走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 22:1 | 「你若看見你的兄弟的牛抑是羊行迷路，你呣通佯無看見，你的確著互伊倒轉來你的兄弟遐。 |
|---|---|
| 22:2 | 你的兄弟若離開你遠，抑是你呣識伊，就著牽到你的厝，留佇你遐，聽候你的兄弟來尋你才還伊。 |
| 22:3 | 你的兄弟的驢，抑是伊的衫，無論伊失落甚麼，伊失落你所拾著的，攏著按呢行，呣通佯做無看見。 |
| 22:4 | 你若看見你的兄弟的驢抑是牛跋倒佇路裡，呣通佯做無看見，的確著幫助伊扶伊起來。 |
| 22:5 | 「婦仁人呣通穿查甫人所穿的，查甫人也呣通穿婦仁人的衫，因為見若按呢行的是耶和華──你上帝所厭惡的。 |
| 22:6 | 「你若佇路裡抵著鳥巢，或是佇樹裡或是佇地裡，內面有鳥仔子抑是鳥卵，鳥母伏鳥子抑是孵卵，你呣通掠鳥子續掠鳥母。 |
| 22:7 | 的確著放鳥母去，總是鳥仔子你通掠去；按呢你就通享受福氣閣食長歲壽。 |
| 22:8 | 「你若起新厝，著做欄杆佇厝頂，免得人對遐跋落來，流血的罪就歸佇你的厝。 |
| 22:9 | 「呣通用二樣的種子撒佇你的葡萄園，驚了做一下無去，就是你所撒的種子結實的及你的葡萄園結實的，攏無通私奇用。 |
| 22:10 | 呣通用牛及驢相及犁田。 |
| 22:11 | 呣通穿參插的布料羊毛及幼苧合織的。 |
| 22:12 | 「你所𧜞的衫著佇伊的四圍做鬚。」 |
| 22:13 | 「人若娶某，及伊同房後來怨恨伊， |
| 22:14 | 誹謗伊歹代，拍歹伊的名，講：『我娶此個查某子，及伊同房，看伊無在室女的憑據』； |
| 22:15 | 查某子的父母著提查某子在室女的憑據出來，帶到伊本城門的長老遐。 |
| 22:16 | 查某子的老父著對長老講：『我用我的查某子互此個人做某，伊怨恨伊， |
| 22:17 | 看啊！伊誹謗伊歹代，講：我看你的查某子無在室女的憑據；其實此個是我的查某子在室女的憑據。』父母就將彼個布排佇本城長老的面前。 |
| 22:18 | 彼個城的長老著掠彼個人，來責罰伊， |
| 22:19 | 也著罰伊一百銀，互查某子的老父，因為伊有加誣以色列在室女的歹名。查某子猶原做伊的某，一世人呣通離出伊。 |
| 22:20 | 總是此個事若是真的，查某子無在室女的憑據， |
| 22:21 | 𪜶著掠彼個查某子到伊的老父的厝的門口，伊本城的人著用石頭給伊擲死；因為伊佇以色列中行見誚的事，佇伊的老父的家行淫亂。按呢就對恁中間除去彼個歹。 |
| 22:22 | 「若抵著有人及嫁丈夫的婦仁人同房，姦夫及彼個婦仁人攏著互𪜶死。按呢，就對以色列的中間除去彼個歹。 |
| 22:23 | 「若有查某子是在室女的已經做人定著，有人佇城內抵著伊，及伊同房， |
| 22:24 | 就恁著掠此二人出去到彼個城門，用石頭擲死𪜶──查某子因為伊佇城內猶久無哮救；查甫人因為伊凌辱伊的厝邊的某。按呢就對恁中間除去彼個歹。 |
| 22:25 | 「總是若有人佇田野抵著已經聘定著的查某子，彼人給伊強姦，干單彼個給伊強姦的人著死。 |
| 22:26 | 總是彼個查某子你呣通怎樣辦伊；因為彼個查某子無應該死的事，此個代誌是親像人起來攻擊伊的厝邊，刣死伊一樣。 |
| 22:27 | 因為伊佇田野抵著伊，彼個做人定著的查某囝仔哮救，也無人救伊。 |
| 22:28 | 「若查甫人抵著未配人的在室女，擒伊，及伊私通，互人看見， |
| 22:29 | 就彼個及伊私通的人著提五十個銀互查某囝仔的老父；因為伊已經凌辱伊，就著娶伊做某，一世人呣通離伊。 |
| 22:30 | 「人呣通娶老父的後某做某；呣通掀開伊的老父的衫仔裾。」 |
