走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 7:1 | 耶穌講互百姓聽的話攏明白，就入迦百農。 |
|---|---|
| 7:2 | 有一個百總所對重的奴僕患著病，啲欲死。 |
| 7:3 | 百總聽見耶穌的事，就差猶太的長老幾若人求伊來救伊的奴僕。 |
| 7:4 | 𪜶就近耶穌，切切求伊講：「此人會堪得你給伊行此個代誌； |
| 7:5 | 因為伊疼咱的百姓，閣本身替咱起會堂。」 |
| 7:6 | 耶穌及𪜶去。離厝無偌遠，百總差幾若個朋友就近伊，給伊講：「主啊！呣通勞煩；你到我的厝，我當𣍐起。 |
| 7:7 | 我也掠做家己𣍐堪得就近你，你若講一句話，我的奴僕就會好。 |
| 7:8 | 因為我也是互人管的人，也有兵互我管，給此個講：『去！』伊就去；給彼個講：『來！』伊就來；給我的奴僕講：『行按呢！』伊就行按呢。」 |
| 7:9 | 耶穌聽見諸個話，就奇怪伊，越轉身給隨伊的眾人講：「我給恁講，親像此號的信，連以色列中我猶未曾抵著。」 |
| 7:10 | 所差的人倒去到厝，看見奴僕已經好好。 |
| 7:11 | 閣無偌久，耶穌去一個城，名叫拿因，伊的學生及歸陣人及伊同行。 |
| 7:12 | 欲近城門，抵當有人扛一個死人出來。伊的老母孤孤生此個子；閣是守寡。城內有多多人啲送伊。 |
| 7:13 | 主看見就憐憫伊，給伊講：「莫得哮！」 |
| 7:14 | 就倚去摸彼個靠身屍的架，扛的人停腳。伊就講：「少年人啊，我給你講，起來！」 |
| 7:15 | 死的人就起來坐，續講話。 |
| 7:16 | 耶穌就將伊互伊的老母。眾人攏驚惶，歸榮光上帝，講：「大先知有興起佇咱中間！」閣講：「上帝有看顧伊的百姓！」 |
| 7:17 | 對按呢耶穌此個名聲遍傳佇猶太及周圍的地方。 |
| 7:18 | 約翰的學生將諸個事攏總報𪜶的先生知。 |
| 7:19 | 伊就叫伊的學生二人來，差𪜶就近主，講：「所欲來的是你嗎？抑是阮著向望別人啊？」 |
| 7:20 | 彼二人已經到，就講：「行洗禮約翰差阮就近你講：『欲來的是你嗎？抑是阮著向望別人啊？』」 |
| 7:21 | 彼時，耶穌醫好多多破病的痛疼的，患著鬼的，閣互多多睛暝的得著看見。 |
| 7:22 | 就應講：「恁著去，將恁所看見所聽見的報約翰知，就是睛暝的看見，跛腳的行，癩ko的清氣，臭耳聾的聽見，死的人復活，喪鄉人得著聽福音。 |
| 7:23 | 見若無佇我來著觸的，有福氣！」 |
| 7:24 | 約翰所差的人去了，耶穌才提起約翰對眾人講：「恁前出去曠野，欲看甚麼？是蘆竹互風吹振動嗎？ |
| 7:25 | 恁出去，欲看甚麼？是人穿幼軟的衣裳嗎？你看，穿衫行伍、享受宴樂的是佇王宮。 |
| 7:26 | 按呢，恁出去欲看甚麼？先知人嗎？是啦，我給恁講，也是卡贏過先知的。 |
| 7:27 | 此人就是經裡所指的講：『你看，我差我的使者佇你的面前，伊欲佇你的頭前備辦你的路。』 |
| 7:28 | 我給恁講，婦仁人所生，未有卡大約翰的；總是佇上帝國的微細的猶卡大伊。」 |
| 7:29 | 眾百姓及抽餉的人，已經受約翰的洗禮，一下聽見這，就稱呼上帝做義； |
| 7:30 | 若是法利賽人及教律法的先生無受伊的洗禮，家己拍無上帝的旨意。 |
| 7:31 | 主講：「此世代的人我欲用甚麼來比並𪜶？𪜶是親像甚麼啊？ |
| 7:32 | 是親像囝仔坐佇街市裡，相叫講：阮對恁歕笛仔，恁無跳舞；阮曾悲哀，恁無啼哭。 |
| 7:33 | 因為行洗禮的約翰來，無食餅，無飲酒，恁就講伊患著鬼。 |
| 7:34 | 人子來，也食也飲，恁就講伊是貪食好酒的人，抽餉的及歹人的朋友。 |
| 7:35 | 若是智慧對伊的眾子顯明伊是著。」 |
| 7:36 | 有一個法利賽人請耶穌相及食；伊就入法利賽人的厝坐桌。 |
| 7:37 | 抵當城內有一個歹婦仁人，知伊坐桌佇法利賽人的厝，就帶貯香油的玉罐來， |
| 7:38 | 徛佇耶穌的後面，倚伊的腳啲啼哭，有目屎滴徛伊的腳，就用伊的頭毛拭伊，閣捷捷唚伊的腳，用香油抹伊。 |
| 7:39 | 請耶穌的法利賽人看見按呢，心內想講：「此人若是先知，的確會知摸伊的人是是誰，閣是甚麼號的婦仁人；就是歹人。」 |
| 7:40 | 耶穌應伊講：「西門！我有話欲給你講。」西門講：「先生，請你講。」 |
| 7:41 | 伊就講：「某個債主有二人欠伊的債；一個欠伊五百個銀仔，一個欠伊五十； |
| 7:42 | 𪜶既然無通還，債主就赦免𪜶二人。按呢，就叨落一個卡疼債主啊？」 |
| 7:43 | 西門應講：「我拍算是彼個互伊赦免卡多的。」耶穌給伊講：「你所斷的是著。」 |
| 7:44 | 就越頭向婦仁人，給西門講：「你看見此個婦仁人無？我入你的厝，你無用水互我洗腳；若是伊用目屎滴𣸄我的腳，用頭毛拭伊。 |
| 7:45 | 你無給我唚；獨獨伊對我入來的時唚我的腳無息。 |
| 7:46 | 你無用油抹我的頭殼；若是伊用香油抹我的腳。 |
| 7:47 | 所以我給你講，伊多多的罪過已經赦免，因為伊的疼是多，若是得著赦免少的，伊的疼也是少。」 |
| 7:48 | 就給婦仁人講：「你的罪赦啦。」 |
| 7:49 | 同桌的人心內講：「此個啲赦罪的是甚麼人。」 |
| 7:50 | 耶穌對婦仁人講：「你的信有救你；做你安心倒去！」 |
