走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 24:1 | 七日的頭一日，天昲光，許個婦仁人帶所備辦許個香料到墓， |
|---|---|
| 24:2 | 看見石已經對墓門翱開， |
| 24:3 | 就入去，無看見主的身屍。 |
| 24:4 | 為著按呢啲躊躇的時，忽然有二人徛佇𪜶身邊，衣裳光爁爁。 |
| 24:5 | 婦仁人驚惶，面俯落地。彼二人給𪜶講：「啥事佇死人中尋活人啊？ |
| 24:6 | 伊無佇遮，已經復活。恁著記得伊猶佇加利利的時有怎樣給恁講： |
| 24:7 | 『人子的確著交佇罪人的手，互𪜶釘佇十字架，第三日復活。』」 |
| 24:8 | 𪜶就記得伊的話， |
| 24:9 | 對墓裡倒去，將諸個事攏報互十一個學生及其餘的眾人知。 |
| 24:10 | 去對使徒講諸個代誌的就是抹大拉的馬利亞及約亞拿，及雅各的老母馬利亞，以及其餘及𪜶做伴的婦仁人。 |
| 24:11 | 使徒看許個話做無影，也呣信伊。 |
| 24:12 | 若是彼得起來，走到墓裡，俯落去看，只有看幼苧布若定，就倒去𪜶厝，𪜶奇怪所經過的事。 |
| 24:13 | 像彼日，學生中有二人去一個鄉社；名以馬忤，離耶路撒冷二十五里。 |
| 24:14 | 𪜶相及談論所經過攏總的事。 |
| 24:15 | 𪜶徛啲談論相問的時，耶穌本身近倚，及𪜶相及行； |
| 24:16 | 𪜶二人迷目，致到𣍐認得伊。 |
| 24:17 | 伊對𪜶講：「恁行的時相及辯論的是甚麼話？」𪜶就徛啲，面帶憂容。 |
| 24:18 | 其中一個名革流巴應伊講：「你豈單身出外佇耶路撒冷，也呣知近日佇遐所經過的事嗎？」 |
| 24:19 | 伊給𪜶講：「甚麼事啊？」𪜶給伊講：「就是拿撒勒人耶穌的事。伊是先知人，佇上帝及眾百姓的面前，所講所行有權能。 |
| 24:20 | 也許個祭司頭及咱的序大解送伊，去定死罪，釘伊佇十字架。 |
| 24:21 | 若是阮平素啲向望伊，就是彼個欲贖回以色列的。呣若按呢，閣諸個事成，已經三日啦。 |
| 24:22 | 閣阮中間幾若個婦仁人互阮真卬愕；因為𪜶拍昲光到墓裡， |
| 24:23 | 無看見伊的身屍，就來講，𪜶有看見天使出現，講伊復活啦。 |
| 24:24 | 阮中間幾若人到墓裡，果然看見照婦仁人所講的；總是無看見伊。」 |
| 24:25 | 耶穌對𪜶講：「無知的人啊，先知所講一切的話，恁的心怎樣許信啊！ |
| 24:26 | 基督受諸個艱苦，來入伊的榮光，豈呣應該嗎？」 |
| 24:27 | 就對摩西及眾先知起，見若聖經中所指伊的攏給𪜶解明。 |
| 24:28 | 將近所去的鄉社，耶穌親像欲行卡遠， |
| 24:29 | 二人強留伊講：「請及阮住，時已經晏，日欲落啦！」伊就入去，欲及𪜶住。 |
| 24:30 | 相及坐桌的時，耶穌提餅，祝謝，擘來互𪜶。 |
| 24:31 | 𪜶的目睭開，就認得伊。連鞭無閣看見。 |
| 24:32 | 𪜶就相及講：「路裡，伊及咱講話，開拆聖經的時，咱的心豈無熱嗎？」 |
| 24:33 | 就即時起身，倒去耶路撒冷，抵著十一個學生及同佇啲的人聚集， |
| 24:34 | 𪜶講：「主果然復活，也出現互西門看見。」 |
| 24:35 | 𪜶二人也講起佇路裡所抵著的事，及佇擘餅的時𪜶怎樣認得伊。 |
| 24:36 | 𪜶徛啲講諸個話的時，耶穌本身徛佇𪜶中間，給𪜶講：「願恁平安！」 |
| 24:37 | 𪜶卬愕閣驚，掠做所看見的是神。 |
| 24:38 | 伊就給𪜶講：「恁啥事茹亂？心內生起僥疑啊？ |
| 24:39 | 著看我的手，我的腳，就是我本身。摸我就知！因為神無骨無肉，照恁看見，我攏是有。」 |
| 24:40 | 講按呢，就將手及腳互𪜶看。 |
| 24:41 | 學生為著歡喜的緣故，猶久無信，閣啲奇怪，伊給𪜶講；「恁佇遮有甚麼通食無？」 |
| 24:42 | 𪜶就將pek的魚一片互伊。 |
| 24:43 | 伊提去，當𪜶的面前食伊。 |
| 24:44 | 閣對𪜶講：「諸個就是我猶久及恁佇啲的時所對恁講的話：講見若佇摩西的律法，及許個先知，以及詩篇，所記載指我的話攏的確著應驗。」 |
| 24:45 | 就開𪜶的心竅，互𪜶會曉悟許個聖經， |
| 24:46 | 閣給𪜶講：「有按呢記載，基督著受苦，第三日對死人中復活， |
| 24:47 | 也反悔及赦罪的道理，欲佇伊的名來傳到萬邦，是對耶路撒冷起。 |
| 24:48 | 恁做諸個代誌的干證。 |
| 24:49 | 也我欲差我的父所應允的到佇恁，總是恁著𫢶佇此個城，聽候對頂面落來的權能親像衫給恁穿。」 |
| 24:50 | 就導𪜶出去到伯大尼的對面，抬起手給𪜶祝福。 |
| 24:51 | 祝福的時，就離別𪜶，受接接上天。 |
| 24:52 | 𪜶就拜伊，就倒轉去耶路撒冷，大大歡喜， |
| 24:53 | 常常佇殿內謳咾上帝。 |
- 本章節結束 -
上一章