走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 4:1 | 「以色列啊，今我所教示恁的律例法度，恁著聽來遵趁，通互恁活啲，入去來得著耶和華──恁的列祖的上帝所賞賜恁的地。 |
|---|---|
| 4:2 | 我所命令恁的話，恁呣通加添，也呣通減少伊，通互恁執守耶和華──恁上帝的命令，就是我所命令恁的。 |
| 4:3 | 耶和華因為巴力毗珥的事所行的，恁親目看見。因為見若趁巴力毗珥的人，耶和華──你的上帝攏對恁中間除滅𪜶。 |
| 4:4 | 獨獨恁及耶和華──恁的上帝結聯的，今仔日攏活啲。 |
| 4:5 | 看啊！我也曾用律例及法度教示恁，照耶和華──我的上帝所命令我的，互恁遵趁佇恁所欲入去承接的地。 |
| 4:6 | 所以恁著執守來行伊；這就是恁的智慧、聰明佇列國的面前。𪜶一下聽見這一切的律例，欲講：『此個大國真正是有智慧、聰明的百姓！』 |
| 4:7 | 叨落一個大國有上帝及伊親近，親像耶和華──咱的上帝、佇咱見若求叫伊的時及咱親近啊？ |
| 4:8 | 閣有甚麼大國有律例及法度、親像我今仔日佇恁的面前所傳一切的律法許呢公義啊？ |
| 4:9 | 「所以著家己謹慎，也著謹慎守你的心，免得你𣍐記得親目所看見的事，閣免得諸個事佇你活啲的時、離開你的心；也著用此個教示恁許個子許個孫。 |
| 4:10 | 你佇何烈山徛佇耶和華──你的上帝的面前，彼日耶和華對我講：『你給我招集百姓，我欲互𪜶聽見我的話，互𪜶活佇世間的日，通學習敬畏我，閣通教示𪜶的子兒。』 |
| 4:11 | 彼時恁近倚，徛佇山腳；山裡有火焰淐到天頂，也有密雲、黑黑暗暗。 |
| 4:12 | 耶和華對火焰中給恁講話，恁聽見講話的聲，無看見甚麼像，只有聲若定。 |
| 4:13 | 伊將所命令恁著守的約指示恁，就是十條誡，也寫伊佇二塊石碑。 |
| 4:14 | 彼時耶和華閣命令我將律例法度教示恁，互恁佇所欲過去來得著做業的地遵趁行伊。」 |
| 4:15 | 「所以恁著特別家己謹慎；因為耶和華佇何烈山、對火中給恁講話彼日，恁無看見甚麼形像。 |
| 4:16 | 驚了恁敗壞家己，為家己雕刻偶像，彷甚麼形狀，無論是男抑是女的形像， |
| 4:17 | 抑是地上走獸的像，抑是空中飛鳥的像， |
| 4:18 | 抑是地上啲趖的物的像，抑是地下水中魚類的像。 |
| 4:19 | 閣驚了你抬目向天，看耶和華──你的上帝所分派互天下萬國的日月星，就是天頂的萬象，你就受引誘敬拜服事𪜶。 |
| 4:20 | 總是耶和華帶恁出埃及，脫離鑄鐵的爐，欲做伊家己產業的百姓，親像今仔日的款。 |
| 4:21 | 耶和華閣因為恁的緣故受氣我，咒誓呣互我過約但河，也呣互我入耶和華──你上帝所賞賜你做業的娞地。 |
| 4:22 | 我著死佇此個地，我𣍐會過約但河；總是恁欲過去來得著彼個好的地。 |
| 4:23 | 恁著家己謹慎，驚了恁𣍐記得耶和華──恁的上帝及恁所立的約，為家己雕刻偶像，彷彿甚麼物，就是耶和華──你的上帝所禁你的； |
| 4:24 | 因為耶和華──你的上帝就是烈烈的火，決斷呣容允有別個上帝。 |
| 4:25 | 「後來恁久久徛起佇彼個地，生子傳孫，就雕刻偶像，彷甚麼物的像，拍歹你的心術，行耶和華──你的上帝目睭中看做歹的事，惹伊受氣。 |
| 4:26 | 我就今仔日叫天叫地來干證，恁欲佇過約但河得著做業的地緊緊滅到盡！恁的日子𣍐會佇彼所在得著久長，欲一盡除滅。 |
| 4:27 | 耶和華欲互恁四散佇列邦；佇耶和華所導恁到許個國，恁剩的人額少少。 |
| 4:28 | 佇遐，恁欲服事人的手所造的上帝，就是柴的、石的、𣍐會看見、𣍐會聽、𣍐會食、𣍐會鼻的。 |
| 4:29 | 總是恁佇遐若欲尋耶和華──你的上帝。若用盡心盡性尋伊，就欲抵著。 |
| 4:30 | 日後恁抵著苦難，所講諸個事臨到你，你欲歸向耶和華──你的上帝，來聽伊的聲。 |
| 4:31 | 因為耶和華──你的上帝是憐憫的上帝；伊無欲放拺你，無欲剿滅你，也無𣍐記得伊及你的列祖所咒誓的約。 |
| 4:32 | 「試問過身的時，就是你以前的時，對上帝創造人佇世間彼日以來，對天的此邊到天的彼邊，有親像彼號的大事嗎？ |
| 4:33 | 曾聽見有按呢嗎？曾有甚麼百姓聽見上帝對火中講話的聲，親像你聽見也猶會活啲嗎？ |
| 4:34 | 抑是曾有甚麼上帝試按呢做，用試煉、神蹟、奇事、交戰、大權能的手，伸出的手骨，及大通驚的事，為家己對別國中取一國，親像耶和華──恁的上帝佇埃及佇恁的目睭前，為恁所行一切的事啊？ |
| 4:35 | 用這顯現佇你，互你知耶和華──伊是上帝，伊以外，無有別個。 |
| 4:36 | 伊對天互你聽見伊的聲，為著欲教示你，閣佇地面上互你看見伊的大火，閣你聽見伊的話對火中出。 |
| 4:37 | 因為伊疼你的列祖，所以揀選𪜶的後裔，用大權能親身帶你出埃及， |
| 4:38 | 欲對你的面前趕出比你卡大卡猛的國民，欲導你入去，用𪜶的地賞賜恁做業，親像今仔日一樣。 |
| 4:39 | 所以，今仔日你著知，心也著想，天頂地下只有耶和華──伊是上帝，以外無別個。 |
| 4:40 | 所以你著守伊的律例誡命，就是我今仔日所命令你，互你及你的後裔通得著福氣，閣加添你的日子久長佇耶和華──你的上帝所賞賜你的地到永遠。」 |
| 4:41 | 「彼時，摩西佇約但外，向日出的所在分別三個城， |
| 4:42 | 互刣死人的人，就是平素無結怨、錯誤刣死伊的厝邊的，通逃走佇遐，已經走入諸個城的一個，就得著活： |
| 4:43 | 就是曠野平洋的比悉，為著流便人設的；基列的拉末，為著迦得人設的；巴珊的哥蘭，為著瑪拿西人設的。」 |
| 4:44 | 此個是摩西佇以色列人的面前所排列的律法── |
| 4:45 | 諸個是摩西佇以色列人出埃及了後所傳互𪜶的證據、律例、法度； |
| 4:46 | 佇約但河外伯毗珥對面的山谷中，佇希實本徛起亞摩利王西宏的地；就是摩西及以色列人出埃及了後所拍的。 |
| 4:47 | 𪜶得著伊的地，及巴珊王噩的地，就是二個亞摩利王，佇約但外向日出的所在。 |
| 4:48 | 對亞嫩山谷邊的亞羅珥，直到西雲山，就是黑門山。 |
| 4:49 | 以及約但外東勢亞拉巴的全地，直到亞拉巴的海，倚近毗斯迦的山腳。 |
