，專心意愛到耶和華所欲揀的所在， |
| 18:7 | 就伊欲奉耶和華───伊上帝的名服事，親像伊眾兄弟許個徛佇耶和華面前的利未人一樣。 |
| 18:8 | 佇伊賣祖公的業以外，伊所得著，食的份額著及𪜶平。」 |
| 18:9 | 「你若到耶和華──你上帝所賞賜你的地，你呣通學許個國可惡的事來行。 |
| 18:10 | 恁中間呣通有人互子、查某子經過火，行邪術的、占卜的、看命的、做師公的、 |
| 18:11 | 畫符的、做童乩的、行魔術的、牽亡的。 |
| 18:12 | 因為見若行許個事的，攏是耶和華所厭惡；也是為著諸個可惡的事，耶和華──你的上帝對你的面前趕𪜶出。 |
| 18:13 | 你對佇耶和華──你的上帝著做完全的人。」 |
| 18:14 | 「因為你所欲承接許個國攏聽趁占卜的、行邪術的，論到你，就耶和華──你的上帝呣准你按呢行。 |
| 18:15 | 耶和華──你的上帝欲對恁中間對恁的兄弟興起先知，親像我，恁著聽趁伊。 |
| 18:16 | 照你佇何烈聚會的日對耶和華──你上帝一切所求的，講：『莫得互我閣聽見耶和華──我的上帝的聲，也莫得互我閣看見此個大火，免得我死無。』 |
| 18:17 | 耶和華就對我講：『𪜶所講的是好。 |
| 18:18 | 我欲佇𪜶兄弟中給𪜶興起一個先知，親像你。我欲將我的話下佇伊的嘴；伊欲將我一切所命令的對𪜶講。 |
| 18:19 | 伊託我的名來傳我的話，人若呣聽，我欲辦伊。 |
| 18:20 | 總是先知自專託我的名講我所無命令伊講的話，抑是奉別個上帝的名來講，彼個先知著死。』 |
| 18:21 | 你的心若想講：『耶和華所無講的話，阮欲豈會知啊？』 |
| 18:22 | 若有先知託耶和華的名來講的，彼個事若無成，也無應驗，這是耶和華所無講的，是彼個先知自專來講的，你莫得驚伊。」 |
