走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 8:1 | 過無幾日，耶穌四界行逐個城逐個鄉社，宣傳來報揚上帝國的福音。十二個學生也及伊去， |
|---|---|
| 8:2 | 也有幾若個婦仁人，有的曾患著鬼，有的有破病今已經得著醫好，其中有抹大拉的馬利亞（曾有七個鬼對伊出去）， |
| 8:3 | 閣有希律的管家苦撒的某約亞拿，閣有蘇撒拿，以外猶有多多婦仁人，攏用𪜶所有的來服事𪜶。 |
| 8:4 | 有多多人聚集，閣有人對逐個城來就近伊，彼時耶穌設譬喻給𪜶講： |
| 8:5 | 「有撒種的出去撒種。𪜶撒的時，有的磕落佇路邊，互人所踏，天中的飛鳥一盡食伊。 |
| 8:6 | 有的磕落佇石盤頂，發起來就乾去，因為無潤澤。 |
| 8:7 | 有的磕落佇茦仔中，茦仔平平發起來，遮蔽伊。 |
| 8:8 | 有的磕落佇好的土地，發起來結實到一百倍。」諸個話講了，就叫講：「有耳孔通聽的，著聽！」 |
| 8:9 | 伊的學生問伊，此個譬喻怎樣。 |
| 8:10 | 耶穌講：「上帝國的奧妙互恁知；若是對別人，就用譬喻，欲互𪜶看，看𣍐見，聽也𣍐曉悟。」 |
| 8:11 | 「此個譬喻就是按呢：種子就是上帝的道理。 |
| 8:12 | 佇路邊的，就是人聽見道理，魔鬼就來，對𪜶的心內將道理搶去，免得𪜶信來得著救。 |
| 8:13 | 佇石磐頂的，就是人聽了歡喜承受道理，若是𪜶無根，是暫時信若定，抵著試煉的時就悖謬。 |
| 8:14 | 落佇茦仔內的，諸個就是人聽了就去，互在生的掛慮、貨財、宴樂所遮蔽，就結呣成粒。 |
| 8:15 | 佇好土地的，諸個就是人用好閣善良的心聽道理來執守伊，閣吞愞來結實。」 |
| 8:16 | 「無人點燈用器具來蓋伊，抑是下佇眠床下，就是下佇燈台頂，互入來的人看見彼個光。 |
| 8:17 | 因為無有隱密也將來無露現的；無有秘密將來無互人知閣露現的。 |
| 8:18 | 所以，恁著謹慎怎樣來聽；因為見若有的，欲互伊；無的，連伊家己掠做有的，也欲給伊搶去。」 |
| 8:19 | 耶穌的老母及兄弟來就近伊，因為人多，𣍐得近倚。 |
| 8:20 | 有人給伊講：「你的老母及你的兄弟徛佇外面，愛欲看你。」 |
| 8:21 | 伊應講：「我的老母及我的兄弟，就是諸個聽上帝的道理來行的人。」 |
| 8:22 | 有一日，耶穌及伊的學生上船，給𪜶講：「咱來去湖的彼旁岸。」就開船。 |
| 8:23 | 行的時，耶穌睏去。有颶頭風拍落來湖裡，船內的水差不多滿，盡在危險。 |
| 8:24 | 學生近倚叫伊醒，講：「先生啊！先生啊！欲無命啦！」伊就醒，責備風及海湧；風湧就息，也平定。 |
| 8:25 | 伊就給學生講：「恁的信佇叨落？」𪜶就驚惶奇怪，相及講：「這是甚麼人？命令風及水，𪜶也順伊？」 |
| 8:26 | 船到格拉森人的地方，就是加利利的對面。 |
| 8:27 | 耶穌離開船上岸，有一人對城裡出來抵著伊，是患著鬼的。久久無穿衫，無𫢶厝內，獨獨𫢶佇墳墓中。 |
| 8:28 | 看見耶穌就喉叫，仆佇伊的面前，大聲講：「至高上帝的子耶穌，我及你有甚麼干涉？求你莫得苦楚我！」 |
| 8:29 | 因為耶穌有命令邪神對彼個人出來。因為邪神常常掠伊；人用鐵鍊鍊伊，用腳銬銬伊，來顧守伊，伊就掇斷所縛伊的器具，伊互鬼趕到曠野。 |
| 8:30 | 耶穌問伊講；「你叫甚麼名？」伊講：「營」；因為有多多鬼入伊。 |
| 8:31 | 鬼求耶穌，莫得吩咐𪜶入深淵。 |
| 8:32 | 佇遐有歸陣豬佇山裡啲討食。鬼求伊，准𪜶入許個豬。就准𪜶， |
| 8:33 | 鬼就對彼人出去，入許個豬。歸陣豬就走落山坪，𧽵落湖激死。 |
| 8:34 | 顧豬的看見此個代誌就走去，報城內及鄉社的人知。 |
| 8:35 | 𪜶就出來愛看此個代誌；就近耶穌，抵著鬼所對伊出來彼人，穿衫，嗐哉，坐佇耶穌腳下，𪜶就驚。 |
| 8:36 | 看見的人將患著鬼的人怎樣得著救報𪜶知。 |
| 8:37 | 格拉森四方的人，攏求耶穌離開𪜶，因為𪜶大驚的緣故；伊就上船倒轉去。 |
| 8:38 | 鬼所對伊出去的人求欲及伊去，若是耶穌差伊去，講： |
| 8:39 | 「倒去恁兜，將上帝為著你行許大的事排列互人知。」伊就去，遍城宣傳耶穌為著伊所行許大的事。 |
| 8:40 | 耶穌倒轉來的時，眾人接納伊，因為𪜶攏啲聽候伊。 |
| 8:41 | 有一人名叫睚魯，就是管會堂的，來仆佇耶穌的腳下， |
| 8:42 | 求伊到伊的家；因為伊有孤生的查某子，約略十二歲，啲欲死。耶穌去的時，眾人挨夾伊。 |
| 8:43 | 有一個婦仁人，血漏十二年，因為請醫生家伙破到了，無一人會醫好伊。 |
| 8:44 | 來到耶穌的尻脊後，摸伊衫仔裾的鬚，血漏即時止。 |
| 8:45 | 耶穌講：「摸我的是是誰？」大家講無。彼得及同行的人講：「先生，眾人迫倚夾著你。」 |
| 8:46 | 耶穌講：「有人摸我，因為我知有權能對我出。」 |
| 8:47 | 婦仁人看伊囥𣍐密，愕愕惙來仆佇伊腳下，當眾人的面前講明摸伊的緣故，及伊怎樣連鞭好。 |
| 8:48 | 耶穌給伊講：「婦仁人啊，你的信有救你；做你安心倒去！」 |
| 8:49 | 伊猶啲講的時，有人對管會堂者的家來，講：「你的查某子已經死，免勞動先生。」 |
| 8:50 | 耶穌聽見就應伊講：「呣免驚，只有著信，伊就得著救。」 |
| 8:51 | 已經到伊的家，佇彼得、約翰、雅各，及查某囝仔的父母以外，呣准別人及伊入去。 |
| 8:52 | 眾人啲啼哭，為著伊來搥胸。耶穌講：「莫得啼哭！因為伊呣是死，是啲睏若定。」 |
| 8:53 | 𪜶就恥笑伊，因為知伊已經死啦。 |
| 8:54 | 耶穌牽查某囝仔的手，叫講：「查某囝仔，起來！」 |
| 8:55 | 伊的神復倒，即時起來。耶穌吩咐互伊食。 |
| 8:56 | 伊的父母卬愕；耶穌命令𪜶，莫得將所行的給人講。 |
