走到哪裡都有麥子
.png){kind=icon}
.png){kind=icon}
經上記著說：『人活著，不是單靠食物，乃是靠神口裡所出的一切話。』『主的話是我腳前的燈、是我路上的光。』
- 聖經採用通用版本：台語和合本 -
| 14:1 | 安息日，耶穌入一個法利賽頭人的厝欲食，𪜶徛啲當等伊。 |
|---|---|
| 14:2 | 抵當佇伊的面前有一個臌脹的人。 |
| 14:3 | 耶穌對教律法的先生，及法利賽人講：「安息日醫病通抑呣通？」 |
| 14:4 | 𪜶靜靜。耶穌牽彼個人醫好伊，互伊去； |
| 14:5 | 續對𪜶講：「恁中間甚麼人有驢抑是牛，佇安息日跋落溝窟，也無連鞭牽伊起來嗎？」 |
| 14:6 | 諸個話𪜶徛𣍐會應。 |
| 14:7 | 耶穌看許個人客揀大位，就設譬喻對𪜶講： |
| 14:8 | 「恁互人請去赴婚姻的筵桌，莫得坐大位，驚了比你卡尊貴的也互伊請； |
| 14:9 | 就請你及請伊的來給你講：『讓位互此人！』你就見誚退去坐佇尾位。 |
| 14:10 | 獨獨互人請的時，著去坐尾位，就請你的來給你講：『朋友啊，坐起來。』彼時，你佇同桌的人的面前就有體面。 |
| 14:11 | 因為，見若自高的，欲互伊卑微；家己卑微的，欲高升伊。」 |
| 14:12 | 耶穌也給請伊的人講：「你辦日晝頓抑是下昏頓，呣通請你的朋友，抑是兄弟，抑是親戚，抑是好額的厝邊，驚了𪜶倒請你，你就受報答。 |
| 14:13 | 若是你辦筵桌的時，著請喪鄉的、破相的、跛腳的、睛暝的，你就有福氣！ |
| 14:14 | 因為𪜶無通報答你。就佇義人復活的時，你欲得著報答。」 |
| 14:15 | 同桌的一人聽見諸個話，就給伊講：「欲佇上帝的國食的有福氣啊！」 |
| 14:16 | 若是耶穌給伊講：「有一人辦大筵席，所請的多多。 |
| 14:17 | 到欲食的時，差伊的奴僕給所請的人講：『著來！百項物便啦。』 |
| 14:18 | 眾人就同一樣心推辭。頭一個給伊講：『我有買園，姑不終著去看伊。請互我辭。』 |
| 14:19 | 閣一人講：『我有買牛五對，欲去驗看。請互我辭。』 |
| 14:20 | 閣一個講：『我有娶某，才𣍐得來。』 |
| 14:21 | 奴僕倒去，將諸個事給伊的主人講，家主受氣，給伊的奴僕講：『緊緊出去，到城內的大街小巷，導許個喪鄉的、破相的、睛暝的、跛腳的來遮。』 |
| 14:22 | 奴僕講：『主啊，你所命令的已經行伊，若是猶久有剩位。』 |
| 14:23 | 主人對伊的奴僕講：『出去路裡及籬笆邊，勉強人入來，互我的厝滿滿。 |
| 14:24 | 因為我給恁講，前所請的無一人會得食我的筵席。』」 |
| 14:25 | 多多人及伊同行。伊就越過來對𪜶講： |
| 14:26 | 「若有人就近我，也無怨恨伊的父母、某子、兄弟、姊妹，以及家己的生命，就𣍐會做我的學生。 |
| 14:27 | 無夯家己的十字架來隨我的，也𣍐會做我的學生。 |
| 14:28 | 恁中間甚麼人欲起塔，豈無代先坐啲，來算彼個所費，看會起到成𣍐？ |
| 14:29 | 驚了豈採下地基，也𣍐會起到好，就看見的人攏恥笑伊，講： |
| 14:30 | 『此個人有動工，也𣍐起到好。』 |
| 14:31 | 抑是甚麼王出來欲及別個王交戰，豈無代先坐啲參謀，看會用一萬兵抵敵彼個導二萬兵來攻擊伊的抑𣍐？ |
| 14:32 | 若𣍐，就趁伊猶遠，差使者去及伊講和。 |
| 14:33 | 按呢，恁中間見若無放拺一切所有的，𣍐會做我的學生。」 |
| 14:34 | 「今鹽是好；鹽若續失味，欲用甚麼復倒伊的味？ |
| 14:35 | 也𣍐落園得，也𣍐做肥得，只有㧒佇外面。有耳孔通聽的，著聽！」 |
