走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 23:1 | 𪜶全會的人攏起來，帶伊到彼拉多的面前， |
|---|---|
| 23:2 | 告伊講：「阮看此人迷惑阮的百姓，禁人納稅互該撒，家己稱做基督，做王。」 |
| 23:3 | 彼拉多問伊講：「你是猶太人的王嗎」？應伊講：「你講就是。」 |
| 23:4 | 彼拉多對許個祭司頭及歸陣的人講：「我看此人無罪。」 |
| 23:5 | 總是𪜶愈出力講：「伊搖動百姓，遍猶太傳教，對加利利起，到遮。」 |
| 23:6 | 彼拉多一下聽見，就問：「看此人是加利利人抑呣是？」 |
| 23:7 | 已經知伊屬佇希律所管轄，就送伊互希律。彼時希律也佇耶路撒冷。 |
| 23:8 | 希律看見耶穌，就真歡喜；是久久愛看見伊，因為曾聽見伊的事，閣向望看見伊行神蹟， |
| 23:9 | 就用多多話問伊，若是耶穌無應伊一句。 |
| 23:10 | 許個祭司頭及經學士徛啲，出力告伊。 |
| 23:11 | 希律及伊的兵目底無伊，戲弄伊，用娞的衫給伊穿，閣送還彼拉多。 |
| 23:12 | 希律及彼拉多平時結怨，彼日就做朋友。 |
| 23:13 | 彼拉多召許個祭司頭及有司參百姓來， |
| 23:14 | 對𪜶講：「恁帶此個人到我遮，講伊是迷惑百姓的。你看，我佇恁的面前已經審問伊，總是論到恁所告伊的事，我查出伊攏無罪； |
| 23:15 | 希律也是按呢，因為有將伊送還咱。也你看伊所行無一項應該死的事。 |
| 23:16 | 所以，我欲拍，來解放伊。」 |
| 23:17 | ｛到節期，總督必須放一個犯人互𪜶。〔台語羅馬譯本無此節！〕｝ |
| 23:18 | 𪜶一齊喉叫講：「著除去此個人！放巴拉巴互阮！」 |
| 23:19 | 此個巴拉巴，因為佇城內作亂閣刣死人，才關落監。 |
| 23:20 | 彼拉多愛放耶穌，就閣及𪜶講。 |
| 23:21 | 若是𪜶叫：「釘伊十字架！釘伊十字架！」 |
| 23:22 | 彼拉多第三擺對𪜶講：「是怎樣？伊有行甚麼歹？我看伊無一項應該死的罪。所以，欲拍，來解放伊。」 |
| 23:23 | 𪜶大聲迫切，求釘伊佇十字架。𪜶的聲卡贏。 |
| 23:24 | 彼拉多擬斷照𪜶所求的來行， |
| 23:25 | 就解放𪜶所求彼個為著作亂、續刣死人關落監的，將耶穌交𪜶，來順𪜶的意思。 |
| 23:26 | 帶耶穌去的時，有一個古利奈的人西門，對鄉下來；𪜶就搝伊來，將十字架靠佇伊的肩頭，互伊夯來隨耶穌。 |
| 23:27 | 隨伊的人，有百姓及婦仁人多多；婦仁人為著伊搥胸哀傷。 |
| 23:28 | 耶穌越頭對𪜶講：「耶路撒冷的婦仁人啊，莫得為著我啼哭，著為著恁家己及家己的子兒來啼哭。 |
| 23:29 | 因為時欲到，人欲講：『𣍐會懷孕的婦仁人，未曾生產的胎，未曾互囝仔吸的奶頭，有福氣！』 |
| 23:30 | 彼時，人就欲對山講：壓阮！也對山仔講：蓋阮！ |
| 23:31 | 「因為佇青的樹木若行按呢，就佇乾的樹木欲怎樣啊？」 |
| 23:32 | 閣有二個犯人，互人帶去及耶穌同受死。 |
| 23:33 | 到一所在，名叫「頭殼碗」，就佇遐釘伊佇十字架，閣釘許個犯人：一個佇正旁，一個佇倒旁。 |
| 23:34 | 耶穌講：「父啊！赦免𪜶；因為𪜶所做的，𪜶呣知。」人就拈鬮分伊的衫。 |
| 23:35 | 許個有司譏刺伊，講：「伊曾救別人；若是做上帝的基督，受揀選的，著救家己！」 |
| 23:36 | 兵丁也戲弄伊，近倚用醋互伊， |
| 23:37 | 講：「你若是猶太人的王，著救家己！」 |
| 23:38 | 佇伊的頂面有斬條寫講：「此個是猶太人的王。」 |
| 23:39 | 受吊啲的犯人一個褻瀆伊，講：「你豈呣是基督嗎？著救家己及阮！」 |
| 23:40 | 第二個應來責備伊，講：「你既然同受罪，連上帝也呣驚嗎？ |
| 23:41 | 咱受罪是公道，因為咱所受的合佇咱所行，若是此人所行的無一項呣著。」 |
| 23:42 | 就講：「耶穌啊，你佇你的國來的時，著記得我！」 |
| 23:43 | 耶穌就給伊講：「我實在給你講，今仔日你欲及我佇樂園。」 |
| 23:44 | 日中晝，全地黑暗，到三點鐘的時，日的光無去； |
| 23:45 | 殿內的帳對中裂開。 |
| 23:46 | 耶穌大聲叫就講：「父啊！我的神交代你的手。」諸個話講息，氣就斷。 |
| 23:47 | 百總看見此個代誌，歸榮光上帝，講：「此個真正是義的人！」 |
| 23:48 | 聚集啲看的眾人看見諸個代誌攏搥胸倒去。 |
| 23:49 | 許個及耶穌相識的，以及許個對加利利隨伊來的婦仁人，攏遠遠啲徛來看諸個事。 |
| 23:50 | 有一人名約瑟，伊是議員，做人好閣義； |
| 23:51 | 伊無同許個人所計謀所做的。伊是屬猶太人的亞利馬太城，平素欣慕上帝國的。 |
| 23:52 | 此人去見彼拉多，來求耶穌的身屍， |
| 23:53 | 就收伊落來，用幼苧布包伊，下佇石鑿的墓；攏未曾埋葬人的。 |
| 23:54 | 彼日就是備辦節的日，安息日近啦。 |
| 23:55 | 對加利利及耶穌相及來許個婦仁人隨佇後面，看伊的墓及怎樣下伊的身屍。 |
| 23:56 | 就倒去，備辦香料香油。當安息日，照誡命來歇。 |
