走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 28:1 | 「你若致意聽耶和華──你的上帝的話，守伊一切的誡命來行伊，就是我今仔日所命令你的，耶和華──你的上帝欲互你𨃟過天下萬國。 |
|---|---|
| 28:2 | 你若聽耶和華──你上帝的話，就諸個所祝福的欲趇你，欲到佇你； |
| 28:3 | 你佇城內欲得著福氣，佇田裡欲得著福氣。 |
| 28:4 | 你的身軀所生的，你的土地所出的，你的精牲所出的，以及牛的牛仔子，羊的羊仔子，攏欲得著福氣。 |
| 28:5 | 你的筐仔及你摶麵的器具攏欲得著福氣。 |
| 28:6 | 你入來欲得著福氣，出去也欲得著福氣。 |
| 28:7 | 「你的對敵起來攻擊你的，耶和華欲互𪜶刣輸佇你的面前；𪜶對一條路出來攻擊你，欲佇你的面前對七條路來走。 |
| 28:8 | 耶和華欲命令福氣互你，佇你的粟倉，及你的手所做一切的事，也欲賜福你佇耶和華──你上帝所賞賜你的地。 |
| 28:9 | 你若守耶和華──你上帝的誡命，行伊的道路，耶和華欲設立你做伊家己聖的百姓，照伊所對你咒誓的。 |
| 28:10 | 天下萬百姓看見你屬佇耶和華的名下，就欲驚畏你。 |
| 28:11 | 你佇耶和華對你的列祖咒誓賞賜你的地，耶和華欲互你的身軀所生的，精牲所出的，土地所出的，充足有剩。 |
| 28:12 | 耶和華欲給你開伊天裡寶貝的庫房，落及時的雨佇你的地。佇你的手所做一切的事賜福你。你欲借互多多國，也你呣免借。 |
| 28:13 | 你若聽趁耶和華──你的上帝的誡命，就是我今仔日所命令你的，執守來行伊，無偏左無偏右，來歪斜我今仔日所命令你諸個話，去趁別個上帝來服事伊，耶和華就欲互你做頭無做尾，你欲踮佇頂面無踮佇下面。」 |
| 28:14 | a |
| 28:15 | 「你若無聽趁耶和華──你上帝的話，無執守來行伊一切的誡命律例，就是我今仔日所命令你的，諸個咒詛就欲趇著你，欲到佇你； |
| 28:16 | 佇城內你欲受咒詛，佇田裡你也欲受咒詛。 |
| 28:17 | 你的筐仔及你摶麵的器具攏欲受咒詛。 |
| 28:18 | 你的身軀所生的，你的地所出的，以及牛的牛仔子，羊的羊仔子，攏欲受咒詛。 |
| 28:19 | 你入來欲受咒詛，出去也欲受咒詛。 |
| 28:20 | 因為你所行的歹來棄拺我，耶和華欲佇你的手所做一切的事，互咒詛、擾亂、責罰到佇你，直到你受毀滅，緊緊滅無。 |
| 28:21 | 耶和華欲互瘟疫纏你，到伊滅無你佇你所入去承接的地。 |
| 28:22 | 耶和華欲用消瘦、熱病、發炎、毒熱、刀劍、枯焦、朽爛攻擊你。諸個攏欲追趇你，到你滅無。 |
| 28:23 | 你頭殼頂的天欲變做銅，腳下的地欲變做鐵。 |
| 28:24 | 耶和華欲互你地上的雨變土粉、變沙，伊欲對天落佇你，到你滅無。 |
| 28:25 | 「耶和華欲互你刣輸佇你對敵的面前，你對一條路出去抵敵𪜶，欲佇𪜶的面前對七條路來逃走。你欲佇天下萬國中流落。 |
| 28:26 | 你的身屍欲互空中的飛鳥及地上的走獸做食物，也無人趕伊。 |
| 28:27 | 耶和華欲用埃及的殃、痔瘡、癬、疥𣍐醫得的，來拍你。 |
| 28:28 | 耶和華欲用癲狂、睛暝、心的驚惶拍你。 |
| 28:29 | 你欲佇日中晝四界摸，親像晴暝的暗摸索，你的路𣍐亨通，常常抵著制壓、搶奪，無人拯救你。 |
| 28:30 | 你欲聘定某，別人及伊同房；你欲起厝，無通徛佇彼內面；你欲栽種葡萄園，也𣍐得著食伊的果子。 |
| 28:31 | 你的牛刣佇你的目睭前，你無通食著；你的驢佇你的目前受搶奪，呣還你；你的羊欲歸你的對敵，無人替你救伊。 |
| 28:32 | 你的子查某子欲交佇別國的百姓；你的目睭欲看，通日瞭望伊，到失明，你的手也無力通做甚麼。 |
| 28:33 | 你的土產及你著磨所得著的，欲互你所呣識的國民食了了。你干單受欺負，受壓制， |
| 28:34 | 你為著你的目睭所看見的事，欲致到癲狂。 |
| 28:35 | 耶和華欲用𣍐醫得的毒殃拍你，佇你的腳頭窩，腳腿，對你的腳掌到頭殼頂。 |
| 28:36 | 「耶和華欲遷徙你及你所設立管轄你的王，到你及你的列祖所呣識的國；佇遐你欲服事別個上帝是柴的、石的。 |
| 28:37 | 你佇耶和華所欲導你到的列國中，欲互人卬愕、互人做話柄、受譏刺。 |
| 28:38 | 你欲帶多多種子到田裡，若是所收的是真少，因為草蜢欲食伊。 |
| 28:39 | 你欲栽種葡萄園來修整伊，總是無通飲酒，無通挽果子，因為蟲欲食伊。 |
| 28:40 | 通境內你欲有橄欖樹，總是無伊的油通抹你的身軀，因為你的橄欖樹𣍐住粒。 |
| 28:41 | 你欲生子查某子，無通做你的，因為𪜶欲互人掠去。 |
| 28:42 | 你的樹木及你的土產草蜢欲一盡食伊。 |
| 28:43 | 你中間的出外人，欲愈升愈高；你欲愈降愈低。 |
| 28:44 | 伊欲借你，也你無通借伊；伊欲做頭，你欲做尾。 |
| 28:45 | 諸個咒詛欲攏到佇你，欲追你，欲趇著你，到你滅無；因為你無聽趁耶和華──你上帝的話，無守伊所命令你許個誡命律例。 |
| 28:46 | 諸個咒詛欲到佇你及你的後裔做神蹟奇事，到永遠！ |
| 28:47 | 「因為你無為著你的好額，用歡喜的心快樂的意思，來服事耶和華──你的上帝， |
| 28:48 | 所以你欲抵著枵餓、嘴乾、褪裼、無半項物服事耶和華所差來攻擊你的對敵。伊欲用鐵軛掛佇你的頷頸，到滅無你。 |
| 28:49 | 「耶和華欲對遠遠、對地極導一國，親像鷹飛來攻擊你。彼個國的話，你𣍐曉聽。 |
| 28:50 | 彼個國的人面雄介介，無體貼老人，也無憐憫囝仔。 |
| 28:51 | 𪜶欲食你的精牲所生的及你的土產，到你滅無。你的五穀、酒、油、以及牛的牛仔子、羊的羊仔子、攏無給你留啲，到𪜶滅無你。 |
| 28:52 | 伊欲圍困你佇你逐個城門內，到你所倚靠、高閣堅固的城牆攏倒壞佇你的全地。伊欲圍困你佇你逐個城門內佇耶和華──你上帝所賞賜你的全地。 |
| 28:53 | 你的對敵圍困你，你佇窘迫困苦的中間，欲食你的身軀所生的，就是耶和華──你上帝所賞賜你的子查某子的肉。 |
| 28:54 | 恁中間，幼秀不止細膩的人，目睭欲眥伊的兄弟及伊心懷中的某，以及其餘所剩的子兒； |
| 28:55 | 致到伊無欲用伊所食子兒的肉，分一點仔互𪜶中間的一人；因為你佇逐個城門內，受對敵圍困大大窘迫你的時、伊無剩半項。 |
| 28:56 | 恁中間幼秀細膩的婦仁人，因為伊的幼秀細膩平素呣敢用腳掌踏地的，欲眥伊心懷中的丈夫及伊的子伊的查某子。 |
| 28:57 | 以及伊身軀所出的衣及伊所生許個子，因為佇你受圍互對敵佇你諸個城門內窘迫你困苦的時，伊因為百項物欠缺，所以欲偷食伊。」 |
| 28:58 | 「若你無執守來行此本冊所記律法一切的話，無敬畏有榮光通驚畏的名，就是耶和華──你的上帝。 |
| 28:59 | 耶和華就欲用奇怪的災禍，就是極大極久的災禍，及極重極久的病到佇你以及你的後裔， |
| 28:60 | 也欲互你所驚、埃及許個病症攏臨到佇你，也欲纏佇你的身軀， |
| 28:61 | 連許個無記佇此本律法的冊的災禍、病症，耶和華欲互伊攏到佇你到你滅無。 |
| 28:62 | 恁前雖然親像天頂的星許多，總是因為你無聽趁耶和華──你上帝的話，所以你所剩的數額就欲少少。 |
| 28:63 | 前耶和華掠賜福恁互恁興旺做歡喜，後來耶和華也欲掠毀滅恁，滅無恁做歡喜；恁也欲對恁所入去承接的地受拔起來。 |
| 28:64 | 耶和華欲互恁四散佇萬百姓中，對地此個極頭到地彼個極頭，你欲佇遐服事別個上帝，是你及你的列祖所呣識、柴的、石的。 |
| 28:65 | 佇許個國內，你𣍐得著安然，你的腳也𣍐得著歇睏；耶和華也欲互你佇遐心噗噗筅，目睭失明，精神衰敗。 |
| 28:66 | 你的生命佇你的面前無定無著；你日暝驚惶，你的生命無穩當。 |
| 28:67 | 你因為心內所驚惶的，目睭所看見的，早起欲講，苦𣍐得此時暗；暗時欲講，苦𣍐得此時天光。 |
| 28:68 | 耶和華欲互你坐船倒去埃及，對彼條路就是我曾對你講你𣍐閣看見的；佇遐你欲賣本身互對敵做奴僕女婢，總是無人買。」 |
