走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 13:1 | 當彼時，有幾若人佇啲將加利利人的事給耶穌講，就是彼拉多將𪜶的血參佇𪜶的牲禮的。 |
|---|---|
| 13:2 | 耶穌應講：「因為諸個加利利人受此號的害，恁拍算𪜶比眾加利利人卡有罪嗎？ |
| 13:3 | 我給恁講，呣是！恁若無反悔，攏欲親像按呢滅無！ |
| 13:4 | 抑是彼十八人，互西羅亞的塔倒落來壓死的；恁拍算𪜶比攏總徛起佇耶路撒冷的人犯罪卡重嗎？ |
| 13:5 | 我給恁講，呣是！恁若無反悔，攏欲照按呢滅無！」 |
| 13:6 | 伊就設一個譬喻講：「某人有一欉無花果樹栽佇伊的葡萄園裡。就來彼欉尋果子，尋無。 |
| 13:7 | 才對管園的講：『你看，我連連三年來對此欉無花果樹尋果子，尋無。著給伊剉起來，啥事互伊也鎮所在！』 |
| 13:8 | 應伊講：『主啊，今年請閣容允伊，聽候我四圍掘鬆，壅肥； |
| 13:9 | 後來若結果子就好，若無，你才給伊剉起來。』」 |
| 13:10 | 安息日，耶穌佇一個會堂啲教示人。 |
| 13:11 | 抵當有一個婦仁人患著邪神，致病十八年久，瘟痀攏𣍐伸直。 |
| 13:12 | 耶穌看見，就叫伊講：「婦仁人啊，今你脫離你的病啦！」 |
| 13:13 | 就用雙手給伊按；伊即時伸直，就歸榮光上帝。 |
| 13:14 | 管會堂的因為耶穌佇安息日醫病，就受氣對眾人應講：「有六日應該著做工；彼六日間通來受醫，安息日呣通。」 |
| 13:15 | 若是主應伊講：「假好的人啊，佇安息日恁豈無逐人對槽裡解伊的牛，抑是驢，牽去食水嗎？ |
| 13:16 | 此個婦仁人是亞伯拉罕的後裔，互撒但縛伊已經十八年久，豈呣應該佇安息的日解伊的結嗎？」 |
| 13:17 | 耶穌講按呢，諸個對敵攏見誚；眾人因為伊所行一切榮光的事，攏總歡喜。 |
| 13:18 | 耶穌就講：「上帝的國親像甚麼？我欲用甚麼來比並伊？ |
| 13:19 | 是親像一粒芥菜子，人提去種佇伊家己的園，就大欉成做樹，空中的鳥來歇佇伊的枝。」 |
| 13:20 | 閣講：「我欲用甚麼來比並上帝的國？ |
| 13:21 | 是親像酵，婦仁人提去下佇三斗的麵粉內，到攏總發酵。」 |
| 13:22 | 耶穌經過諸個城諸個鄉社教示人，也向耶路撒冷啲行。 |
| 13:23 | 有一人給伊講：「主啊，得著救的人是少嗎？」 |
| 13:24 | 耶穌對𪜶講：「著盡力對狹門入去。因為我給恁講，欲有多多人求入，也𣍐得著。 |
| 13:25 | 到家主起來關門，恁才徛佇外面拍門，講：『主啊，給阮開咧！』伊就欲應恁講：『恁對叨位來！我呣識恁。』 |
| 13:26 | 恁就欲講：『阮曾佇你的面前飲食，你也曾佇阮的街路教示。』 |
| 13:27 | 伊欲講：『我給恁講，我呣知恁對叨位來。恁行不義的人，攏著離開我！』 |
| 13:28 | 恁啲欲看見亞伯拉罕、以撒、雅各及眾先知佇上帝的國，也恁家己受趕出佇外面，當彼時佇遐欲有啼哭咬牙切齒。 |
| 13:29 | 對東、對西、對南、對北欲有人來，坐桌佇上帝的國。 |
| 13:30 | 有路尾的，欲做代先；也有代先的，欲做路尾。」 |
| 13:31 | 彼時，有法利賽幾若人來給伊講：「你著離開遮去別位，因為希律愛欲刣你。」 |
| 13:32 | 伊給𪜶講：「恁去給彼隻狐狸講：『你看，今仔日、明仔日我趕鬼醫病，到第三日我就完全。』 |
| 13:33 | 雖然按呢，今仔日、明仔日、及後日，我應該著行，因為不該有先知受害死佇耶路撒冷的外面。 |
| 13:34 | 耶路撒冷啊！耶路撒冷啊！就是刣死先知人，用石頭擲奉差到佇伊的。我偌多擺愛聚集你的子兒，親像雞母聚集伊的雞仔佇翅下；若是恁呣愛。 |
| 13:35 | 你看，恁的厝放啲互恁。閣我給恁講，恁決斷𣍐看見我，聽候恁講：『佇主的名來的得著福氣。』」 |
