走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 12:1 | 彼時，人聚集幾若萬，致到相睭踏。耶穌開嘴，代先對伊的學生講：「恁著持防法利賽人的酵，就是假好。 |
|---|---|
| 12:2 | 無有蓋密也無露現的；隱密無互人知的。 |
| 12:3 | 所以，恁佇黑暗的中間所講的，欲佇光明互人聽見；恁佇密房俯耳孔邊所講的，欲報揚佇厝頂。」 |
| 12:4 | 「我的朋友啊，我給恁講，害死恁身軀了後𣍐會做別項的，莫得驚𪜶。 |
| 12:5 | 我欲指示恁所著驚的，著驚彼個害死了後閣有權㧒佇地獄的。實在啊，我給恁講，所著驚的是此個。 |
| 12:6 | 五個雀鳥仔豈呣是賣二分銀嗎？佇上帝的面前，連一隻也無𣍐記得； |
| 12:7 | 就恁的頭毛，也攏過算。莫得驚，恁比多多雀鳥仔卡貴氣！」 |
| 12:8 | 「我也給恁講，見若佇人的面前認我的，人子佇上帝的天使的面前也欲認伊； |
| 12:9 | 若是佇人的面前無認我的，佇上帝的天使的面前也欲呣認伊。 |
| 12:10 | 凡若講話來攻擊人子的，欲赦免伊；若是褻瀆聖神的，無欲赦免伊。 |
| 12:11 | 人帶恁到會堂，及辦政事以及有權者的面前，莫得掛慮欲怎樣分訴，欲分訴甚麼，欲講甚麼； |
| 12:12 | 因為彼時，聖神欲教示恁所著講的。」 |
| 12:13 | 眾人中有一人給伊講：「先生啊！請你教我的兄弟及我分祖業。」 |
| 12:14 | 若是耶穌給伊講：「你此個人啊！是誰設立我做恁的審判官，抑是做分家業的嗎？」 |
| 12:15 | 就對眾人講：「著謹慎約束家己，攏無貪心，因為人的活命不在伊所積聚的豐盛。」 |
| 12:16 | 就用譬喻對𪜶講：「有一個富人伊的田園真好收； |
| 12:17 | 伊想來想去講：『我無所在通囤我的土產，今欲怎樣？』 |
| 12:18 | 閣講：『我欲按呢做：欲拆我的粟倉，起卡大的，就我的五穀及財物攏欲囤佇遐， |
| 12:19 | 也欲給我的靈魂講：靈魂啊，你有多多財物積聚，做多多年的路用，通清閒飲食快樂！』 |
| 12:20 | 若是上帝給伊講：『戇人啊，今暝欲對你討你的靈魂；就你所備辦的欲歸甚麼人啊？』 |
| 12:21 | 見若為著家己積聚財寶，佇上帝的面前無好額的，也是按呢。」 |
| 12:22 | 閣對伊的學生講：「所以我給恁講，莫得為著生命掛慮欲食甚麼，抑是為著恁的身軀掛慮欲穿甚麼； |
| 12:23 | 因為生命比米糧卡對重，身軀比衣裳卡對重。 |
| 12:24 | 著試想烏鴉，𪜶無種作無收成，也無庫房無粟倉，上帝猶久養飼𪜶。恁比鳥仔彼個貴氣到怎樣！ |
| 12:25 | 恁甚麼人會用掛慮互生命卡長一刻久啊？ |
| 12:26 | 按呢至小可的，恁猶久無法得，啥事掛慮其餘的啊？ |
| 12:27 | 試想百合花怎樣愈大欉；伊無著磨，無紡織。若是我給恁講，當所羅門極行伍的時，伊所穿呣值著此號花的一蕊！ |
| 12:28 | 今山裡的草今仔日佇啲，明仔日㧒佇火爐，上帝尚且互伊穿到按呢，何況恁，小信的人啊！ |
| 12:29 | 恁莫得求欲食甚麼，欲飲甚麼，也莫得煩心； |
| 12:30 | 因為諸個攏是世間的列邦人所求的。恁的父也知，諸個是恁欠用的。 |
| 12:31 | 獨獨恁著求伊的國，就諸個物欲續互恁。 |
| 12:32 | 恁細的羊群啊，莫得驚，因為恁的父歡喜用國互恁。 |
| 12:33 | 著賣恁所有的來賑濟人，為著恁本身備辦𣍐會舊的錢袋，佇天裡用𣍐了的財寶，就是賊𣍐到、蟲𣍐蛀的所在。 |
| 12:34 | 因為恁的財寶佇遐，恁的心也欲佇遐。」 |
| 12:35 | 「恁的腰著縖啲，恁的燈著點啲， |
| 12:36 | 恁著親像人啲聽候𪜶的主人對婚姻的筵桌倒來。到地，拍門，通連鞭給伊開。 |
| 12:37 | 主人到，看見𪜶警醒，許個奴僕有福氣。我實在給恁講，主人欲互𪜶坐桌，家己縖帶，進前來伺候𪜶。 |
| 12:38 | 豈採二更，抑是三更到，看見𪜶按呢，許奴僕有福氣。 |
| 12:39 | 家主若知賊甚麼時欲到，伊就張持，不致伊的厝受挖孔，這是恁所知。 |
| 12:40 | 恁也著備辦便；因為恁無拍算的時，人子來啦。」 |
| 12:41 | 彼得講：「主啊，你設此個譬喻是對阮講？抑是對眾人啊？」 |
| 12:42 | 主講：「甚麼人是盡忠智識的管家，主人所欲設立來管理伊家內的人，照時發米糧互𪜶啊？ |
| 12:43 | 伊的主人來，看見伊按呢行，彼個奴僕有福氣。 |
| 12:44 | 我實在給恁講，主人欲設立伊來管理伊一切所有的。 |
| 12:45 | 設使彼個奴僕心內拍算：『我的主人延延才欲來』，就拍許個奴僕女婢，飲食閣酒醉； |
| 12:46 | 就佇無派胚的日，呣知的時，彼個奴僕的主人欲到，重重刑罰伊，辦伊及呣信的人同等。 |
| 12:47 | 奴僕知伊的主人的意思，也無備辦，也無順伊的意思來行，欲受拍多下； |
| 12:48 | 若是呣知，來行應該受拍的事，伊欲受拍少下，見若互伊多的，欲給伊提多；託仗伊多的，欲給伊討卡多。」 |
| 12:49 | 「我來是欲用火㧒佇地裡，火若已經𤏸，我猶久愛甚麼？ |
| 12:50 | 我有應該受的洗彼個洗猶未成，我迫切到怎樣？ |
| 12:51 | 恁拍算我來，是欲互地上和平嗎？我給恁講，呣是，反轉是冤家。 |
| 12:52 | 今了後，一家五人欲冤家；三個及二個冤家，二個及三個冤家； |
| 12:53 | 父及子，子及父；老母及查某子，查某子及老母；乾家及伊的媳婦，媳婦及乾家。𪜶攏欲冤家。」 |
| 12:54 | 伊就閣對眾人講：「恁看見雲對西勢起，恁就講：『欲落雨』；果然有按呢。 |
| 12:55 | 看見風對南勢吹來，恁就講：『欲燒熱』；也有按呢。 |
| 12:56 | 假好的人啊，天及地的形色恁都看會出，怎樣𣍐會看出此個時啊？」 |
| 12:57 | 「恁家己怎樣無省察彼個合佇義的啊？ |
| 12:58 | 因為你及告你的去見官府，猶佇路裡著營為互伊放你息；驚了伊拖你到佇審判官，審判官將你交差役，差役續將你關落監。 |
| 12:59 | 我給你講，一絲一毫未還，你決斷𣍐會出遐。」 |
