走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 16:1 | 「你著注意亞筆月，來守耶和華──你上帝的𨃟過節，因為耶和華──你上帝佇亞筆月暝時導你出埃及。 |
|---|---|
| 16:2 | 你著佇耶和華所欲揀來安置伊的名的所在，對你的羊群牛群，用逾越節的精牲，獻祭互耶和華──你的上帝。 |
| 16:3 | 你呣通用有酵的餅參啲食；七日久你著用無酵的餅參啲食，就是困苦的餅──欲互你一生的日記得你出埃及地的日──因為你出埃及地的時真趕緊。 |
| 16:4 | 佇你的四境內，七日久攏呣通看見酵，頭一日下昏所獻的祭肉，呣通留一點仔到天光。 |
| 16:5 | 佇耶和華──你上帝所賞賜許個城門內，你呣通獻𨃟過節的祭； |
| 16:6 | 獨獨著佇耶和華──你上帝所欲揀做安置伊的名的所在，到下昏日落的時，就是你出埃及的時，著獻𨃟過節的祭。 |
| 16:7 | 著佇耶和華──你上帝所欲揀的所在煏來食伊，隔早起你越倒去你的布棚。 |
| 16:8 | 你著食無酵餅六日，第七日你著守耶和華──你上帝的嚴肅會，攏呣通做工。」 |
| 16:9 | 「你著為家己算七個七日：對你起頭用鐮仔割五穀的時，就算七個七日。 |
| 16:10 | 你著佇耶和華──你上帝的面前守七七日節，將你的手的禮物奉獻，是照你的心所願的，也照耶和華──你的上帝賜福你的。 |
| 16:11 | 你及你的子、查某子、奴僕、女婢，及踮佇你城門內的利未人，以及佇恁中間寄腳的及孤兒寡婦，攏著佇耶和華──你的上帝所欲揀安置伊的名的所在，佇耶和華──你上帝的面前歡喜。 |
| 16:12 | 你著記得你佇埃及曾做奴才。你著執守來行諸個律例。」 |
| 16:13 | 「五穀場及酒窟所出的，你收囥了後，著守搭草寮仔節七日。 |
| 16:14 | 守節的時，你及你的子、查某子、奴僕、女婢，及踮佇你城門內的利未人，以及寄腳的及孤兒寡婦，攏著歡喜。 |
| 16:15 | 佇耶和華所欲揀的所在，你著守耶和華──你的上帝的節七日；因為耶和華──你的上帝佇你一切的物產及你的手一切所做的欲賜福你，你就真大歡喜。 |
| 16:16 | 你一切的查甫丁著佇除酵節、七七節、搭寮仔節，一年三擺，攏到耶和華──你上帝的面前，佇伊所欲揀的所在，也呣通空手到耶和華的面前。 |
| 16:17 | 逐人著照伊的氣力來獻，就是照耶和華──你上帝所賞賜你的福份。」 |
| 16:18 | 「你著佇耶和華──你的上帝所賞賜逐個城門內，照你許個支派為家己設立審判官及官長。𪜶著照公義的判斷來審判百姓。 |
| 16:19 | 你的審判呣通冤枉；呣通看人的外貌。也呣通受賄賂；因為賄賂會互智慧的人目睭睛暝，閣會互義人的話反倒轉。 |
| 16:20 | 你著追趇至公至義，互你會活，承接耶和華──你上帝所賞賜你的地。 |
| 16:21 | 「你為家己所起耶和華──你上帝的壇，呣通佇彼邊仔栽甚麼樹木做亞舍拉。 |
| 16:22 | 也呣通為家己祀雕刻的柱；這是耶和華──你的上帝所怨恨的。」 |
